Helicopter Crash :  ઉત્તરાખંડના જોશીમઠ (Joshimath) નજીક થયેલા હેલિકોપ્ટર અકસ્માતે પાંચ મિત્રોની જિંદગી છીનવી લીધી છે. આ દુર્ઘટનામાં પાઇલટ સહિત છ લોકોનાં મોત થયાં છે. મૃતકોમાં બેંગલુરુના પોલીસ ઇન્સ્પેક્ટર અરુણ સાલુંકે સહિત પાંચ મિત્રોનો સમાવેશ થાય છે. આ તમામ મિત્રો ચારધામ યાત્રા (Char Dham Yatra) પૂર્ણ કરીને પરત ફરી રહ્યા હતા. અકસ્માત બાદ તમામ મૃતદેહો મળી આવ્યા છે અને તપાસની જવાબદારી વિમાન દુર્ઘટના તપાસ બ્યુરો (Aircraft Accident Investigation Bureau)ને સોંપવામાં આવી છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

આ ઘટનામાં સૌથી હૃદયદ્રાવક બાબત એ છે કે અરુણ સાલુંકેએ થોડા સમય પહેલાં જ પોતાના એક સાથીના નિધન પર સોશિયલ મીડિયા પર શોક વ્યક્ત કર્યો હતો. 28 ઓગસ્ટે તેમણે ઇન્સ્ટાગ્રામ (Instagram) પર લખ્યું હતું કે, ‘ખૂબ વહેલા ચાલ્યા ગયા ભાઈ.’ પરંતુ એક મહિના બાદ તેઓ પોતે જ આ દુનિયામાંથી વિદાય લઈ ગયા.

ત્રણ દિવસ પહેલાં યાત્રા પર નીકળ્યા હતા પાંચ મિત્રો

મળતી માહિતી મુજબ, પાંચેય મિત્રો ત્રણ દિવસ પહેલાં ચારધામ યાત્રા માટે નીકળ્યા હતા. શુક્રવારે સાંજ સુધીમાં તેઓ બેંગલુરુ પરત ફરવાના હતા. પરિવારજનો અને મિત્રો તેમના આગમનની રાહ જોઈ રહ્યા હતા, પરંતુ એ દરમિયાન હેલિકોપ્ટર દુર્ઘટનાના સમાચાર મળ્યા હતા.

અરુણ સાલુંકે 2007 બેચના કર્ણાટક પોલીસ અધિકારી હતા. તેઓ બેલગાવી જિલ્લાના અથણી તાલુકાના અરાતલ ગામના વતની હતા. પોલીસ વિભાગમાં જોડાતા પહેલાં તેમણે બેંગલુરુની એમ.એસ. રામૈયા ઇન્સ્ટિટ્યૂટ ઑફ ટેક્નોલોજીમાંથી અભ્યાસ કર્યો હતો. સેન્ટ્રલ ક્રાઇમ બ્રાન્ચ (CCB)માં ઇન્સ્પેક્ટર તરીકે ફરજ બજાવતા પહેલાં તેઓ હલસુર પોલીસ સ્ટેશન અને ક્રાઇમ ઇન્વેસ્ટિગેશન ડિપાર્ટમેન્ટ (CID)માં પણ કામ કરી ચૂક્યા હતા.

તેમના પાડોશીઓના જણાવ્યા મુજબ, સાલુંકે મળતાવડા સ્વભાવના હતા અને સોસાયટીના લોકો સાથે સારા સંબંધો ધરાવતા હતા.

અકસ્માતમાં જીવ ગુમાવનારા પાંચ મિત્રો કોણ હતા?

અરુણ સાલુંકે ઉપરાંત અકસ્માતમાં એચ.એસ. નટરાજ (51), પ્રતાપ નિંગરાજુ (41), સુધીર કે. (49) અને શંકર ગૌડાનું (39) પણ મોત થયું છે. ઉત્તરાખંડના અધિકારીઓના જણાવ્યા અનુસાર, પાંચેય મુસાફરો બેંગલુરુના રહેવાસી હતા.

નટરાજ તુમકુર જિલ્લાના હુલિયુરદુર્ગના વતની હતા અને ‘વિદ્યા ભારતી’ શૈક્ષણિક સંસ્થાના વડા તરીકે કાર્યરત હતા. શંકર ગૌડા વ્યવસાયે વકીલ હતા. જ્યારે હાસન જિલ્લાના સક્લેશપુર તાલુકાના બચનહલ્લીના રહેવાસી પ્રતાપ બાંધકામ ક્ષેત્રે કોન્ટ્રાક્ટર તરીકે કામ કરતા હતા. તેઓ લગભગ 15 વર્ષ પહેલાં બેંગલુરુ સ્થાયી થયા હતા અને પત્ની તથા બે પુત્રો સાથે થાનિસન્દ્રામાં રહેતા હતા. તેમના બંને પુત્રો અનુક્રમે ધોરણ 7 અને ધોરણ 3માં અભ્યાસ કરે છે.

અકસ્માત પહેલાં મિત્રને કર્યો હતો ફોન

આ દુર્ઘટનાએ નટરાજના બાળપણના મિત્ર નાગેશને પણ મોટો આઘાત આપ્યો છે. નાગેશે જણાવ્યું હતું કે શુક્રવારે સવારે લગભગ 11 વાગ્યે નટરાજે હેલિકોપ્ટરની અંદરથી તેમને ફોન કર્યો હતો.

નટરાજે ફોન પર જણાવ્યું હતું કે તેઓ હેલિકોપ્ટરમાં બેઠા છે અને હવામાન સુધરવાની રાહ જોઈ રહ્યા છે. વિસ્તારમાં ગાઢ ધુમ્મસ (Dense Fog) હોવાથી પાઇલટે દૃશ્યતા (Visibility) સુધરે ત્યાં સુધી ઉડાન રોકી રાખી હતી. નાગેશે જ્યારે હવામાન વિશે પૂછ્યું ત્યારે નટરાજે ત્યાં ખૂબ ઠંડી હોવાનું જણાવ્યું હતું. પરિવારજનો સાંજે તેમના સ્વજનો ઘરે પરત ફરશે તેવી આશા રાખીને બેઠા હતા, પરંતુ એક અકસ્માતે પાંચ મિત્રોની જિંદગીનો અંત લાવી દીધો.

આ પણ વાંચો : હવે અજાણ્યા નંબર પરથી ફોન આવે તો નામ પણ દેખાશે! આવતીકાલથી ભારતમાં CNAP સેવા શરૂ