શેરબજાર દબાણમાં: સેન્સેક્સ 380 પોઇન્ટ તૂટ્યો, નિફ્ટી 23,800ની નીચે
Stock Market: ભારતીય શેરબજારમાં સોમવાર, 7 સપ્ટેમ્બરના બિઝનેસમાં ફરી વેચવાલી જોવા મળી હતી. વૈશ્વિક બજારોમાંથી મળેલા નબળા સંકેતો, અમેરિકામાં વ્યાજદર વધવાની આશંકા, મોંઘું ક્રૂડ ઓઇલ અને અમેરિકા-ઈરાન વચ્ચે વધતા તણાવના કારણે રોકાણકારો સાવચેત રહ્યા હતા. દિવસના અંતે સેન્સેક્સ લગભગ 380 પોઇન્ટના ઘટાડા સાથે બંધ થયો હતો, જ્યારે નિફ્ટી 50 મહત્ત્વના 23,800ના સ્તરની નીચે બંધ થયો હતો. દિવસ દરમિયાન એક સમયે સેન્સેક્સમાં 500 પોઇન્ટથી વધુનો ઘટાડો જોવા મળ્યો હતો.
IT શેરોએ બજારને સૌથી વધુ નીચે ખેંચ્યું
સોમવારના ટ્રેડિંગમાં IT સેક્ટરમાં સૌથી વધુ વેચવાલી જોવા મળી. ઈન્ફોસિસ, ટેક મહિન્દ્રા સહિતના મોટા ટેક્નોલોજી શેરો દબાણમાં રહ્યા હતા. નિફ્ટી આઈટી ઇન્ડેક્સમાં 2 ટકાથી વધુનો ઘટાડો નોંધાયો હતો. ઈન્ફોસિસ દિવસના મોટા લૂઝર્સમાં સામેલ રહ્યો હતો. ભારતીય આઈટી કંપનીઓની અમેરિકન બજાર પર મોટી નિર્ભરતા હોવાથી અમેરિકામાં ઊંચા વ્યાજદરની આશંકાએ સેક્ટર પર દબાણ વધાર્યું હતું.
ક્રૂડ ઓઇલ $97ની નજીક
ભારત માટે બીજી મોટી ચિંતા ક્રૂડ ઓઇલના ઊંચા ભાવ છે. Brent Crude લગભગ 97 ડોલર પ્રતિ બેરલની નજીક પહોંચ્યું છે. ભારત પોતાની જરૂરિયાતનું મોટાભાગનું ક્રૂડ ઓઇલ આયાત કરે છે. તેથી ક્રૂડ મોંઘું થાય તો આયાત બિલ વધે, રૂપિયો દબાણમાં આવે અને મોંઘવારી વધવાની આશંકા ઊભી થાય છે.
અમેરિકા-ઈરાન તણાવથી રોકાણકારો સાવચેત
અમેરિકા અને ઈરાન વચ્ચે વધતા જિયોપોલિટિકલ તણાવને કારણે પણ બજારનું સેન્ટિમેન્ટ ખરાબ થયું છે. મિડલ ઈસ્ટમાં સ્થિતિ વધુ ગંભીર બને તો વૈશ્વિક ઓઇલ સપ્લાય પર અસર થવાની આશંકા છે. આ કારણે ક્રૂડ ઓઇલના ભાવમાં વધુ તેજી આવી શકે છે, જે ભારત જેવા ઓઇલ આયાતકાર દેશ માટે નકારાત્મક પરિબળ છે.
વિદેશી રોકાણકારોની વેચવાલી પણ ચિંતા
ફોરેન ઈન્સ્ટીટ્યુશનલ ઈનવેસ્ટમેન્ટ એટલે કે FII દ્વારા ભારતીય શેરોમાં વેચવાલી ચાલુ રહેવી પણ બજાર માટે દબાણનું કારણ બની છે. અગાઉના સેશનમાં વિદેશી રોકાણકારોએ લગભગ 3,111 કરોડ રૂપિયાના શેરોની નેટ વેચવાલી કરી હતી. વૈશ્વિક સ્તરે વ્યાજદર અને જિયોપોલિટિકલ અનિશ્ચિતતા વધે ત્યારે વિદેશી રોકાણકારો ઉભરતા બજારોમાંથી મૂડી પાછી ખેંચતા હોય છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
ફાર્મા શેરોએ આપી થોડી રાહત
મોટાભાગના સેક્ટરમાં વેચવાલી વચ્ચે ફાર્મા સેક્ટરે સારું પ્રદર્શન કર્યું હતું. નિફ્ટી ફાર્મા લીલા નિશાનમાં રહ્યો અને બજારમાં મોટો ઘટાડો હોવા છતાં કેટલાક હેલ્થકેર શેરોમાં ખરીદી જોવા મળી. એપોલો હોસ્પિટલ્સ દિવસના મજબૂત નિફ્ટી શેરોમાં સામેલ રહ્યો હતો.
