Tamil Nadu 6 AM Movie Shows Permission: દિવાળીના પવિત્ર તહેવાર નિમિત્તે તમિલનાડુ સરકારે રાજ્યના ફિલ્મ પ્રેમીઓ, થિયેટર માલિકો અને સમગ્ર તમિલ સિનેમા ઉદ્યોગ માટે એક અત્યંત મહત્વપૂર્ણ અને ખુશીના સમાચાર આપ્યા છે. રાજ્ય સરકારે એક ઐતિહાસિક નિર્ણય લઈને નવી રિલીઝ થતી ફિલ્મો માટે પ્રથમ અઠવાડિયા દરમિયાન સવારે 6 વાગ્યાથી સ્ક્રીનિંગ કરવાની સત્તાવાર પરવાનગી આપી દીધી છે. તમિલનાડુ થિયેટર અને મલ્ટિપ્લેક્સ ઓનર્સ એસોસિએશને સરકારના આ નિર્ણયને આવકારીને ભારે ખુશી વ્યક્ત કરી છે. બુધવારે મીડિયા સાથેની વાતચીતમાં એસોસિએશને તમિલનાડુ સરકારના આ નિર્ણયની મુક્ત મને પ્રશંસા કરી હતી અને તેને ફિલ્મ ઉદ્યોગ માટે સરકારે આપેલી યાદગાર “દિવાળી ભેટ” ગણાવી હતી.

દક્ષિણના અન્ય રાજ્યોની સરખામણીએ તમિલનાડુમાં પણ સમય બદલાયો

થિયેટર એસોસિએશનના પ્રમુખ તિરુપુર સુબ્રમણ્યમે જણાવ્યું હતું કે મુખ્ય તહેવારો દરમિયાન નવી ફિલ્મોની દૈનિક શો મર્યાદા 4 થી 5 શોથી વધારીને હવે 6 શો સુધી કરી દેવામાં આવી છે. આ નિર્ણયથી સિનેમાગૃહ માલિકોની લાંબા સમયથી ચાલી આવતી પડતર માંગણી પૂર્ણ થઈ છે. તેમણે ઉમેર્યું કે પાડોશી રાજ્યો જેવા કે કર્ણાટક, કેરળ, આંધ્રપ્રદેશ અને તેલંગાણામાં અગાઉથી જ સવારે 6 વાગ્યાથી શો ચલાવવાની મંજૂરી હતી. અગાઉ તમિલનાડુમાં સવારે 9 વાગ્યે પહેલો શો શરૂ થતો હતો, જ્યારે અન્ય રાજ્યોમાં પ્રેક્ષકો સવારે 8:15 થી 8:30 વાગ્યા સુધીમાં પહેલો શો પૂરો કરી લેતા હતા, જેના કારણે સોશિયલ મીડિયા પર રિવ્યૂ લીક થઈ જવાથી સ્થાનિક કલેક્શન પર નકારાત્મક અસર પડતી હતી.

મુખ્યમંત્રી સી. જોસેફ વિજયે ત્વરિત મંજૂરી આપી

તમિલનાડુના મુખ્યમંત્રી સી. જોસેફ વિજયે ફિલ્મ ઉદ્યોગના પ્રતિનિધિઓ અને રાજ્યના મંત્રીઓ વચ્ચે યોજાયેલી મહત્વપૂર્ણ બેઠક બાદ આ આદેશ તાત્કાલિક અસરથી જારી કર્યો છે. નવી જોગવાઈ મુજબ, હવેથી થિયેટરો નવી ફિલ્મો માટે વહેલી સવારે 6 વાગ્યે ખુલી શકશે અને શો મોડી રાત્રે 2:30 વાગ્યા સુધી ચલાવી શકાશે. સુબ્રમણ્યમે સ્પષ્ટ કર્યું કે ડિજિટલ યુગમાં સોશિયલ મીડિયા પર વહેલી સવારે જ પબ્લિક રિવ્યૂ અને બોક્સ ઓફિસ રિપોર્ટ આવી જતાં તમિલનાડુના દર્શકોનો ઉત્સાહ ઘટી જતો હતો. આ વ્યવહારુ મુશ્કેલીઓ મુખ્યમંત્રી સમક્ષ મૂકવામાં આવતા તેમણે વિના વિલંબે સવારે 6 વાગ્યાના શો માટે મંજૂરી આપી દીધી હતી.

સરકારી તિજોરીને થશે આર્થિક ફાયદો

આ નિર્ણયથી માત્ર થિયેટર માલિકોને જ નહીં પરંતુ રાજ્ય સરકારની તિજોરીને પણ મોટો આર્થિક લાભ થશે. સુબ્રમણ્યમે ગણતરી આપતા જણાવ્યું કે દૈનિક શોની સંખ્યા વધીને 6 થવાથી વાણિજ્યિક મનોરંજન કરમાંથી મળતી આવકમાં આશરે 20 ટકાનો સીધો વધારો થશે. હાલમાં ટિકિટિંગ અને રેવન્યુની તમામ પ્રક્રિયાઓ રાજ્ય સરકાર દ્વારા ડિજિટલ સિસ્ટમથી મોનિટર કરવામાં આવતી હોવાથી, કોઈપણ પ્રકારના આવક લીકેજ વિના સરકારને ટેક્સ સ્વરૂપે મોટા પ્રમાણમાં મહેસૂલ પ્રાપ્ત થશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આઈટી કર્મચારીઓ અને ઓફિસ ગોઅર્સને થશે સીધો લાભ

સવારે 6 વાગ્યાના શો શરૂ થવાથી વિવિધ ક્ષેત્રના દર્શકોને મોટો ફાયદો થશે. નાઇટ શિફ્ટમાં કામ કરીને સવારે 5 વાગ્યે છૂટતા આઇટી (IT) કર્મચારીઓ તેમજ સવારે 10 વાગ્યે ઓફિસે જતા સરકારી અને ખાનગી કર્મચારીઓ હવે ‘ફર્સ્ટ ડે ફર્સ્ટ શો’ જોઈ શકશે. આ ઉપરાંત, સિનેમા ક્ષેત્રની વિવિધ સંસ્થાઓએ તમિલનાડુ સિનેમા (રેગ્યુલેશન) એક્ટ 1952 હેઠળના 70 વર્ષ જૂના કાયદાઓમાં સુધારો કરવાની માગ કરી છે. સરકારે ખાતરી આપી છે કે દિવાળીના તહેવાર બાદ આ જૂના નિયમો પર પુનઃવિચારણા કરીને તેને વર્તમાન સમયની જરૂરિયાતો મુજબ આધુનિક બનાવવામાં આવશે.

આ પણ વાંચો: હનુમાન અંશ સિંગર સુનિલ લોઘીના જીવનમાં ફેલાશે પ્રકાશ! આંખોની સારવાર થઈ શરૂ