નેપાળમાં જન્મેલી મનીષા કોઈરાલાએ કર્યો Gen Zને સપોર્ટ, કહ્યું આજે નેપાળ માટે કાળો દિવસ
- સોશિયલ મીડિયા પર વાયરલ થઈ રહેલા વીડિયો અને ફોટા જોઈને પ્રખ્યાત બોલિવૂડ અભિનેત્રી મનીષા કોઈરાલાએ નેપાળ સરકારના વલણની સખત નિંદા કરી છે
HD ન્યુઝ ડેસ્કઃ Gen Z આંદોલનો દરમિયાન થઈ રહેલા હિંસક વિરોધ પ્રદર્શનોને કારણે નેપાળમાં પરિસ્થિતિ સતત બગડી રહી છે. સોશિયલ મીડિયા પર વાયરલ થઈ રહેલા વીડિયો અને ફોટા જોઈને પ્રખ્યાત બોલિવૂડ અભિનેત્રી મનીષા કોઈરાલાએ નેપાળ સરકારના વલણની સખત નિંદા કરી છે. અભિનેત્રી મનીષા કોઈરાલાનો Manisha Koirala જન્મ નેપાળની રાજધાની કાઠમંડુમાં થયો હતો.
મનીષા કોઈરાલાએ શું કહ્યું?
મનીષા કોઈરાલાએ સોશિયલ મીડિયા પોસ્ટમાં લોહીથી લથપથ જૂતાની તસવીર શેર કરી અને લખ્યું છે કે આજે નેપાળ માટે કાળો દિવસ છે. જ્યારે જાહેર લાગણીઓ, ભ્રષ્ટાચાર સામેના ગુસ્સા અને ન્યાયની માંગનો જવાબ ગોળીઓથી આપવામાં આવે છે, ત્યારે તેને કાળો દિવસ કહેવામાં આવે છે.
નેપાળમાં શું થઈ રહ્યું છે?
નેપાળ સરકારે 26 સોશિયલ મીડિયા પ્લેટફોર્મ પર પ્રતિબંધ મૂક્યો હતો. આ પછી કાઠમંડુ સહિત દેશના ઘણા ભાગોમાં, ખાસ કરીને Gen Z યુવાનો દ્વારા, વિરોધ પ્રદર્શનો વધુ તીવ્ર બન્યા. પોલીસે સંસદ ભવનની બહાર હજારો વિરોધીઓ પર ટીયર ગેસ, રબર બુલેટનો ઉપયોગ કર્યો અને ગોળીબાર પણ કર્યો છે. ઓછામાં ઓછા 20 લોકો માર્યા ગયા અને 250થી વધુ લોકો ઘાયલ થયા છે. આ પછી રાજધાની સહિત ઘણા મોટા શહેરોમાં કર્ફ્યુ લાદવામાં આવ્યો છે.
મનીષાના દાદા નેપાળના વડાપ્રધાન હતા
મનીષાના દાદા વિશ્વેશ્વર પ્રસાદ નેપાળના વડા પ્રધાન હતા, જ્યારે તેમના પિતા પણ કેબિનેટ મંત્રી હતા. તેણે સૌપ્રથમ નેપાળી ફિલ્મ ફેરી ભેટૌલાથી ફિલ્મી દુનિયામાં પ્રવેશ કર્યો હતો. ત્યારબાદ તેણે 1991માં રિલીઝ થયેલી ફિલ્મ સૌદાગરથી બોલિવૂડમાં ડેબ્યૂ કર્યું, જેણે તેને ઓળખ આપી.
આ પણ વાંચોઃ નેપાળ ભડકે બળ્યું: વડાપ્રધાનનું રાજીનામું, આંદોલનકારીઓએ આખી સંસદ સળગાવી નાખી
