ભારત સારા સંબંધો ઇચ્છે છે, પરંતુ આતંકવાદ સહન નહીં કરે: એસ. જયશંકર
S Jaishankar on Pakistan: ભારતના વિદેશ મંત્રી એસ. જયશંકરે પાકિસ્તાન સાથેના સંબંધોને લઈને સ્પષ્ટ વલણ વ્યક્ત કર્યું છે. તેમણે કહ્યું કે ભારત પાકિસ્તાન સાથે સારા સંબંધો ઇચ્છે છે, પરંતુ તેના માટે આતંકવાદને નજરઅંદાજ કરી શકાય નહીં. તેમણે વધુમાં જણાવ્યું કે દુનિયા કોઈ દેશને ત્યારે જ ગંભીરતાથી લે છે, જ્યારે તે પડકારોનો જવાબ આપવાની ક્ષમતા દર્શાવે છે. ભારતે ‘ઓપરેશન સિંદૂર’ અને બાલાકોટ એરસ્ટ્રાઇક દ્વારા આ વાત સાબિત કરી છે. S Jaishankar
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
પાકિસ્તાન સાથે સારા સંબંધો ઇચ્છીએ છીએ: જયશંકર
એક કાર્યક્રમ દરમિયાન વિદેશ મંત્રી એસ. જયશંકરને પાકિસ્તાન અને અમેરિકા વચ્ચેના સંબંધો અંગે સવાલ પૂછવામાં આવ્યો હતો. તેમને પૂછવામાં આવ્યું કે શું પાકિસ્તાનનું સૈન્ય તંત્ર અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્રને ખુશ કરવામાં સફળ રહ્યું છે? શું આ જ કારણ છે કે વોશિંગ્ટન ભારતની આતંકવાદ અંગેની ચિંતાઓને સંપૂર્ણપણે સમજી શકતું નથી?
આ સવાલના જવાબમાં જયશંકરે કહ્યું કે;
આ મુદ્દો માત્ર વોશિંગ્ટન ભારતની વાત સમજે છે કે નહીં, એટલા પૂરતો મર્યાદિત નથી. તેમણે વર્ષ 2008ના મુંબઈ આતંકી હુમલાનો ઉલ્લેખ કરીને સવાલ કર્યો કે જો અમેરિકા આ મુદ્દાને સારી રીતે સમજતું હતું, તો મુંબઈ હુમલા બાદ તેણે શું કાર્યવાહી કરી હતી?
આતંકવાદ સામે ભારત હવે બીજા દેશોની રાહ નહીં જુએ જયશંકરે સ્પષ્ટ કર્યું કે ભારત આતંકવાદ સામે પગલાં લેતી વખતે અમેરિકા કે અન્ય દેશો તેની કાર્યવાહી સમજશે કે નહીં, તેની રાહ જોતું નથી. તેમણે કહ્યું કે ભારતે જવાબી કાર્યવાહી એટલા માટે કરી, કારણ કે તે આતંકવાદના પડકારને સમજે છે. તેમના મતે, કોઈ દેશ પોતાની સુરક્ષા અને રાષ્ટ્રીય હિતોની રક્ષા માટે મજબૂત વલણ અપનાવે ત્યારે જ વિશ્વ તેને ગંભીરતાથી લે છે. વિદેશ મંત્રીએ ‘ઓપરેશન સિંદૂર’ અને બાલાકોટ એરસ્ટ્રાઇકનો ઉલ્લેખ કરતાં જણાવ્યું કે ભારતે આતંકવાદ સામે કાર્યવાહી કરવાની પોતાની ક્ષમતા દર્શાવી છે.
આ પણ વાંચો:Ahmedabad : સોલામાં અકસ્માત થતાં શિક્ષણમંત્રી પ્રદ્યુમ્ન વાજા તાત્કાલિક મદદે દોડી આવ્યા
ભારત-અમેરિકા વચ્ચે ઊર્જા અને સંરક્ષણ સહયોગ પર ચર્ચા
આ નિવેદન એવા સમયે આવ્યું છે, જ્યારે ભારત અને અમેરિકા વચ્ચેના સંબંધોમાં તણાવ હોવા છતાં બંને દેશો સહયોગ વધારવાના પ્રયાસો કરી રહ્યા છે. મંગળવારે ભારતીય વિદેશ મંત્રી એસ. જયશંકર અને અમેરિકાના વિદેશ મંત્રી માર્કો રૂબિયો વચ્ચે મુંબઈમાં મુલાકાત થઈ હતી. આ બેઠક દરમિયાન બંને દેશો વચ્ચે વેપાર, ઊર્જા, ટેક્નોલોજી, સંરક્ષણ અને લોકો વચ્ચેના સંબંધોને વધુ મજબૂત બનાવવા અંગે ચર્ચા થઈ હતી. રૂબિયોએ જણાવ્યું હતું કે અમેરિકા સાથે ઊર્જા વેપાર વધારવાથી ભારતને પોતાની સપ્લાય ચેઇનમાં વિવિધતા લાવવામાં મદદ મળી શકે છે. તેનાથી ભારતની વધતી જતી ઊર્જાની જરૂરિયાતો પૂરી કરવામાં પણ સહાય થઈ શકે છે.
પાંચ મહિનામાં બીજી વખત ભારત આવ્યા માર્કો રૂબિયો
અમેરિકાના વિદેશ મંત્રી માર્કો રૂબિયો પાંચ મહિનાની અંદર બીજી વખત ભારતની મુલાકાતે આવ્યા હતા. આ મુલાકાત દરમિયાન બંને દેશોએ પ્રાદેશિક અને વૈશ્વિક મુદ્દાઓ પર પણ ચર્ચા કરી હતી. તેમાં પશ્ચિમ એશિયાની સ્થિતિનો પણ સમાવેશ થતો હતો. અમેરિકાના વિદેશ વિભાગના જણાવ્યા અનુસાર, બંને નેતાઓએ ઊર્જા વેપાર વધારવા અને ભારતની સપ્લાય ચેઇનને વધુ વૈવિધ્યસભર બનાવવા અંગે ચર્ચા કરી હતી. ભારત અને અમેરિકા વચ્ચે વેપાર તથા સંરક્ષણ સહિતના વિવિધ ક્ષેત્રોમાં સહયોગ વધારવા પર પણ ભાર મૂકવામાં આવ્યો હતો.
