Amul Ghee Butter Price: દિવાળીના તહેવારને હવે ગણતરીના દિવસો બાકી છે, ત્યારે સામાન્ય પરિવારો માટે મોંઘવારીના વધુ એક સમાચાર સામે આવ્યા છે. દેશની જાણીતી ડેરી બ્રાન્ડ અમૂલે ઘી અને બટરના ભાવમાં વધારો કર્યો છે. નવા ભાવ પ્રમાણે એક કિલો ઘીનો ભાવ ₹630થી વધીને ₹680 થયું છે, જ્યારે 500 ગ્રામ બટરનું પેકેટ ₹310ના બદલે ₹325માં મળશે. તહેવારોમાં ઘીનો ઉપયોગ વધતો હોવાથી આ ભાવવધારાની અસર ઘરના રસોડાથી લઈને મીઠાઈના વેપાર સુધી જોવા મળી શકે છે.

અમૂલ ઘી અને બટરના નવા ભાવ

અમૂલના વિવિધ પેકેટની કિંમતોમાં ₹3થી ₹50 સુધીનો વધારો નોંધાયો છે. ખાસ કરીને ઘીનું મોટું પેકેટ ખરીદતા ગ્રાહકોને હવે વધુ રૂપિયા ચૂકવવા પડશે.

મીઠાઈ અને દિવાળીના પકવાન પણ મોંઘા થશે?

દિવાળી દરમિયાન મોહનથાળ, મગસ, લાડુ, ઘૂઘરા અને અન્ય પરંપરાગત મીઠાઈઓ બનાવવામાં ઘીનો મોટા પ્રમાણમાં ઉપયોગ થાય છે. હવે ઘીના ભાવ વધતાં ઘરેલું મીઠાઈઓ બનાવવાનો ખર્ચ વધી શકે છે. મીઠાઈના વેપારીઓ માટે પણ કાચા માલનો ખર્ચ વધવાની શક્યતા છે. જોકે બજારમાં વેચાતી મીઠાઈઓના ભાવમાં કેટલો વધારો થશે તે અંગે હજુ સ્પષ્ટ માહિતી નથી. વેપારીઓ પોતાના ઉત્પાદન ખર્ચ, સ્ટોક અને બજારની માગના આધારે ભાવ નક્કી કરી શકે છે.

અમદાવાદ-વડોદરામાં અમૂલ ગાયના ઘીની અછત

ભાવવધારાની સાથે કેટલાક બજારોમાં અમૂલના ગાયના ઘીની ઉપલબ્ધતા પણ ચિંતાનો વિષય બની છે. અમદાવાદ અને વડોદરાના કેટલાક વેપારીઓના જણાવ્યા પ્રમાણે ગણેશોત્સવ બાદથી ગાયના ઘીનો પૂરતો જથ્થો મળતો નથી. અમદાવાદના સેટેલાઇટ વિસ્તારના એક મોટા રિટેલ સ્ટોરમાં પણ ઘી અને બટરનો સ્ટોક ઉપલબ્ધ ન હોવાનો અહેવાલ સામે આવ્યો હતો. વડોદરાના અમૂલ પાર્લર સંચાલકોએ પણ માગ પ્રમાણે માલ ન મળતો હોવાની ફરિયાદ કરી છે. જોકે, આ અછત તમામ શહેરો કે તમામ દુકાનોમાં છે એવું કહી શકાય નહીં.

નકલી ઘી સામેની કાર્યવાહી બાદ બ્રાન્ડેડ ઘીની માગ વધી

ઘીના ભાવવધારા અને પુરવઠામાં ખેંચ પાછળ તહેવારોની વધતી માગ એક મહત્વનું પરિબળ માનવામાં આવી રહ્યું છે. ગુજરાત અને રાજસ્થાનમાં ભેળસેળયુક્ત ઘી સામે કાર્યવાહી થયા બાદ ગ્રાહકોનો ઝુકાવ વિશ્વસનીય બ્રાન્ડ તરફ વધ્યો હોવાનું ડેરી ક્ષેત્ર સાથે જોડાયેલા સૂત્રોનું કહેવું છે. અમૂલ સાથે સંકળાયેલા એક સહકારી આગેવાનના જણાવ્યા પ્રમાણે છેલ્લા છ મહિનામાં ગુજરાત અને રાજસ્થાનમાંથી આશરે બે લાખ કિલો નકલી ઘી જપ્ત કરાયું હતું.

 

View this post on Instagram

 

A post shared by Hum Dekhenge News (@humdekhenge_news)

GSTમાં મળેલી રાહત પર ભાવવધારાની અસર

સપ્ટેમ્બર 2025માં ડેરી ઉત્પાદનો પર GSTના દરમાં ઘટાડો થતાં અમૂલે અનેક ઉત્પાદનોના ભાવ ઘટાડ્યા હતા. તે સમયે ઘી અને બટરના ભાવમાં પણ ગ્રાહકોને રાહત મળી હતી. હવે નવેમ્બર 2026માં થયેલા ભાવવધારાથી તે રાહતનો એક ભાગ ઘટ્યો છે. અહેવાલો પ્રમાણે અમૂલના ઓનલાઈન પ્લેટફોર્મ પર ગાયના ઘીનો ભાવ ₹740 પ્રતિ લિટર, શુદ્ધ ઘીનો ₹700 અને ભેંસના ઘીનો ₹720 દર્શાવવામાં આવ્યો હતો. કેટલીક વેરાયટી સ્ટોકમાં ઉપલબ્ધ ન હોવાનું પણ નોંધાયું છે. ઓનલાઈન અને સ્થાનિક દુકાનોના ભાવમાં તફાવત હોઈ શકે છે.

તહેવારો પહેલાં ગ્રાહકોના બજેટમાં વધુ એક ખર્ચ

દિવાળી નજીક આવતાં ઘી, બટર, મીઠાઈ અને અન્ય ખાદ્યપદાર્થોની ખરીદી વધે છે. આવા સમયે અમૂલના ભાવમાં થયેલો વધારો ઘરખર્ચ પર અસર કરી શકે છે. ખાસ કરીને મોટા પ્રમાણમાં મીઠાઈ બનાવતા પરિવારો અને વેપારીઓને વધુ ખર્ચ સહન કરવો પડી શકે છે. એક તરફ ભાવવધારો અને બીજી તરફ કેટલાક બજારોમાં ઘીની અછતના અહેવાલ વચ્ચે હવે તહેવારોની માગને પહોંચી વળવા પુરવઠો કેટલો સુધરે છે તેના પર વેપારીઓ અને ગ્રાહકોની નજર રહેશે.

આ પણ વાંચોઃ હવે Google પર AIથી જવાબ પૂછવું થોડું અલગ! Search Barથી AI Mode બટન હટાવવા કંપની કરી રહી છે પરીક્ષણ