ભારતની હાર બાદ અય્યરના નિર્ણય પર સવાલ, વૈભવ સૂર્યવંશીને કેમ કર્યો બહાર?

 India vs Newzealand: ન્યૂઝીલેન્ડ સામેની ચોથી T20 મેચમાં ભારતીય ટીમને 87 રનથી કારમી હારનો સામનો કરવો પડ્યો હતો. શરૂઆતની ત્રણેય T20 મેચમાં લક્ષ્યનો પીછો કરીને જીત મેળવનારી ટીમ ઈન્ડિયા આ વખતે હારી ગઈ. ભારતની હાર બાદ સૌથી વધુ ચર્ચા આક્રમક બેટ્સમેન વૈભવ સૂર્યવંશીને ટીમમાંથી બહાર રાખવાના નિર્ણયની થઈ રહી છે.

ત્રીજી T20 મેચમાં વૈભવ સૂર્યવંશી અને અભિષેક શર્માએ પાવરપ્લેની માત્ર 6 ઓવરમાં 118 રન બનાવીને વર્લ્ડ રેકોર્ડ સર્જ્યો હતો. તેમ છતાં ચોથી T20 મેચમાં વૈભવને પ્લેઇંગ-11માં સ્થાન આપવામાં આવ્યું નહોતું. હવે ચાહકો આ નિર્ણય પર સવાલ ઉઠાવી રહ્યા છે અને કેટલાક ચાહકો ભારતની હાર માટે આ નિર્ણયને જવાબદાર માની રહ્યા છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

ન્યૂઝીલેન્ડે બનાવ્યો 259 રનનો વિશાળ સ્કોર

ચોથી T20 મેચની વાત કરીએ તો ન્યૂઝીલેન્ડે પ્રથમ બેટિંગ કરતાં 20 ઓવરમાં 259 રન બનાવ્યા હતા. કિવી ટીમ તરફથી ગ્લેન ફિલિપ્સે 107 રનની તોફાની ઇનિંગ રમી હતી. જોકે, આ મોટો સ્કોર હોવા છતાં આ મેદાન પર અગાઉ 245 રનના લક્ષ્યનો સફળતાપૂર્વક પીછો કરવામાં આવ્યો હતો. તેથી પ્રથમ ઇનિંગ પૂરી થયા બાદ પણ ભારતની જીતની આશા સંપૂર્ણપણે ખતમ થઈ નહોતી. ભારતીય ટીમ સામે ફરી એકવાર ત્રીજી T20 જેવી આક્રમક બેટિંગ કરવાની જરૂર હતી, પરંતુ આ વખતે ટીમને વૈભવ સૂર્યવંશીની સેવાઓ મળી નહોતી.

ત્રીજી T20માં વૈભવ-અભિષેકે રચ્યો હતો વર્લ્ડ રેકોર્ડ

ત્રીજી T20 મેચમાં 200 રનના લક્ષ્યનો પીછો કરતી વખતે વૈભવ સૂર્યવંશી અને અભિષેક શર્માએ ભારતને ઐતિહાસિક શરૂઆત અપાવી હતી. બંને બેટ્સમેનોએ શરૂઆતથી જ આક્રમક બેટિંગ કરી હતી. તેમણે પાવરપ્લે એટલે કે પ્રથમ 6 ઓવરમાં 118 રન બનાવ્યા હતા. T20 ઇન્ટરનેશનલ ક્રિકેટમાં પાવરપ્લે દરમિયાન બનાવેલો આ સૌથી મોટો સ્કોર હતો. વૈભવ અને અભિષેકની આ વિસ્ફોટક બેટિંગે ભારતને મજબૂત શરૂઆત અપાવી હતી. ચોથી T20માં પણ ચાહકોને આવી જ શરૂઆતની આશા હતી, પરંતુ પ્લેઇંગ-11માં વૈભવનું નામ નહોતું.

આ પણ વાંચો:ખાંભાના ઘરમાં સિંહની એન્ટ્રી! કલાકો સુધી ઓરડામાં જમાવ્યો અડિંગો

ઈશાન કિશન ફિટ થતાં વૈભવને કરાયો બહાર?

ભારતીય ટીમના હેડ કોચ ગૌતમ ગંભીર અને કેપ્ટન શ્રેયસ અય્યરે ત્રીજી T20માં શાનદાર બેટિંગ કરનાર વૈભવ સૂર્યવંશીને ચોથી મેચમાં તક આપી નહોતી. ઈશાન કિશન ફિટ થતાં વૈભવને ટીમમાંથી બહાર કરવામાં આવ્યો હતો. ખાસ વાત એ છે કે ત્રીજી T20માં વૈભવે માત્ર 19 બોલમાં 45 રનની ધમાકેદાર ઇનિંગ રમી હતી. ભારતીય ટીમ સિરીઝમાં અગાઉથી જીત મેળવી ચૂકી હતી. આવી સ્થિતિમાં વૈભવને બહાર રાખવાનો નિર્ણય ચાહકોને સમજાયો નહોતો. હવે ભારતની કારમી હાર બાદ સોશિયલ મીડિયા પર ગૌતમ ગંભીર અને શ્રેયસ અય્યરના આ નિર્ણયની ચર્ચા થઈ રહી છે. ચાહકો સવાલ કરી રહ્યા છે કે જે ખેલાડીએ અગાઉની મેચમાં રેકોર્ડબ્રેક શરૂઆત અપાવી હતી, તેને આગામી મહત્વની મેચમાં બહાર રાખવાની જરૂર કેમ પડી?

આ પણ વાંચો: ન્યૂઝીલેન્ડ સામેની હાર બાદ શ્રેયસ અય્યરે બોલરોને લઈને કરી મોટી વાત