ગાયનું મૂત્ર પીવે છે અને ચાટે છે ભારતીયો: ઈઝરાયેલી ધર્મગુરુએ હિન્દુઓની મજાક ઉડાવી
હિંદુ ધર્મની ધાર્મિક માન્યતાઓ અને ગાયની પૂજાની પરંપરા અંગે અપમાનજનક ટિપ્પણીઓ કરવાના આરોપને પગલે ઇઝરાયલી-અમેરિકન રબ્બી યોસી મિઝરાહી વિવાદમાં સપડાયા છે. સોશિયલ મીડિયા પર તેમનો એક વીડિયો વાયરલ થયા બાદ ભારત અને ઇઝરાયલના અનેક લોકોએ આકરી પ્રતિક્રિયા આપી છે. વીડિયોમાં મિઝરાહીએ હિંદુઓની ગાયની પૂજા કરવાની પરંપરાની મજાક ઉડાવી હતી. એટલું જ નહીં, તેમણે ભારતીય ડોક્ટરો અને દિલ્હીની ટ્રાફિક વ્યવસ્થા અંગે પણ વાંધાજનક ટિપ્પણીઓ કરી હતી.
તેમની ટિપ્પણીઓ બાદ સોશિયલ મીડિયા પર તેમને જાતિવાદી ગણાવીને ધાર્મિક માન્યતાઓના અપમાનની ટીકા કરવામાં આવી રહી છે.
વીડિયોમાં શું બોલ્યા રબ્બી યોસી મિઝરાહી?
સોશિયલ મીડિયા પર વાયરલ થયેલા વીડિયોમાં મિઝરાહી એક ભારતીય વ્યક્તિનો ઉલ્લેખ કરતા જોવા મળે છે. તેમણે દાવો કર્યો હતો કે આ વ્યક્તિ અગાઉ તેમના ફેસબુક પેજ માટે કામ કરતો હતો અને યહૂદી ધર્મ અપનાવવા ઇચ્છતો હતો. આ જ સંદર્ભમાં તેમણે તે વ્યક્તિના પરિવાર અને ભારતમાં ગાયની પૂજાની પરંપરા અંગે ટિપ્પણીઓ કરી હતી.
મિઝરાહીએ દાવો કર્યો હતો કે કેટલાક હિંદુઓ ગાયને ઘરની અંદર લાવે છે અને ગાયના મૂત્ર અંગેની કેટલીક પરંપરાઓનું પાલન કરે છે. તેમણે એવો પણ દાવો કર્યો હતો કે ભારતમાં લોકો ફાર્મસીમાંથી ગૌમૂત્ર ખરીદે છે.
Interesting views on Indians, especially Hindus, held by an Israeli Rabbi: https://t.co/umSaZ8SyiP
— শ্রীজিৎ দত্ত | Sreejit Datta (@sreejit_d) October 28, 2026
ભારતીય ડોક્ટરો અંગે પણ તેમણે વાંધાજનક નિવેદન આપ્યું હતું. તેમણે કહ્યું હતું કે નવી દિલ્હીની હોસ્પિટલમાં સારવાર માટે જનાર દર્દીને મળતા ડોક્ટરે પણ કદાચ અગાઉની રાત્રે ગૌમૂત્ર પીધું હોય. આ ઉપરાંત, રસ્તા પર બેઠેલી ગાયોને કારણે ટ્રાફિક જામ થતો હોવાની વાત કરીને તેમણે ભારતીયોની મજાક ઉડાવી હતી.
વીડિયોના અંતમાં તેમણે એવી ટિપ્પણી પણ કરી હતી કે તેઓ ઈશ્વરનો આભાર માને છે કે તેમને ભારતીયો જેવા બનાવવામાં આવ્યા નથી. આ નિવેદનને કારણે વિવાદ વધુ વકર્યો છે.
ઇઝરાયલી લેખકે પણ કરી આકરી ટીકા
મિઝરાહીની ટિપ્પણીઓ સામે ઇઝરાયલના સંશોધક અને લેખક યેશાયા રોઝનમેનએ પણ નારાજગી વ્યક્ત કરી છે. ભારતમાં રહીને અભ્યાસ કરી ચૂકેલા રોઝનમેનના જણાવ્યા અનુસાર, આવી ટિપ્પણીઓથી આંતરરાષ્ટ્રીય સ્તરે ઇઝરાયલની છબીને નુકસાન થઈ રહ્યું છે.
તેમણે સોશિયલ મીડિયા પ્લેટફોર્મ X પર લખ્યું હતું કે ઇઝરાયલની પ્રતિષ્ઠાને થઈ રહેલું નુકસાન આશ્ચર્યજનક હદ સુધી પહોંચી ગયું છે. તેમણે એવી આશા પણ વ્યક્ત કરી હતી કે ભવિષ્યમાં મિઝરાહીના ઇઝરાયલ પ્રવેશ પર પ્રતિબંધ મૂકવામાં આવે, જેમ અગાઉ બ્રિટનમાં તેમના પ્રવેશને લઈને વિવાદ થયો હતો.
અન્ય એક યુઝર રોમન બિસ્તાએ પણ મિઝરાહીની ટિપ્પણીની ટીકા કરી હતી. તેમણે લખ્યું હતું કે, ‘કૂતરા ભસતા રહે છે, જ્યારે હાથી ચાલતો રહે છે.’ સાથે જ તેમણે મિઝરાહીને શરમ રાખવાની સલાહ આપી હતી.
