World Cup 2027:  વિરાટ કોહલી અને રોહિત શર્માના ક્રિકેટ વર્લ્ડ કપ 2027માં રમવા અંગે ચાલી રહેલી ચર્ચાઓ વચ્ચે ભારતીય ક્રિકેટ કંટ્રોલ બોર્ડ (BCCI)ના પ્રમુખ મિથુન મન્હાસે એક અત્યંત મહત્વપૂર્ણ વાત કહી છે. તેમણે સ્પષ્ટ કર્યું છે કે ટીમમાં પસંદગી માટે ખેલાડીઓની ઉંમર નહીં, પરંતુ તેમની ફિટનેસ અને મેદાન પરનું પ્રદર્શન મહત્વનું રહેશે. આ નિવેદનથી બંને દિગ્ગજ ખેલાડીઓના આગામી વર્લ્ડ કપમાં રમવાની આશાઓ વધુ પ્રબળ બની છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

મિથુન મન્હાસે કર્યો ખુલાસો

‘સ્પોર્ટસ્ટાર’ને આપેલા એક ઇન્ટરવ્યુમાં મિથુન મન્હાસે જણાવ્યું હતું કે જો કોઈ ખેલાડી સંપૂર્ણપણે ફિટ હોય, સતત સારું પ્રદર્શન કરી રહ્યો હોય અને દેશને મેચ જીતાડવામાં મદદ કરતો હોય, તો માત્ર ઉંમરના આધારે તેને ટીમમાંથી બહાર ન રાખવો જોઈએ.

ઉલ્લેખનીય છે કે, ક્રિકેટ વર્લ્ડ કપ 2027 ઓક્ટોબર અને નવેમ્બર દરમિયાન સાઉથ આફ્રિકા, ઝિમ્બાબ્વે અને નામિબિયામાં યોજાનાર છે. તે સમયે રોહિત શર્મા 40 વર્ષના થઈ ચૂક્યા હશે, જ્યારે વિરાટ કોહલીની ઉંમર 38 વર્ષ હશે. જોકે બંને ખેલાડીઓ ટી20 ઈન્ટરનેશનલ અને ટેસ્ટ ક્રિકેટમાંથી નિવૃત્તિ લઈ ચૂક્યા છે, પરંતુ વનડે ક્રિકેટમાં તેઓ હજુ પણ રમી રહ્યા છે.

આ પણ વાંચોઃ WhatsApp માં બદલાશે નિવેગેશન બાર, સ્ક્રોલ કરતા જ થઈ જશે નાનું!

રોહિત શર્માના ખરાબ ફોર્મ દરમિયાન તેમની વનડે કારકિર્દી સામે સવાલો ઊભા થયા હતા, પરંતુ લૉર્ડ્સમાં તેમની સદીએ વિવેચકોને શાંત કર્યા હતા. બીજી તરફ, વિરાટ કોહલી વનડે ક્રિકેટમાં સતત રન બનાવી રહ્યા છે. હવે ન્યુઝીલેન્ડ સામેની આગામી વનડે સિરીઝ દરમિયાન પણ બંનેના પ્રદર્શન પર સૌની નજર રહેશે.

સુભમન ગિલની કેપ્ટનશીપ પર શું બોલ્યા મિથુન મન્હાસ?

BCCI પ્રમુખે કેપ્ટન શુભમન ગિલ અંગે પણ પોતાનો અભિપ્રાય રજૂ કર્યો હતો. તેમનું માનવું છે કે રોહિત શર્મા, વિરાટ કોહલી અને હાર્દિક પંડ્યા જેવા અનુભવી ખેલાડીઓની હાજરી ગિલ માટે ખૂબ જ મદદરૂપ સાબિત થશે. ગિલ અગાઉ ગુજરાત ટાઇટન્સ (GT)ની કપ્તાની કરી ચૂક્યા છે અને ભારતીય ટીમનું નેતૃત્વ કરવાનો અનુભવ પણ ધરાવે છે.

મન્હાસે ઉમેર્યું કે ભારતીય ટીમમાં જવાબદારીઓની વહેંચણી થવી જરૂરી છે. ફાસ્ટ બોલર જસપ્રીત બુમરાહ બોલિંગ વિભાગનું નેતૃત્વ કરી શકે છે, જ્યારે અન્ય ખેલાડીઓ પણ મોટી જવાબદારીઓ સંભાળી શકે છે. તેમના મતે, સિનિયર ખેલાડીઓનો અનુભવ શુભમન ગિલને મોટી ટૂર્નામેન્ટ્સમાં નિર્ણયો લેવામાં મદદ કરશે.

ભારતીય ટીમ ન્યુઝીલેન્ડ પ્રવાસ દરમિયાન પાંચ ટી20, પાંચ વનડે અને બે ટેસ્ટ મેચ રમશે. આ દરમિયાન વનડે સિરીઝ 4 થી 15 નવેમ્બર સુધી નિર્ધારિત છે. 2027ના વર્લ્ડ કપ પહેલા આ પ્રવાસ ટીમ કોમ્બિનેશન અને ખેલાડીઓના પ્રદર્શનને પરખવાની એક મહત્વપૂર્ણ તક પૂરી પાડશે.