શું નવા વર્ષમાં LPG સિલિન્ડર મોંઘા થશે?

હાલમાં ભારત સરકાર LPG સબસિડીની ગણતરી સાઉદી અરેબિયાના કોન્ટ્રેક્ટ ભાવના આધારે કરે છે. આ ભાવ પશ્ચિમ એશિયામાંથી આવતા LPG માટે માનક ગણાય છે. પરંતુ હવે રાજ્યની માલિકીની તેલ કંપનીઓ ઈચ્છે છે કે સબસિડીની ગણતરીમાં અમેરિકાથી આવતા LPGના ભાવ અને તેને ભારત લાવવાનો વધારાનો ટ્રાન્સપોર્ટ ખર્ચ પણ સામેલ કરવામાં આવે.

અમેરિકાથી LPG આયાત કરવાનું ટ્રાન્સપોર્ટ ખર્ચ સાઉદી અરેબિયા કરતાં લગભગ ચાર ગણું વધારે છે. એટલે કે જો અમેરિકન LPG પર યોગ્ય ડિસ્કાઉન્ટ ન મળે, તો તેનો ખર્ચ વધારે પડે છે. આ સ્થિતિમાં સરકાર સામે બે વિકલ્પ રહે છે અથવા તો વધારે સબસિડી આપવી અથવા તો ગ્રાહકો પર ભાવનો ભાર મૂકવો.

ગયા મહિને ઇન્ડિયન ઓઇલ, ભારત પેટ્રોલિયમ અને હિન્દુસ્તાન પેટ્રોલિયમ જેવી સરકારી કંપનીઓએ મળીને 2026 માટે અમેરિકાથી આશરે 2.2 મિલિયન મેટ્રિક ટન LPG આયાત કરવાનો કરાર કર્યો છે. આ ભારતની કુલ LPG આયાતનો લગભગ 10% ભાગ છે. અમેરિકાથી LPG ખરીદવાનો આ ભારતનો પહેલો લાંબા ગાળાનો કરાર છે. અગાઉ માત્ર જરૂર મુજબ (સ્પોટ માર્કેટમાંથી) ખરીદી થતી હતી.

જો અમેરિકાથી LPG સસ્તા દરે ન મળે અને સરકાર સબસિડી વધારવા તૈયાર ન હોય, તો શક્ય છે કે સબસિડીમાં ઘટાડો થાય, ઘરેલુ LPG સિલિન્ડરના ભાવ વધે. આ અસર માત્ર સામાન્ય ગ્રાહકો પર જ નહીં, પરંતુ ઉજ્જવલા યોજના હેઠળના લાભાર્થીઓ પર પણ પડી શકે છે.

દિલ્હીમાં ઘરેલુ LPG સિલિન્ડરનો ભાવ: ₹853
કોમર્શિયલ ગેસ સિલિન્ડરનો ભાવ: ₹1,580.50
છેલ્લે 8 એપ્રિલ 2025ના રોજ ઘરેલુ ગેસના ભાવમાં ₹50નો વધારો કરવામાં આવ્યો હતો.

ઉજ્જવલા યોજના હેઠળ હાલમાં પ્રતિ સિલિન્ડર ₹300ની સબસિડી આપવામાં આવે છે. દેશભરમાં આ યોજનાના લાભાર્થીઓની સંખ્યા લગભગ 10.35 કરોડ છે. કુલ LPG ગ્રાહકોની સંખ્યા આશરે 33 કરોડ છે.