મેસ્સીના કાર્યક્રમમાં બબાલ બાદ આયોજકની ધરપકડ

કોલકાતામાં આર્જેન્ટિનાના સ્ટાર ફૂટબોલર લિયોનેલ મેસ્સીના કાર્યક્રમમાં થયેલી ભારે અંધાધૂંધી અંગે પશ્ચિમ બંગાળના ડીજીપી રાજીવ કુમારે જણાવ્યું હતું કે કાર્યક્રમના મુખ્ય આયોજક સતાદ્રુ દત્તાની પોલીસે અટકાયત કરી છે. સોલ્ટ લેક સ્ટેડિયમમાં પરિસ્થિતિ હવે નિયંત્રણમાં છે. તેમણે એક પત્રકાર પરિષદમાં જણાવ્યું હતું કે કાર્યક્રમનું આયોજન કરનારાઓ તરફથી ગેરવહીવટ થઈ હતી. રાજ્ય સરકારે આ બાબતની તપાસ માટે એક સમિતિની રચના કરી છે. સમિતિ પરિસ્થિતિ પર નજીકથી નજર રાખી રહી છે.

અંધાધૂંધી માટે જવાબદાર લોકોને સજા કરવામાં આવશે: જાવેદ શમીમ

પશ્ચિમ બંગાળના અધિક પોલીસ મહાનિર્દેશક (એડીજી) કાયદો અને વ્યવસ્થા જાવેદ શમીમે મેસ્સીના કાર્યક્રમમાં થયેલી અંધાધૂંધી અંગે જણાવ્યું હતું કે, “પરિસ્થિતિ હવે સામાન્ય છે. બીજું પાસું તપાસનું છે, જેમાં એફઆઈઆર નોંધવામાં આવી છે અને મુખ્ય આયોજક સતાદ્રુ દત્તાની ધરપકડ કરવામાં આવી છે. આયોજકે ખાતરી આપી છે કે તેઓ ચાહકોના ટિકિટના પૈસા પરત કરશે અને અમે જોઈશું કે આ કેવી રીતે થઈ શકે.”

તેમણે કહ્યું, “સ્થાનિક વિસ્તારમાં ટ્રાફિક સામાન્ય છે. લોકો પોતાના ઘરે પાછા ફર્યા છે. આ એક મોટી ઘટના છે જે સોલ્ટ લેક સ્ટેડિયમ પૂરતી મર્યાદિત હતી અને સ્થાનિક સ્તરે જ બની હતી. અમે અમારા તરફથી કામ કરી રહ્યા છીએ અને ખાતરી કરીશું કે આજે સોલ્ટ લેક સ્ટેડિયમમાં જે બન્યું તેના માટે જવાબદાર લોકોને સજા થાય અને સંબંધિત અધિકારીઓ સામે યોગ્ય કાર્યવાહી થાય.”