Krishnanagar Police Busts Hybrid Ganja Racket: અમદાવાદ શહેરના પૂર્વ વિસ્તારમાં નશાના કારોબાર સામે પોલીસે લાલ આંખ કરી છે, જેમાં કૃષ્ણનગર પોલીસ સ્ટેશનની ટીમે હાઇબ્રીડ ગાંજો વેચવાના એક મોટા રેકેટનો પર્દાફાશ કર્યો છે. રાજસ્થાનના ઉદયપુરથી વિશેષ રીતે હાઇબ્રીડ ગાંજો મંગાવીને તેની નાની-નાની પડીકીઓ બનાવીને શહેરમાં છૂટક વેચાણ કરતા કુખ્યાત શખ્સોને પોલીસે ઝડપી પાડ્યા છે. કૃષ્ણનગર પોલીસની ટીમે પ્રબુદ્ધ આશ્રમ કેનાલ પાસેથી ગાંજાની પડીકી સાથે એક આરોપીને પકડી પાડ્યો હતો, જેની ઊંડાણપૂર્વકની પૂછપરછના આધારે પોલીસે અન્ય બે મુખ્ય સાગરીતો સુધી પહોંચીને કુલ 3 આરોપીઓની ધરપકડ કરી છે. આ કાર્યવાહી દરમિયાન પોલીસે આરોપીઓ પાસેથી કુલ 54 ગ્રામ જેટલો કિંમતી હાઇબ્રીડ ગાંજો જપ્ત કર્યો છે.

પ્રબુદ્ધ આશ્રમ કેનાલ પાસેથી ઝડપાયો સંદીપ વર્મા

મળેલી માહિતી મુજબ, કૃષ્ણનગર પોલીસ સ્ટેશનના ડી-સ્ટાફની ટીમને ચોક્કસ બાતમી મળી હતી કે પ્રબુદ્ધ આશ્રમ કેનાલ પાસેથી એક શખ્સ શંકાસ્પદ હાલતમાં ગાંજાનો જથ્થો લઈને પસાર થવાનો છે. આ બાતમીના આધારે પોલીસે ત્વરિત વોચ ગોઠવીને સંદીપ વર્મા નામના વ્યક્તિને રંગે હાથે ઝડપી લીધો હતો. પોલીસની પ્રાથમિક પૂછપરછ દરમિયાન સંદીપ વર્માએ કબૂલાત કરી હતી કે તે આ ગાંજો નવા નરોડા વિસ્તારમાં રહેતા પોતાના મિત્ર પ્રદીપ રાજપૂત પાસેથી લાવ્યો હતો. આ માહિતી મળતા જ પોલીસે તુરંત જ પ્રદીપ રાજપૂતના ઘરે દરોડો પાડીને તેની અટકાયત કરી હતી, જ્યાં તપાસ દરમિયાન બંટી મીરચંદાની નામનો અન્ય એક યુવક પણ ત્યાંથી મળી આવ્યો હતો.

રાજસ્થાનના ઉદયપુરથી મંગાવાતો હતો હાઇબ્રીડ ગાંજો

પોલીસે ત્રણેય આરોપીઓની સઘન તલાશી લેતા તેમની પાસેથી કુલ 54 ગ્રામ હાઇબ્રીડ ગાંજો મળી આવ્યો હતો, જેની આંતરરાષ્ટ્રીય તથા બજાર કિંમત અંદાજે ₹ 1,89,000 આંકવામાં આવી છે. પોલીસની વધુ પૂછપરછમાં ચોંકાવનારો ખુલાસો થયો છે કે મુખ્ય આરોપી બંટી મીરચંદાનીને ગાંજો પીવાની ઘેની ટેવ છે અને તે શોખ ખાતર નશો કરવા ઉપરાંત બહારના ગ્રાહકોને પણ તેનું છૂટક વેચાણ કરતો હતો. તે અગાઉ રાજસ્થાનના ઉદયપુર ખાતે ગયો હતો ત્યારે ત્યાંથી આ હાઇબ્રીડ ગાંજો ખરીદીને અમદાવાદ લાવ્યો હતો અને અહીં આવ્યા બાદ તેની નાની-નાની પડીકીઓ બનાવીને વેપાર ચલાવતો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ત્રણેય આરોપીઓની ધરપકડ કરી પોલીસે શરૂ કરી સઘન તપાસ

કૃષ્ણનગર પોલીસે સંદીપ વર્મા, પ્રદીપ રાજપૂત અને બંટી મીરચંદાની આ ત્રણેય આરોપીઓની ધરપકડ કરીને કાયદેસરની કાર્યવાહી હાથ ધરી છે. પોલીસ હવે એ દિશામાં તપાસ કરી રહી છે કે ઉદયપુરમાં કઈ ચોક્કસ જગ્યાએથી કે કયા શખ્સ પાસેથી આ હાઇબ્રીડ ગાંજો ખરીદવામાં આવતો હતો તેમજ અમદાવાદ શહેરમાં આ નશાનો જથ્થો અન્ય કયા કયા યુવાનો કે ગ્રાહકોને વેચવામાં આવતો હતો. આ ડ્રગ્સ નેટવર્કના મૂળ સુધી પહોંચવા માટે પોલીસે ટેકનિકલ સર્વેલન્સ અને ફોન કોલ ડેટાના આધારે તપાસ વધુ તેજ કરી છે.

આ પણ વાંચો: અમદાવાદમાં વાહનચાલકોના ખિસ્સા પર વધશે બોજ: AMC એ પાર્કિંગ ચાર્જમાં કર્યો વધારો