કંગના રનૌત ફરી બનશે હોરર ક્વીન, ‘સ્કેરી પિક્ચર’નો ફર્સ્ટ લુક જાહેર
Kangana Ranaut: બોલિવૂડ અભિનેત્રી કંગના રનૌત ફરી એકવાર મોટા પડદા પર હોરર ફિલ્મ સાથે વાપસી કરવા જઈ રહી છે. તેની આગામી ફિલ્મ ‘સ્કેરી પિક્ચર’ (Scary Picture)નું સત્તાવાર એલાન કરવામાં આવ્યું છે. આ ફિલ્મમાં કંગના મુખ્ય ભૂમિકામાં જોવા મળશે. ફિલ્મનું નિર્માણ રાણા દગ્ગુબાટી કરશે, જ્યારે તેનું દિગ્દર્શન તેલુગુ ફિલ્મ નિર્માતા રવિ બાબુ કરશે. આ ફિલ્મ સાથે રવિ બાબુ હિન્દી સિનેમામાં દિગ્દર્શક તરીકે ડેબ્યૂ કરવા જઈ રહ્યા છે.
‘હોરરકૉન ઇન્ડિયા 2026’માં ફિલ્મની જાહેરાત થયા બાદ શુક્રવાર, 13 નવેમ્બરે સુરેશ પ્રોડક્શન્સ દ્વારા સત્તાવાર જાહેરાત કરવામાં આવી હતી. આ જાહેરાત બાદ કંગના રનૌતની પ્રતિક્રિયા પણ ચર્ચામાં આવી છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
કંગના રનૌતની હોરર ફિલ્મનું સત્તાવાર એલાન
રાણા દગ્ગુબાટીએ શુક્રવાર, 13 નવેમ્બરે સોશિયલ મીડિયા પર ફિલ્મ ‘સ્કેરી પિક્ચર’ની સત્તાવાર જાહેરાત કરી હતી. આ ફિલ્મમાં કંગના રનૌત મુખ્ય ભૂમિકામાં જોવા મળશે. ફિલ્મની જાહેરાત કરતાં તેમણે લખ્યું હતું કે, એક નવો ડરામણો અનુભવ દર્શકો સમક્ષ આવવા જઈ રહ્યો છે. ડૉ. ડી. રામાનાયડુ પ્રસ્તુત કરે છે ‘સ્કેરી પિક્ચર’, જેમાં કંગના રનૌત મુખ્ય ભૂમિકામાં છે. આ ફિલ્મ ફ્લાઇંગ ફ્રોગ્સ પ્રોડક્શન હેઠળ બનાવવામાં આવી રહી છે.
મેકર્સે ફિલ્મ 2027માં રિલીઝ થઈ શકે તેવા સંકેત આપ્યા છે. કંગના રનૌતે પણ આ પોસ્ટ રિશેર કરીને પોતાની ખુશી વ્યક્ત કરી હતી. તેણે લખ્યું હતું કે, ‘હું ડરેલી પણ છું અને ઉત્સાહિત પણ છું.’
‘હોરરકૉન ઇન્ડિયા 2026’માં થઈ હતી ફિલ્મની જાહેરાત
આ મહિનાની શરૂઆતમાં રાણા દગ્ગુબાટીએ ‘હોરરકૉન ઇન્ડિયા 2026’ દરમિયાન આ ફિલ્મના નામનો પ્રથમ વખત ખુલાસો કર્યો હતો. આ પ્રસંગનો એક વીડિયો પણ સોશિયલ મીડિયા પર વાયરલ થયો હતો, જેમાં રાણા સ્ટેજ પર જોવા મળ્યા હતા અને પાછળ મોટી સ્ક્રીન પર ‘સ્કેરી પિક્ચર’ની ઝલક દર્શાવવામાં આવી હતી.
Scared but excited 😛
— Kangana Ranaut (@KanganaTeam) November 13, 2026
ત્યારબાદ કંગનાએ પણ રાણાનો વીડિયો રિપોસ્ટ કર્યો હતો, જેના કારણે ફિલ્મમાં તેની ભૂમિકા હોવાની પુષ્ટિ થઈ હતી. જોકે, તે સમયે રાણા દગ્ગુબાટીની પ્રોડક્શન કંપની તરફથી સત્તાવાર જાહેરાત કરવામાં આવી નહોતી.
‘સ્કેરી પિક્ચર’થી રવિ બાબુનું હિન્દી સિનેમામાં ડેબ્યૂ
રાણા દગ્ગુબાટીએ ‘હોરરકૉન’ દરમિયાન જણાવ્યું હતું કે ‘સ્કેરી પિક્ચર’ એક હોરર ફિલ્મ છે, જેનું દિગ્દર્શન તેમના મિત્ર અને અભિનેતા-દિગ્દર્શક રવિ બાબુ કરશે.
View this post on Instagram
રવિ બાબુ તેલુગુ સિનેમામાં અનેક હોરર ફિલ્મો બનાવી ચૂક્યા છે, પરંતુ ‘સ્કેરી પિક્ચર’ તેમની પ્રથમ હિન્દી ફીચર ફિલ્મ હશે. પોતાની અલગ પ્રકારની વાર્તા કહેવાની શૈલી માટે જાણીતા રવિ બાબુ આ ફિલ્મ દ્વારા હિન્દી દર્શકો સમક્ષ નવીન હોરર અનુભવ રજૂ કરશે.
આ પણ વાંચો: માઇક્રોસોફ્ટ આઉટેજથી IndiGo પર અસર, Air Indiaએ ઉડાવ્યો મજાક
કંગના રનૌતની આગામી ફિલ્મો
કંગના રનૌત અગાઉ ‘રાજ 2’ અને ‘ચંદ્રમુખી 2’ જેવી હોરર ફિલ્મોમાં કામ કરી ચૂકી છે. હવે ‘સ્કેરી પિક્ચર’ દ્વારા તે ફરી એકવાર હોરર જોનરમાં વાપસી કરશે. તેના તાજેતરના પ્રોજેક્ટની વાત કરીએ તો કંગના છેલ્લે ફિલ્મ ‘ભારત ભાગ્ય વિધાતા’માં જોવા મળી હતી, જે જૂન 2026માં સિનેમાઘરોમાં રિલીઝ થઈ હતી. આ ફિલ્મની વાર્તા 26 નવેમ્બર, 2008ના રોજ મુંબઈમાં થયેલા આતંકવાદી હુમલાની સત્ય ઘટના પર આધારિત હતી. ફિલ્મની કહાની મુંબઈની કામા અને આલ્બલેસ હોસ્પિટલની આસપાસ કેન્દ્રિત હતી, જેના પર આતંકવાદીઓએ હુમલો કર્યો હતો.
