Vadodara Flower Market Price Hike: દીવાળીના તહેવારની હર્ષોલ્લાસભેર ઉજવણી કર્યા બાદ વડોદરાવાસીઓ હવે વિક્રમ સંવતના નૂતન વર્ષને આવકારવા માટે ઉત્સાહપૂર્વક સજ્જ થયા છે. નવા વર્ષના શુભારંભે ઘરો, દુકાનો, શોરૂમ, ફેક્ટરીઓ અને વાહનોના પૂજનની સાથે દેવસ્થાનો અને મંદિરોને ફૂલોથી શણગારવાની વર્ષો જૂની પરંપરાને લીધે શહેરમાં ફૂલોની માંગમાં જબરદસ્ત વધારો નોંધાયો છે. શહેરના ઐતિહાસિક ખંડેરાવ માર્કેટ ચાર રસ્તા ખાતે આવેલા મુખ્ય ફૂલ બજારમાં વહેલી સવારથી જ ખરીદી માટે ગ્રાહકોનો ભારે ધસારો જોવા મળ્યો હતો, જ્યાં લોકો ગલગોટા અને ગુલાબની ખરીદી માટે લાંબી લાઈનો લગાવતા નજરે પડ્યા હતા.

નવરાત્રીની સરખામણીએ ભાવમાં 50 ટકાનો તોતિંગ ઉછાળો

તહેવારોના પર્વ નિમિત્તે ફૂલોની ભારે માંગ સામે તેના ભાવમાં સીધો 50 ટકા જેટલો મોટો ઉછાળો જોવા મળ્યો છે. નવરાત્રી દરમિયાન જે ગલગોટા પ્રતિ કિલો રૂ. 30 થી 35 ના સામાન્ય ભાવે વેચાતા હતા, તે નવા વર્ષની પૂર્વસંધ્યાએ વધીને સીધા રૂ. 80 થી 100 સુધી પહોંચી ગયા છે. તેવી જ રીતે ગુલાબના ભાવ પણ પ્રતિ કિલો રૂ. 300 થી 400 ના ઊંચા સ્તરે પહોંચ્યા છે. વેપારીઓના જણાવ્યા અનુસાર, ચાલુ સિઝનમાં થયેલા અનિયમિત અને નહિવત વરસાદના પગલે ફૂલોના ઉત્પાદન પર માઠી અસર પડી છે, જેના કારણે બજારમાં આવક ઘટતા ભાવ આસમાને પહોંચ્યા છે.

સ્થાનિક પંથક ઉપરાંત મહારાષ્ટ્ર અને મધ્યપ્રદેશથી ફૂલોની આવક

વડોદરાના ફૂલ બજારમાં સ્થાનિક સ્તરે પાદરા, કરજણ, વાસદ, બોરસદ તેમજ ગોધરા, દાહોદ અને લીમખેડા ઉપરાંત પાડોશી રાજ્યો મહારાષ્ટ્ર અને મધ્યપ્રદેશમાંથી ગલગોટા સહિતના વિવિધ રંગબેરંગી ફૂલોની ભારે આવક થઈ રહી છે. જ્યારે ગુલાબ મુખ્યત્વે સ્થાનિક ઈટોલા અને ચાણોદ પંથકમાંથી આવી રહ્યા છે. વેપારીઓના અંદાજ મુજબ, બેસતા વર્ષના વધામણાં અને પૂજા-પાઠ માટે માત્ર એક જ દિવસમાં શહેરમાં આશરે 1,000 ટનથી વધુ ગલગોટા અને અન્ય ફૂલોનું રેકોર્ડબ્રેક વેચાણ થવાની પૂરી શક્યતા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ખંડેરાવ માર્કેટ આખી રાત ધમધમશે

ગ્રાહકોની અવિરત ભીડ અને વધતી જતી માંગને પહોંચી વળવા માટે ખંડેરાવ માર્કેટ ચાર રસ્તા સ્થિત ફૂલ બજાર આખી રાત ધમધમતું રાખવામાં આવ્યું છે. વેપારીઓના જણાવ્યા મુજબ, દિવાળી અને નવા વર્ષના તહેવારમાં ગલગોટાનું લાખો કિલોમાં ધૂમ વેચાણ થાય છે. એકલા ખંડેરાવ માર્કેટ વિસ્તારની જ વાત કરીએ તો, ફૂલોના આ મોટા વ્યવસાય સાથે અંદાજે 4,000 થી 5,000 જેટલા નાના-મોટા વેપારીઓ અને શ્રમિક પરિવારોની રોજીરોટી સીધી રીતે જોડાયેલી છે. મોંઘવારીના આ સમયમાં પણ લોકો પોતાની આસ્થા, શ્રદ્ધા અને પરંપરાને જીવંત રાખવા ભારે ઉત્સાહભેર ફૂલોની ખરીદી કરી રહ્યા છે.

આ પણ વાંચો: દિવાળીની ઉજવણી બાદ અમદાવાદમાં પ્રદૂષણનો કહેર, AQIના આંકડા ચોંકાવનારા