પાકિસ્તાનમાં મહિલા ટીવી એન્કરની ગોળી મારી હત્યા, પતિ પર શંકા
Rawalpindi : પાકિસ્તાનના રાવલપિંડીમાં મહિલા ટીવી એન્કર રાબિયા અહસાનની ગોળી મારીને હત્યા કરવામાં આવતા ચકચાર મચી ગઈ છે. રાબિયાની હત્યા ગુલશનાબાદ વિસ્તારમાં આવેલા તેમના જ ઘરમાં કરવામાં આવી હતી. પોલીસને ઘરેથી તેમનો મૃતદેહ મળી આવ્યો છે. આ મામલે પોલીસે તેમના પતિને કસ્ટડીમાં લઈને પૂછપરછ શરૂ કરી છે. ઘટનાસ્થળેથી હત્યામાં ઉપયોગમાં લેવાયેલું હોવાનું મનાતું હથિયાર પણ જપ્ત કરવામાં આવ્યું છે. રાબિયા સ્થાનિક ખાનગી ટેલિવિઝન ચેનલમાં એન્કર અને કાર્યક્રમના હોસ્ટ તરીકે કામ કરતાં હતાં.
રાવલપિંડીના સિટી પોલીસ ઓફિસર હસન મુશ્તાક સુખેરાએ પતિને કસ્ટડીમાં લીધાની પુષ્ટિ કરી છે. તેમણે જણાવ્યું કે પોલીસ આ મામલે તપાસ કરી રહી છે. પોલીસ અધિકારીઓ અને ફોરેન્સિક નિષ્ણાતોની ટીમે ઘટનાસ્થળે પહોંચીને તપાસ હાથ ધરી હતી. ટીમે ઘરમાંથી મહત્વના પુરાવા એકત્રિત કર્યા છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
પતિએ ગોળીબારની ઘટનાને અકસ્માત ગણાવ્યો
પોલીસ અધિકારી સુખેરાના જણાવ્યા અનુસાર, ઘરમાં કામ કરતા એક કર્મચારીએ તપાસકર્તાઓને જણાવ્યું હતું કે રાબિયાના પતિએ ગોળીબારની ઘટનાને અકસ્માત ગણાવી હતી. જોકે, પોલીસ આ દાવાની પણ તપાસ કરી રહી છે. પંજાબ ફોરેન્સિક સાયન્સ એજન્સીની ટીમ દ્વારા ઘરમાંથી પુરાવા એકત્રિત કરવામાં આવી રહ્યા છે. રાબિયાના મૃતદેહને પોસ્ટમોર્ટમ માટે હોસ્પિટલ મોકલી આપવામાં આવ્યો છે. પોલીસે જણાવ્યું કે આ મામલે કેસ નોંધવાની પ્રક્રિયા ચાલી રહી છે.
મોતના થોડા કલાકો પહેલાં સોશિયલ મીડિયા પર શેર કર્યો હતો છેલ્લો વીડિયો
રાબિયા અહસાને મોતના થોડા કલાકો પહેલાં જ પોતાના સોશિયલ મીડિયા એકાઉન્ટ પર એક ટૂંકો વીડિયો પોસ્ટ કર્યો હતો. આ વીડિયોમાં તેમણે સાયબર છેતરપિંડી અને ઓનલાઈન ફ્રોડ અંગે વાત કરી હતી. સાથે જ ડિજિટલ મીડિયાના માધ્યમથી લોકોમાં જાગૃતિ ફેલાવવાની જરૂરિયાત પર ભાર મૂક્યો હતો. રાબિયા પોતાની કારકિર્દી દરમિયાન હમ ન્યૂઝ અને જીટીવી સાથે કામ કરી ચૂક્યાં હતાં. આ ઉપરાંત તેમણે 92 ન્યૂઝ ચેનલમાં પણ કાર્યક્રમોનું સંચાલન કર્યું હતું.
આ પણ વાંચો:IPL ઑક્શનમાં પૈસા હશે પણ ખરીદવા માટે ખેલાડી નહીં મળે! KKR ની રણનીતિ પર ઉઠ્યા સવાલ
પાકિસ્તાનના પ્રથમ મહિલા આસિફા ભુટ્ટો-ઝરદારીએ વ્યક્ત કર્યો શોક
મહિલા ટીવી એન્કર રાબિયા અહસાનની હત્યા મામલે પાકિસ્તાનના પ્રથમ મહિલા આસિફા ભુટ્ટો-ઝરદારીએ દુઃખ વ્યક્ત કરીને ઘટનાની સખત નિંદા કરી છે. તેમણે આ મામલે નિષ્પક્ષ અને પારદર્શક તપાસ કરવાની માગ કરી છે, જેથી ઘટનાનું સત્ય બહાર આવે અને જવાબદારો સામે કાર્યવાહી થઈ શકે.
રાષ્ટ્રપતિ સચિવાલય દ્વારા જાહેર કરવામાં આવેલા નિવેદનમાં તેમણે એક જ મહાનગર વિસ્તારમાં વ્યવસાયિક મહિલાઓની હત્યાની વધતી ઘટનાઓ અંગે પણ ચિંતા વ્યક્ત કરી હતી. તેમણે ઓગસ્ટ મહિનામાં ડિજિટલ મીડિયા સાથે સંકળાયેલાં 45 વર્ષીય હિના જાવેદની હત્યાનો ઉલ્લેખ કર્યો હતો. હિના જાવેદનો મૃતદેહ પણ રાવલપિંડીમાં તેમના ઘરમાંથી મળી આવ્યો હતો અને તેમના શરીર પર અત્યાચારના નિશાન જોવા મળ્યા હતા. આસિફા ભુટ્ટો-ઝરદારીએ જણાવ્યું હતું કે હિના જાવેદની હત્યાની તપાસનું પરિણામ પણ હજુ સુધી સામે આવ્યું નથી. તેમણે બંને કિસ્સાઓમાં ન્યાય અને જવાબદારી નક્કી કરવાની જરૂરિયાત પર ભાર મૂક્યો હતો.
