Market Capitalization Of The Country’s Top 10 Companies Fell: વિતેલા અઠવાડિયે ભારતીય શેરબજારમાં આવેલી ભારે વેચવાલીના કારણે દેશની 10 સૌથી મૂલ્યવાન લિસ્ટેડ કંપનીઓમાંથી 8 કંપનીઓના સંયુક્ત માર્કેટ કેપમાં ₹1.55 લાખ કરોડથી વધુનો મોટો ઘટાડો નોંધાયો છે. રજાઓના કારણે ટૂંકા રહેલા આ ટ્રેડિંગ અઠવાડિયા દરમિયાન સેન્સેક્સ 1,605.44 પોઈન્ટ (2.15 ટકા) અને નિફ્ટી 546.15 પોઈન્ટ (2.36 ટકા) ગગડ્યો હતો. બજારની આ વ્યાપક નબળાઈના કારણે BSE-લિસ્ટેડ તમામ કંપનીઓનું કુલ મૂલ્યાંકન ચાર ટ્રેડિંગ સત્રોમાં ₹20.79 લાખ કરોડ ઘટીને 16 ઓક્ટોબર ના રોજ નોંધાયેલા ₹472.62 લાખ કરોડથી નીચે આવીને ₹451.83 લાખ કરોડ પર પહોંચી ગયું હતું.

HDFC બેંક અને બજાજ ફાઈનાન્સના મૂલ્યાંકનમાં ગાબડું

માર્કેટ કેપમાં ઘટાડાની દ્રષ્ટિએ ખાનગી ક્ષેત્રની દમદાર HDFC બેંકને સૌથી મોટો ફટકો પડ્યો છે. અઠવાડિયા દરમિયાન બેંકના શેરમાં લગભગ 5 ટકાનો ઘટાડો થતાં તેનું બજાર મૂડીકરણ ₹55,506.95 કરોડ ઘટીને ₹10.67 લાખ કરોડ થઈ ગયું હતું. ઘટાડાના સંદર્ભમાં બજાજ ફાઇનાન્સ બીજા ક્રમે રહ્યું, જેનું મૂલ્યાંકન ₹34,180.51 કરોડ ઘટીને ₹5.77 લાખ કરોડ રહ્યું હતું. દેશની અગ્રણી કંપની રિલાયન્સ ઇન્ડસ્ટ્રીઝના મૂલ્યાંકનમાં પણ ₹27,065.08 કરોડનો મોટો કડાકો બોલાતા તે ₹16.10 લાખ કરોડ પર આવી ગયું હતું.

LIC, ભારતી એરટેલ અને IT ક્ષેત્રની દિગ્ગજ કંપનીઓની ચમક ઘટી

આ કડાકામાં લાઈફ ઈન્સ્યોરન્સ કોર્પોરેશન ઓફ ઈન્ડિયા (LIC) નું મૂલ્યાંકન ₹21,062.24 કરોડ ઘટીને ₹4.81 લાખ કરોડ થયું હતું. ટેલિકોમ ક્ષેત્રની મજબૂત કંપની ભારતી એરટેલનું માર્કેટ કેપ ₹9,360.75 કરોડ ઘટીને ₹11.79 લાખ કરોડ તથા સ્ટેટ બેંક ઓફ ઈન્ડિયા (SBI) નું મૂલ્યાંકન ₹4,338.46 કરોડ ઘટીને ₹8.83 લાખ કરોડ નોંધાયું હતું. વધુમાં, ઇન્ફોસિસનું બજાર મૂડીકરણ ₹2,881.38 કરોડ ઘટીને ₹4.69 લાખ કરોડ અને ICICI બેંકનું માર્કેટ કેપ ₹1,276.53 કરોડ ઘટીને ₹10.02 લાખ કરોડ થઈ ગયું હતું. ટોચની 8 કંપનીઓને મળીને કુલ ₹155,671.9 કરોડનું નુકસાન વેઠવું પડ્યું હતું.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

TCS અને L&T ના રોકાણકારોની સંપત્તિમાં વધારો

શેરબજારના આ નકારાત્મક વલણ અને ચોતરફી વેચવાલી વચ્ચે પણ દેશની બે મોટી દિગ્ગજ કંપનીઓએ વિપરીત પ્રવાહમાં તરતા રહીને પોતાના મૂલ્યાંકનમાં વધારો નોંધાવ્યો હતો. આઈટી ક્ષેત્રની અગ્રણી કંપની ટાટા કન્સલ્ટન્સી સર્વિસીસ (TCS) નું બજાર મૂડીકરણ ₹23,517.56 કરોડ વધીને ₹9.15 લાખ કરોડના સ્તરે પહોંચી ગયું હતું. આ ઉપરાંત, એન્જિનિયરિંગ અને ઇન્ફ્રાસ્ટ્રક્ચર ક્ષેત્રની માતબર કંપની લાર્સન એન્ડ ટુબ્રો (L&T) નું માર્કેટ કેપ પણ ₹1,788.66 કરોડના સુધારા સાથે ₹5.02 લાખ કરોડ થઈ ગયું હતું.

આ પણ વાંચો: કંપનીઓનો ઝડપથી વધી રહ્યો છે વ્યવસાય, તો નવા લોકોને કેમ નથી આપી રહ્યા નોકરી?