Mathura Honor Killing Case: ઉત્તર પ્રદેશના મથુરા જિલ્લામાંથી એક અત્યંત હચમચાવી નાખતી અને રૂંવાડા ઉભા કરી દે તેવી ઘટના સામે આવી છે. મથુરાના ગોવિંદ નગર પોલીસ સ્ટેશન વિસ્તાર અંતર્ગત આવતી નવી બસ્તીમાં રહેતી નાઝિયા નામની યુવતીની તેના જ સગા પરિવારના સભ્યો દ્વારા ગળું દબાવીને નિર્દયતાપૂર્વક હત્યા કરી દેવામાં આવી હતી. આટલું જ નહીં, પરિવારજનોએ કોઈને શંકા ન જાય તે માટે તેના મૃતદેહને ગુપ્ત રીતે કબ્રસ્તાનમાં દફનાવી પણ દીધો હતો. યુવતીએ પરિવારની મરજી વિરુદ્ધ પોતાના પ્રેમી રવિન્દ્ર સાથે લગ્ન કર્યા હોવાના રોષમાં પરિવારે આ ખૌફનાક પગલું ભર્યું હોવાનું બહાર આવ્યું છે.

પતિ દ્વારા દાખલ કરાયેલી ઝીરો એફઆઈઆરથી ખુલાસો

રાજસ્થાનના ઝુનઝુનુ જિલ્લાના પચેરી કલાન ગામના રહેવાસી અને મૃતક યુવતીના પતિ રવિન્દ્ર દ્વારા પોલીસમાં અપહરણની ઝીરો એફઆઈઆર (Zero FIR) દાખલ કરાવ્યા બાદ આ સમગ્ર પ્રકરણનો પર્દાફાશ થયો હતો. સિટી મેજિસ્ટ્રેટ અનુપમ મિશ્રાના કડક આદેશ અનુસાર, ગોવિંદ નગર પોલીસે ત્વરિત કાર્યવાહી કરીને નવી બસ્તીના કબ્રસ્તાનમાંથી દફનાવવામાં આવેલો નાઝિયાનો મૃતદેહ બહાર કઢાવ્યો હતો અને મુખ્ય આરોપી ભાઈ અકરમની ધરપકડ કરી લીધી હતી.

પ્રેમી સાથે દિલ્હીમાં વસવાટ અને લગ્નના ખોટા વાયદા

પ્રાપ્ત માહિતી અનુસાર, ઘટનાથી લગભગ 1.5 મહિના અગાઉ નાઝિયા પોતાના પ્રેમી રવિન્દ્ર સાથે ઘરેથી ભાગી ગઈ હતી અને ત્યારબાદ બંનેએ કાનૂની લગ્ન કરીને દિલ્હીમાં રહેવા લાગ્યા હતા. પરંતુ ઘટનાના લગભગ 15 દિવસ પછી, નાઝિયાના પરિવારજનોએ ફોન કરીને તેને વિશ્વાસ અપાવ્યો કે તેઓ આ સંબંધ સ્વીકાર કરે છે અને ભવ્ય લગ્ન કરાવી આપશે. આ મીઠી વાતોમાં આવીને નાઝિયા જ્યારે પોતાના પિયર પરત ફરી, ત્યારે પરિવારજનોએ વિશ્વાસઘાત કરીને તેનું ગળું દબાવીને મોતને ઘાટ ઉતારી દીધી અને આકસ્મિક મૃત્યુ ખપાવીને લાશને દફનાવી દીધી.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પતિની શંકા અને પોલીસ પૂછપરછમાં મોટો ઘટસ્ફોટ

જ્યારે નાઝિયાના પિયરવાળાઓએ રવિન્દ્ર સાથે વાત કરવાનું બંધ કરી દીધું અને ફોન ઉપાડવાનું ટાળવા લાગ્યા, ત્યારે પતિને ગંભીર શંકા ગઈ. તેણે રાજસ્થાનમાં પત્નીના અપહરણની ફરિયાદ નોંધાવી. પોલીસે ટેક્નિકલ સર્વેલન્સ અને કડક તપાસ હાથ ધરી ત્યારે નાઝિયાના ભાઈ અકરમે પૂછપરછ દરમિયાન હત્યાની કબૂલાત કરી હતી. એસપી સિટી રાજીવ કુમારે મીડિયાને વિગતો આપતા જણાવ્યું હતું કે ઝુનઝુનુ જિલ્લામાં નોંધાયેલી ફરિયાદના આધારે મેજિસ્ટ્રેટની હાજરીમાં લાશ બહાર કઢાઈ છે. હાલ પોલીસ આ જઘન્ય હત્યાકાંડમાં સામેલ અન્ય ફરાર પરિવારજનોની સઘન શોધખોળ કરી રહી છે અને કાયદેસરની કઠોર કાર્યવાહી ચાલુ છે.

આ પણ વાંચો: પંજાબમાં AAPનાં સરપંચના દીકરાની ધોળા દિવસે ગોળી મારી હત્યા! ગુરુદ્વારામાં માથું ટેકવા ગયો હતો, મિત્ર પણ ઘાયલ