પેલેસ્ટાઇનના રાજદૂતે પણ વ્યક્ત કરી નારાજગી
ભારતમાં પેલેસ્ટાઇનના રાજદૂત અબ્દુલ્લા એમ. અબુ શાવેશએ પણ આ વિવાદ અંગે પ્રતિક્રિયા આપી હતી. તેમણે મિઝરાહીનું નામ લીધા વિના X પર લખ્યું હતું કે જાતિવાદ સમગ્ર માનવતા માટે ખતરો છે.
તેમણે જણાવ્યું હતું કે કોઈપણ ધર્મ કે આસ્થાના લોકો વિરુદ્ધ નફરત ફેલાવવી, તેમની ધાર્મિક માન્યતાઓની મજાક ઉડાવવી કે પરંપરાઓનું અપમાન કરવું એ માત્ર અસહિષ્ણુતા ફેલાવવાનું કામ નથી, પરંતુ માનવતાના સહિયારા પાયાને પણ જોખમમાં મૂકે છે. તેમણે ઉમેર્યું હતું કે જાતિવાદી વિચારધારા ધરાવતા લોકો સમગ્ર માનવજાત માટે ખતરો છે.
કોણ છે યોસી મિઝરાહી?
યોસી મિઝરાહીનો જન્મ ઇઝરાયલમાં થયો હતો અને તેઓ અમેરિકામાં રહેતા ઓર્થોડોક્સ યહૂદી ધર્મપ્રચારક છે. તેઓ ‘ડિવાઇન ઇન્ફોર્મેશન’ નામનું ઓનલાઇન ધાર્મિક મંચ પણ ચલાવે છે.
હિંદુ ધર્મ અંગેની તાજેતરની ટિપ્પણીઓ પહેલાં પણ તેઓ અનેક વિવાદાસ્પદ નિવેદનોને કારણે ટીકા અને વિરોધનો સામનો કરી ચૂક્યા છે.
હોલોકોસ્ટ અંગેના દાવાને લઈને પણ થયો હતો વિવાદ
ડિસેમ્બર 2015માં મિઝરાહીએ એવો દાવો કર્યો હતો કે હોલોકોસ્ટ દરમિયાન 10 લાખથી પણ ઓછા યહૂદીઓનાં મોત થયાં હતાં. જોકે, ઐતિહાસિક સંશોધન મુજબ હોલોકોસ્ટમાં આશરે 60 લાખ યહૂદીઓની હત્યા કરવામાં આવી હતી.
હોલોકોસ્ટના ઇતિહાસકાર એફ્રાઇમ ઝુરોફે મિઝરાહીના દાવાને ફગાવી દીધો હતો. ત્યારબાદ મિઝરાહીએ માફી માગી હતી.
ઓટિઝમ અને ડાઉન સિન્ડ્રોમ અંગે પણ કરી હતી વિવાદાસ્પદ ટિપ્પણી
મિઝરાહીએ અગાઉ એવો દાવો પણ કર્યો હતો કે ઓટિઝમ અને ડાઉન સિન્ડ્રોમ અગાઉના જન્મમાં કરેલાં પાપોની સજા છે. ડિસેમ્બર 2016માં 16 ઓર્થોડોક્સ યહૂદી રબ્બીઓએ તેમની પ્રચાર પદ્ધતિઓની નિંદા કરી હતી. તેમણે મિઝરાહીનાં નિવેદનોને ભ્રામક અને જોખમી ગણાવ્યાં હતાં.
બ્રિટનમાં પ્રવેશને લઈને પણ થયો હતો વિવાદ
માર્ચ 2019માં લંડન અને માન્ચેસ્ટરમાં મિઝરાહીની ધાર્મિક સભાઓ યોજાવાની હતી, પરંતુ તેમના પ્રવાસને લઈને વિવાદ ઊભો થયો હતો. બ્રિટિશ અધિકારીઓએ તેમનો પ્રવાસ અટકાવવા માટે હસ્તક્ષેપ કર્યો હતો.
જોકે, મિઝરાહીએ બાદમાં એક અખબારને જણાવ્યું હતું કે તેમણે પોતે જ વિમાનમાં ન બેસવાનો નિર્ણય લીધો હતો. તેમને આશંકા હતી કે એરપોર્ટ પર તેમની પૂછપરછ થઈ શકે છે અથવા બ્રિટનમાં પ્રવેશ આપવાનો ઇનકાર થઈ શકે છે. બ્રિટનના ગૃહ મંત્રાલયે તેમના પર કોઈ વ્યક્તિગત પ્રવેશ પ્રતિબંધ મૂકવામાં આવ્યો હોવાની જાહેર પુષ્ટિ કરી નહોતી.
આ ઉપરાંત, મિઝરાહી અગાઉ ફ્રાન્સમાં મુસ્લિમો અંગે પણ ઉશ્કેરણીજનક ટિપ્પણીઓ કરી ચૂક્યા છે. તેમણે બ્રિટનના મુખ્ય રબ્બી એફ્રાઇમ મિર્વિસની પણ ટીકા કરી હતી.
હિંદુ ધર્મ અને ગાયની પૂજા અંગેની તાજેતરની ટિપ્પણીઓ બાદ ફરી એકવાર મિઝરાહી વિવાદના કેન્દ્રમાં આવ્યા છે. આ ઘટનાએ ધાર્મિક આસ્થાઓ અને પરંપરાઓ પ્રત્યે પરસ્પર સન્માન જાળવવાની જરૂરિયાત અંગે પણ ચર્ચા જગાવી છે.
આ પણ વાંચો: હવે અજાણ્યા નંબર પરથી ફોન આવે તો નામ પણ દેખાશે! આવતીકાલથી ભારતમાં CNAP સેવા શરૂ
