Election Commission Suspends 6 Officers: ઉત્તર પ્રદેશ વિધાન પરિષદની ચૂંટણી દરમિયાન ગંભીર બેદરકારી દાખવનાર અધિકારીઓ સામે ચૂંટણી પંચે લાલ આંખ કરી છે. આગ્રા ડિવિઝનલ કમિશનરના અહેવાલના આધારે પંચે ચૂંટણી પ્રક્રિયામાં લાપરવાહી દાખવનાર 6 વરિષ્ઠ સુપરવાઇઝરી અધિકારીઓને તાત્કાલિક અસરથી સસ્પેન્ડ કરી દીધા છે. આ સાથે જ આગ્રા ડિવિઝન શિક્ષક મતવિસ્તારના વિવાદાસ્પદ મતદાન મથકો 20, 21 અને 26 પર થયેલું મતદાન રદબાતલ જાહેર કરવામાં આવ્યું છે. સપા સમર્થિત ઉમેદવાર અને આઉટગોઇંગ એમએલસી ડૉ. આકાશ અગ્રવાલ દ્વારા બૂથ કેપ્ચરિંગ અને ગેરરીતિના આક્ષેપો કરવામાં આવ્યા બાદ ચૂંટણી પંચ દ્વારા આ કડક પગલું ભરવામાં આવ્યું છે.
ચૂંટણી પંચની સખ્તીથી પ્રશાસનમાં દોડધામ
ચૂંટણી પંચે સ્પષ્ટ શબ્દોમાં જણાવ્યું છે કે મતદાન મથકોની આસપાસ યોગ્ય દેખરેખ અને નિયંત્રણ રાખવામાં નિષ્ફળ રહેલા અધિકારીઓની આ ગંભીર બેદરકારી છે, જેને કોઈપણ સંજોગોમાં માફ કરી શકાય નહીં. પંચના આદેશ અનુસાર, મતદાન મથક નંબર 21 (ક્ષેત્ર પંચાયત કાર્યાલય, સૈયાં) અને મતદાન મથક નંબર 26 (ક્ષેત્ર પંચાયત કાર્યાલય, ફતેહાબાદ) પર ફરજ બજાવતા સેક્ટર મેજિસ્ટ્રેટ અને પોલીસ અધિકારીઓ સહિત 6 વરિષ્ઠ અધિકારીઓને સસ્પેન્ડ કરાયા છે. સસ્પેન્ડ કરાયેલા અધિકારીઓમાં OP Chak, ઇન્સ્પેક્ટર હરિશરણ સિંહ, સબ-ઇન્સ્પેક્ટર સંદીપ કુમાર, વિશાલ રાઠોડ, ઇન્સ્પેક્ટર પુરુષોત્તમ પાલ અને સબ-ઇન્સ્પેક્ટર સુમિત ત્યાગીનો સમાવેશ થાય છે.
ચાર્જશીટ દાખલ કરવાના આદેશ
માત્ર સસ્પેન્શન જ નહીં, પરંતુ ચૂંટણી પંચે આ તમામ 6 અધિકારીઓને તાત્કાલિક ચાર્જશીટ જારી કરી છે અને 10 દિવસની અંદર તપાસ માટે ચાર્જશીટનો ડ્રાફ્ટ મોકલવાનો આદેશ આપ્યો છે. આ ઉપરાંત, મતદાન મથકો 21 અને 26 પર તૈનાત અન્ય 5 ચૂંટણી અધિકારીઓ તથા 16 પોલીસ અધિકારીઓ (જેમાં 5 હેડ કોન્સ્ટેબલ અને 11 કોન્સ્ટેબલ સામેલ છે) વિરુદ્ધ પણ શિસ્તભંગના પગલાં લેવામાં આવ્યા છે. પંચે આ તમામ મામલે તાત્કાલિક અનુપાલન અહેવાલ (Compliance Report) રજૂ કરવા તાકીદ કરી છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
બૂથ કેપ્ચરિંગ અને હેરાફેરીના આક્ષેપો બાદ લેવાયા કડક પગલાં
ઉત્તર પ્રદેશ વિધાન પરિષદની દ્વિવાર્ષિક ચૂંટણી અંતર્ગત શુક્રવારે આગ્રા ડિવિઝન શિક્ષક મતવિસ્તારના મતદાન મથકો 20, 21 અને 26 પર મતદાન યોજાયું હતું. આ મતદાન દરમિયાન ભારે હોબાળો મચ્યો હતો અને સમાજવાદી પાર્ટીના સમર્થિત ઉમેદવાર ડૉ. આકાશ અગ્રવાલે બૂથ કેપ્ચરિંગ તથા મતદાર હેરાફેરીના ગંભીર આક્ષેપો કર્યા હતા. આ મામલે ડિવિઝનલ કમિશનરે તપાસ કરીને રિપોર્ટ સોંપ્યો હતો, જેના આધારે ચૂંટણી પંચે આ ત્રણેય મતદાન મથકો પર થયેલું મતદાન રદ કરી દીધું છે અને આગામી સમયમાં ફરીથી ચૂંટણી યોજવાની તૈયારીઓ શરૂ કરી દીધી છે.
