F-35 ડીલ પર ટ્રમ્પનો સ્પષ્ટ સંદેશ, કહ્યું- અમેરિકા શું વેચશે તે કોઈ નક્કી નહીં કરે

એર ફોર્સ વનમાં પત્રકારો સાથે વાત કરતાં ટ્રમ્પે જણાવ્યું, “અમેરિકાએ શું વેચવું જોઈએ તે મને કોઈ નહીં કહે. તુર્કિયે અમારો મહત્વપૂર્ણ સહયોગી રહ્યો છે.” તેમનું આ નિવેદન એવા સમયે આવ્યું છે જ્યારે ઇઝરાયલના વડાપ્રધાન બેન્જામિન નેતન્યાહૂ મહત્વપૂર્ણ બેઠક માટે વોશિંગ્ટન પહોંચ્યા છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

નેતન્યાહૂએ વ્યક્ત કર્યો હતો વિરોધ

તાજેતરમાં CNNને આપેલા ઇન્ટરવ્યૂમાં નેતન્યાહૂએ તુર્કિયેને F-35 લડાકૂ વિમાનો વેચવાના પ્રસ્તાવનો કડક વિરોધ કર્યો હતો. તેમણે દાવો કર્યો હતો કે તુર્કિયેનું વર્તમાન નેતૃત્વ મુસ્લિમ બ્રધરહૂડની વિચારધારાથી પ્રભાવિત છે અને રાષ્ટ્રપતિ રેજેપ તૈયપ એર્દોગાન વારંવાર ઇઝરાયલ વિરુદ્ધ કડક નિવેદનો આપે છે.

નેતન્યાહૂએ ચેતવણી આપી હતી કે જો તુર્કિયેને F-35 વિમાનો મળશે તો મધ્ય પૂર્વમાં સૈન્ય શક્તિનું સંતુલન બદલાઈ શકે છે અને તે પ્રદેશની સુરક્ષા માટે ગંભીર પડકાર બની શકે છે.

ટ્રમ્પે તુર્કિયે સાથેના સંબંધોને ગણાવ્યા મજબૂત

ટ્રમ્પે જણાવ્યું કે હાલ અમેરિકા અને તુર્કિયે વચ્ચેના સંબંધો અગાઉ કરતાં વધુ સારા છે. તેમણે કહ્યું કે કેટલાક મુદ્દાઓમાં તુર્કિયેએ અમેરિકા પ્રત્યે એવી વફાદારી દર્શાવી છે જે અન્ય કેટલાક સહયોગી દેશોએ પણ દર્શાવી નથી.

ટ્રમ્પે એ પણ સંકેત આપ્યો કે તેમની સરકાર ટૂંક સમયમાં કોંગ્રેસના પ્રતિબંધો છતાં તુર્કિયેને F-35 વિમાનો વેચવા અંગે નિર્ણય લઈ શકે છે. ઉપરાંત, રશિયા પાસેથી S-400 એર ડિફેન્સ સિસ્ટમ ખરીદવાના કારણે તુર્કિયે પર લાગેલા કેટલાક અમેરિકી પ્રતિબંધો હટાવવાની પણ જાહેરાત કરવામાં આવી છે.

F-35ને ગણાવ્યું શ્રેષ્ઠ લડાકૂ વિમાન

ટ્રમ્પે F-35ને વિશ્વનું સૌથી અદ્યતન અને શ્રેષ્ઠ લડાકૂ વિમાન ગણાવ્યું. તેમણે કહ્યું કે તુર્કિયેને આ વિમાનો આપવાના મુદ્દે સરકાર ગંભીરતાથી વિચાર કરી રહી છે.

બીજી તરફ, તુર્કિયેના રાષ્ટ્રપતિ રેજેપ તૈયપ એર્દોગાને પણ વિશ્વાસ વ્યક્ત કર્યો છે કે અમેરિકા સાથે F-35 ફાઇટર જેટ ખરીદવા અને તુર્કિયેના સ્વદેશી KAAN લડાકૂ વિમાન માટે અમેરિકન એન્જિન મેળવવા અંગે મહત્વપૂર્ણ પ્રગતિ થઈ રહી છે.