30/07/2026: અમદાવાદમાં 31 જુલાઈ અને 1 ઓગસ્ટે ભારે વરસાદની આગાહી વચ્ચે Gallops Industrial Parkમાં આવેલી તમામ કંપનીઓ અને ઔદ્યોગિક એકમોને કર્મચારીઓની સુરક્ષાને લઈને મહત્વપૂર્ણ સૂચના આપવામાં આવી છે. હવામાનની આગાહી મુજબ આજ રાતથી વરસાદનું જોર વધવાની શક્યતા છે અને આગામી બે દિવસ દરમિયાન ભારે વરસાદ વરસી શકે છે. આ સ્થિતિને ધ્યાનમાં રાખીને ઔદ્યોગિક પાર્કમાં બિનજરૂરી માનવ અવરજવર ટાળવા તેમજ શિફ્ટનું આયોજન હવામાન અને પાણીના સ્તરને ધ્યાનમાં રાખીને કરવા જણાવાયું છે.
આજ રાતથી વરસાદનું જોર વધવાની શક્યતા
અમદાવાદ માટે 31 જુલાઈ અને 1 ઓગસ્ટ દરમિયાન રેડ એલર્ટની સ્થિતિને ધ્યાનમાં રાખીને Gallops Industrial Parkના તમામ ઉદ્યોગો અને સંસ્થાઓને સતર્ક રહેવા જણાવાયું છે. હાલમાં પણ ઔદ્યોગિક પાર્કના કેટલાક વિસ્તારોમાં પાણી ભરાઈ ગયું હોવાનું જણાવાયું છે. આગામી કલાકોમાં વધુ વરસાદ પડે તો પાણીનું સ્તર વધવાની શક્યતા હોવાથી પરિસ્થિતિ વધુ ગંભીર બની શકે છે.
નાઈટ શિફ્ટના કર્મચારીઓ માટે ખાસ સૂચના
એડવાઇઝરીમાં ખાસ કરીને આજ રાતથી શરૂ થતી નાઈટ શિફ્ટના કર્મચારીઓને શક્ય હોય ત્યાં સુધી ઔદ્યોગિક પાર્કમાં રોકાવું નહીં તેવી સલાહ આપવામાં આવી છે. કંપનીઓને પોતાની કામગીરી અને કર્મચારીઓની સંખ્યા અંગે સ્થાનિક પરિસ્થિતિને ધ્યાનમાં રાખીને નિર્ણય લેવા જણાવાયું છે.
આ ઉપરાંત આગામી બે દિવસ માટે ડે અને નાઈટ શિફ્ટનું આયોજન વરસાદની સ્થિતિ અને ઔદ્યોગિક પાર્કમાં પાણીના સ્તરને આધારે કરવા સૂચના આપવામાં આવી છે.
જરૂરી હોય તો જ કર્મચારીઓને પાર્કમાં રાખવા સૂચના
જો કોઈ ઉદ્યોગ માટે કર્મચારીઓને ઔદ્યોગિક પાર્કમાં રાખવા અનિવાર્ય હોય, તો તેમની સુરક્ષા અને જરૂરી સુવિધાઓની પૂરતી વ્યવસ્થા કરવા જણાવાયું છે. કર્મચારીઓ માટે નીચેની જરૂરી વસ્તુઓ ઉપલબ્ધ રાખવા ખાસ સૂચના આપવામાં આવી છે:
- પૂરતો ખોરાક અને પીવાનું પાણી
- સતત વીજળી અથવા ઈમરજન્સી લાઇટની વ્યવસ્થા
- ટોર્ચ અને અન્ય પ્રકાશના સાધનો
- લાઈફ જેકેટ
- દોરડા સહિતના બચાવ સાધનો
- પૂરતી સંચાર વ્યવસ્થા
- ફર્સ્ટ એઈડ કિટ
- અન્ય જરૂરી ઇમરજન્સી સાધનો
કર્મચારીઓની સુરક્ષાનું સતત મોનિટરિંગ કરવું પડશે
એડવાઇઝરીમાં તમામ ઉદ્યોગોને પોતાના કર્મચારીઓને સુરક્ષિત સ્થળે રાખવા અને રેડ એલર્ટ દરમિયાન તેમની સલામતીનું સતત મોનિટરિંગ થાય તે સુનિશ્ચિત કરવા જણાવાયું છે. ભારે વરસાદ અને પાણી ભરાવાની સ્થિતિમાં કર્મચારીઓની બિનજરૂરી અવરજવર પર પણ નિયંત્રણ રાખવાની સલાહ આપવામાં આવી છે.
ભારે વરસાદ દરમિયાન ઔદ્યોગિક પાર્કમાં અવરજવર ટાળવા અપીલ
Gallops Industrial Parkમાં પાણી ભરાવાની સ્થિતિ વધુ ગંભીર બની શકે તેવી શક્યતાને ધ્યાનમાં રાખીને ભારે વરસાદ દરમિયાન બિનજરૂરી રીતે એક સ્થળેથી બીજા સ્થળે જવાનું ટાળવા જણાવાયું છે. ખાસ કરીને પાણી ભરાયેલા રસ્તાઓ અને જોખમી વિસ્તારોમાં અવરજવર ન કરવા અપીલ કરવામાં આવી છે.
આગામી બે દિવસ દરમિયાન હવામાનની સ્થિતિ અને પાણીના સ્તર પર સતત નજર રાખી, કર્મચારીઓની સુરક્ષાને સર્વોચ્ચ પ્રાથમિકતા આપવા તમામ ઉદ્યોગો અને સંસ્થાઓને અપીલ કરવામાં આવી છે.
આ પણ વાંચો: વિવાદિત કીર્તિ પટેલની સુરેન્દ્રનગરથી કરાઈ ધરપકડ, અસામાજિક પ્રવૃતિ અટકાવવા લેવાયું પગલું
