Diwali Cleaning Drive AMC: દિવાળીના તહેવારોમાં અમદાવાદીઓ ઉજવણીમાં વ્યસ્ત હતા, ત્યારે શહેરને સ્વચ્છ રાખવા અમદાવાદ મ્યુનિસિપલ કોર્પોરેશન (AMC)ના હજારો સફાઈ કર્મચારીઓ સતત ફરજ પર રહ્યા હતા. ધનતેરસથી ભાઈબીજ સુધી હાથ ધરાયેલા વિશેષ સફાઈ અભિયાનમાં શહેરમાંથી 19,500 મેટ્રિક ટનથી વધુ કચરો એકત્રિત કરવામાં આવ્યો હતો. ગયા વર્ષની સરખામણીએ આ વર્ષે કચરાના જથ્થામાં 6,500 મેટ્રિક ટનથી વધુનો વધારો નોંધાયો છે.

ગયા વર્ષ કરતાં કચરામાં મોટો વધારો

AMCના સોલિડ વેસ્ટ મેનેજમેન્ટ વિભાગના આંકડા મુજબ ગયા વર્ષે દિવાળીના આ જ સમયગાળામાં 12,980 મેટ્રિક ટન કચરો એકત્રિત થયો હતો. જ્યારે ચાલુ વર્ષે આ આંકડો વધીને 19,500 મેટ્રિક ટનને પાર થયો છે. એટલે કે એક વર્ષમાં કચરાના જથ્થામાં નોંધપાત્ર વધારો થયો છે. દિવાળીની ઉજવણી, ફટાકડાના અવશેષો અને બજારોમાં વધેલી અવરજવરને કારણે જાહેર માર્ગો તથા રહેણાક વિસ્તારોમાં કચરાનું પ્રમાણ વધ્યું હતું.

ચાર દિવસમાં કેટલો કચરો એકત્રિત થયો?

AMCના આંકડા પ્રમાણે દિવાળીના ચાર દિવસ દરમિયાન કચરાનું પ્રમાણ આ પ્રમાણે રહ્યું હતું:

• દિવાળીના દિવસે: 5,312 મેટ્રિક ટન
• બેસતા વર્ષના દિવસે: 5,160 મેટ્રિક ટન
• પડતર દિવસે: 4,583 મેટ્રિક ટન
• ભાઈબીજના દિવસે: 4,445 મેટ્રિક ટન

આ ચાર દિવસમાં જ કુલ 19,500 મેટ્રિક ટનથી વધુ કચરો એકત્રિત કરવામાં આવ્યો હતો.

12 હજારથી વધુ સફાઈ કર્મચારીઓ મેદાનમાં

તહેવારો દરમિયાન સફાઈ વ્યવસ્થા જળવાઈ રહે તે માટે AMC દ્વારા વિશેષ માનવબળ તહેનાત કરવામાં આવ્યું હતું. સરેરાશ 9,500થી વધુ કાયમી સફાઈ મિત્રો અને 2,500થી વધુ RWA કામદારો સફાઈ કામગીરીમાં જોડાયા હતા. આ ઉપરાંત રાત્રિના સમયે સફાઈ માટે 2,000થી વધુ કર્મચારીઓ કાર્યરત રહ્યા હતા. ફટાકડાના અવશેષો અને રસ્તાઓ પર ફેલાયેલા કચરાને દૂર કરવા 150થી વધુ વિશેષ ટીમો પણ વિવિધ વિસ્તારોમાં કામગીરી કરી રહી હતી.

અમારી WhatsApp ચેનલમાં જોડાવા આ લિંક પર ક્લીક કરો

મશીનરી અને વિશેષ વાહનોનો પણ ઉપયોગ

શહેરની સફાઈ માટે કર્મચારીઓની સાથે આધુનિક મશીનરી અને કચરો એકત્રિત કરતાં વિશેષ વાહનોનો ઉપયોગ કરવામાં આવ્યો હતો. મુખ્ય માર્ગો, બજારો, રહેણાક વિસ્તારો અને સોસાયટીઓની આસપાસ દિવસ દરમિયાન તેમજ રાત્રિના સમયે સફાઈ હાથ ધરવામાં આવી હતી.

તહેવારોની રજાઓમાં પણ ફરજ બજાવનારા સફાઈ કર્મચારીઓના કારણે શહેરની સ્વચ્છતા વ્યવસ્થા જાળવવામાં મદદ મળી હતી. દિવાળીના દિવસોમાં કચરાના જથ્થામાં થયેલો વધારો અને તેને સમયસર દૂર કરવા માટે હાથ ધરાયેલી કામગીરીમાં સફાઈ કર્મચારીઓનું યોગદાન મહત્ત્વનું રહ્યું હતું.

આ પણ વાંચોઃ માઈક્રોસોફ્ટ આઉટેજની ઈન્ડિગો પર મોટી અસર! ઈમેલ સપોર્ટ સેવાઓ બંધ, જાહેર કરી એડવાઇઝરી