દેશભરના અનેક એરપોર્ટ પર ચેક-ઇન સિસ્ટમ ખોટકાઇ, બેંગલુરૂમાં 42 ફ્લાઇટ રદ, દિલ્હીમાં પણ જોવા મળી મોટી અસર

નવી દિલ્હી: 3 ડિસેમ્બર, 2025: દેશના અનેક એરપોર્ટ્સ પર બુધવારે (3 ડિસેમ્બર) સવારે ચેક-ઇન સિસ્ટમ અચાનક ઠપ્પ થઈ જતાં મુસાફરોને ભારે હાલાકીનો સામનો કરવો પડ્યો. અહેવાલો અનુસાર, આ ટેકનિકલ ખામીને કારણે ઘણી ફ્લાઇટ્સ મોડી પડી.

વારાણસી એરપોર્ટ પર મુસાફરોને નોટિસ જાહેર કરીને જણાવવામાં આવ્યું કે માઇક્રોસોફ્ટ વિન્ડોઝની ગ્લોબલ આઉટેજના કારણે એરપોર્ટના IT અને ચેક-ઇન સિસ્ટમ પ્રભાવિત થઈ છે.

 કયા એરપોર્ટ્સ વધુ પ્રભાવિત?

• વારાણસી: અહીં IndiGo, SpiceJet, Akasa Air અને Air India Express જેવી એરલાઇન્સની સેવાઓ પ્રભાવિત થઈ.
• હૈદરાબાદ: રાજીવ ગાંધી ઇન્ટરનેશનલ એરપોર્ટ પર સૌથી વધુ અસર જોવા મળી, જ્યાં સવારે મોટી સંખ્યામાં મુસાફરો એરલાઇન હેલ્પડેસ્ક સામે એકઠા થઈ ગયા હતા. આજે અહીં 7 ડિપાર્ચર અને 12 અરાઇવલ ફ્લાઇટ્સ રદ કરવામાં આવી.
• બેંગલુરુ: અહીં ઘણી ફ્લાઇટ્સ મોડી પડી. કુલ 42 ફ્લાઇટ્સ રદ કરાઈ, જેમાં 22 અરાઇવલ અને 20 ડિપાર્ચરનો સમાવેશ થાય છે.
• દિલ્હી (DIAL): દિલ્હી એરપોર્ટ ઓથોરિટીએ પણ એડવાઇઝરી જારી કરીને જણાવ્યું કે કેટલીક ડોમેસ્ટિક એરલાઇન્સ ઓપરેશનલ પડકારોનો સામનો કરી રહી છે.

ઘણા સ્થળોએ એરલાઇન્સને મેન્યુઅલ ચેક-ઇન અને બોર્ડિંગ પર આધાર રાખવો પડ્યો હતો. જોકે, માઇક્રોસોફ્ટ તરફથી આઉટેજ અંગે તાત્કાલિક કોઈ સત્તાવાર નિવેદન આવ્યું નથી.

એરલાઇન્સનું અપડેટ

• Air India: એર ઇન્ડિયાએ જણાવ્યું કે થર્ડ-પાર્ટી સિસ્ટમ સંપૂર્ણપણે પુનઃસ્થાપિત કરી દેવામાં આવી છે અને તમામ એરપોર્ટ્સ પર ચેક-ઇન સામાન્ય રીતે ચાલી રહ્યું છે.
• IndiGo: IndiGo એ કહ્યું કે છેલ્લા કેટલાક દિવસોથી ટેક્નિકલ મુશ્કેલીઓ, ભીડભાડ અને ઓપરેશનલ જરૂરિયાતોના કારણે વિલંબ અને રદ્દીકરણ વધ્યા છે. અસરગ્રસ્ત મુસાફરોને વૈકલ્પિક ફ્લાઇટ અથવા રિફંડની સુવિધા આપવામાં આવી રહી છે.