હનીમૂન પર પતિ આખા પરિવારને સાથે લઈ ગયો, ગુસ્સે ભરાયેલી પત્ની પહોંચી કોર્ટ, હવે છૂટાછેડાની આવી નૌબત
Honeymoon Dispute Divorce: ઉત્તર પ્રદેશના મેરઠમાંથી એક અત્યંત ચોંકાવનારો અને અજીબોગરીબ કિસ્સો સામે આવ્યો છે, જ્યાં એક વરરાજાને પોતાના હનીમૂન પર આખા પરિવારને સાથે લઈ જવું ભારે પડી ગયું છે. લગ્નના ગણતરીના દિવસોમાં જ આ અનોખા વિવાદના કારણે વાત એટલી બધી વધી ગઈ છે કે હવે પતિ-પત્ની વચ્ચે છૂટાછેડા લેવાની નૌબત આવી ગઈ છે. પત્નીની નારાજગી બાદ આખો મામલો હવે ફેમિલી કાઉન્સિલિંગ સેન્ટર સુધી પહોંચી ગયો છે.
પત્નીનો ગંભીર આરોપ છે કે લગ્ન પછી પતિ તેને હનીમૂન પર લઈ તો ગયો, પરંતુ એકાંત માણવાને બદલે તે પોતાની સાથે સાસુ, સસરા, નણંદ અને દિયર સહિત આખા પરિવારને સાથે ઉપાડી ગયો હતો. આ જ બાબતને લઈને પતિ-પત્ની વચ્ચે ઉગ્ર વિવાદ શરૂ થયો હતો. પત્નીનું કહેવું છે કે હનીમૂન એ પતિ-પત્ની માટે પર્સનલ ટાઈમ (ખાનગી સમય) હોય છે, પરંતુ આખો પરિવાર સાથે હોવાના કારણે તેને પોતાના પતિ સાથે સમય વિતાવવાની કોઈ તક જ ન મળી.
સિંગાપુર રિટર્ન વરરાજા અને ગ્રેજ્યુએટ દુલ્હન
આ અજીબ કિસ્સો મેરઠના બહસૂમા પોલીસ સ્ટેશન વિસ્તારના રામરાજની રહેવાસી યુવતી અને દિલ્હીના પટેલ નગરમાં રહેતા યુવકનો છે. યુવતી ગ્રેજ્યુએટ (સ્નાતક) છે, જ્યારે યુવકે સિંગાપુરથી હોસ્પિટાલિટી મેનેજમેન્ટનો અભ્યાસ કર્યો છે. મળતી માહિતી મુજબ આ બંનેના લગ્ન એક મેટ્રિમોનિયલ વેબસાઈટના માધ્યમથી થયા હતા.
બીજી તરફ, પતિનું પોતાનું અલગ જ સ્ટેન્ડ છે. તેનું કહેવું છે કે તે આખા પરિવારને ખુશ રાખવા માંગતો હતો અને એટલે જ બધાને સાથે પ્રવાસ પર લઈ ગયો હતો. પતિને હજુ પણ એવું લાગે છે કે તેણે કંઈ ખોટું કર્યું નથી.
3 વાર કાઉન્સિલિંગ છતાં સમાધાન નહીં
આ અનોખા હનીમૂન વિવાદને લઈને ફેમિલી કાઉન્સિલિંગ સેન્ટરમાં અત્યાર સુધીમાં ૩ વખત કાઉન્સિલિંગ સેશન યોજાઈ ચૂક્યા છે. આમ છતાં બંને પક્ષો વચ્ચે કોઈ સહમતિ કે સમાધાન સધાયું નથી અને વાત છૂટાછેડા સુધી અટકી છે. કાઉન્સિલિંગ સેન્ટરના અધિકારીઓ અનુસાર, આજે પણ તેમની કાઉન્સિલિંગ કરવામાં આવી હતી અને બંનેને વિચારવા માટે થોડો વધુ સમય આપવામાં આવ્યો છે. જો આગામી દિવસોમાં વાત નહીં બને, તો કાયદેસરની આગળની કાર્યવાહી કરવામાં આવશે.
આ પણ વાંચોઃ ઓફિસ બાદ સમય બચી રહ્યો છે તો ઘરે બેસીને કરો 50 હજારની કમાણી
આ પણ વાંચોઃ ગોતા વોર્ડમાં પાણીથી રોગચાળો, 3 જૂનના સેમ્પલમાં થયો ચોંકાવનારો ખુલાસો
અમારી WhatsApp ચેનલમાં જોડાવા આ લિંક પર ક્લીક કરો
