AAPના બાગી સાંસદોને મંજૂરી મળતાં સરકારની પહેલી પ્રતિક્રિયા, કહ્યું – ‘ટુકડે-ટુકડે…’
Indian Politics: રાઘવ ચઢ્ઢા સહિત આમ આદમી પાર્ટીના સાત બાગી સાંસદોના ભાજપમાં વિલયને રાજ્યસભાએ મંજૂરી આપી દીધી છે. રાજ્યસભા સચિવાલયે આ અંગે નોટિફિકેશન પણ બહાર પાડ્યું છે. હવે આ મામલે કેન્દ્ર સરકાર તરફથી પ્રથમ પ્રતિક્રિયા સામે આવી છે.
કેન્દ્રીય સંસદીય બાબતોના મંત્રી કિરણ રિજિજુએ સોશિયલ મીડિયા પ્લેટફોર્મ X પર પોસ્ટ કરીને લખ્યું કે રાજ્યસભાના અધ્યક્ષ સી.પી. રાધાકૃષ્ણનજીએ આમ આદમી પાર્ટીના 7 સાંસદોના ભાજપમાં વિલયને સ્વીકારી લીધો છે. હવે રાઘવ ચઢ્ઢા, સંદીપ પાઠક, અશોક મિત્તલ, હરભજન સિંહ, સ્વાતી માલીવાલ, રાજિંદર ગુપ્તા અને વિક્રમજીત સિંહ સાહની ભાજપ સંસદીય દળના સભ્ય બની ગયા છે.
Honb’le Chairman Rajya Sabha Shri C.P. Radhakrishnan Ji has accepted the merger of 7 AAP MPs with BJP. Now, Raghav Chadha ji, Sandeep Pathak ji, Ashok Mittal ji, Harbhajan Singh ji, Swati Maliwal ji, Rajinder Gupta ji & Vikramjit Singh Sahney ji are Members of BJP Parliamentary…
— Kiren Rijiju (@KirenRijiju) April 27, 2026
રિજિજુએ આમ આદમી પાર્ટીના બળવાખોર સાંસદોની પ્રશંસા કરતાં કહ્યું કે, “મેં લાંબા સમયથી જોયું છે કે આ 7 માનનીય સાંસદોએ ક્યારેય અપશબ્દોનો ઉપયોગ કર્યો નથી અને ન તો ક્યારેય અનુશાસનહીનતા કે અસંસદીય વર્તન કર્યું છે.” કેન્દ્રીય મંત્રીએ આ સાંસદોનું સ્વાગત કરતાં કહ્યું કે પ્રધાનમંત્રી નરેન્દ્ર મોદીના દૂરદર્શી નેતૃત્વ હેઠળ રાષ્ટ્ર નિર્માણ કરનાર NDAમાં તમારું સ્વાગત છે અને ટુકડે-ટુકડે INDI ગઠબંધનને અલવિદા.
AAP એ રાજ્યસભાના અધ્યક્ષને પત્ર લખ્યો
આમ આદમી પાર્ટીના સાંસદ સંજય સિંહે રાજ્યસભાના અધ્યક્ષ સી.પી. રાધાકૃષ્ણનને ચિઠ્ઠી લખી હતી, જેમાં તેમણે રાઘવ ચઢ્ઢા અને સંદીપ પાઠક સહિત AAP છોડનાર તમામ સાંસદોને અયોગ્ય જાહેર કરવાની માંગ કરી હતી. ચિઠ્ઠીમાં આગળ જણાવાયું હતું કે AAPના સાતેય સાંસદોએ લીધેલું આ પગલું પક્ષપલટો સમાન છે. આ પંજાબની જનતા અને ભારતના બંધારણ સાથે વિશ્વાસઘાત છે. તેમણે કહ્યું કે જરૂર પડશે તો આમ આદમી પાર્ટી આ મામલે કાનૂની પગલાં પણ લેશે.
રાજ્યસભામાં AAPના હવે માત્ર ત્રણ સાંસદ રહ્યા
જોકે, રાજ્યસભા સચિવાલયે હવે સૂચના જાહેર કરી દીધી છે, જેમાં AAPના તમામ બાગી સાંસદોને ભારતીય જનતા પાર્ટીમાં જોડાવાની મંજૂરી મળી ગઈ છે. હવે ઉપલા ગૃહમાં આમ આદમી પાર્ટીના માત્ર ત્રણ જ સાંસદ બાકી રહ્યા છે. આમાં સંજય સિંહ, એન.ડી. ગુપ્તા અને બલબીર સિંહ સીચેવાલનો સમાવેશ થાય છે.
આ પણ વાંચો: AAPને ઝટકો, રાજ્યસભાના અધ્યક્ષની 7 સાંસદોની ભાજપમાં એન્ટ્રીને મંજૂરી
