Rain Weather Forecast  : ગુજરાતમાં ચોમાસાની વિદાયની પ્રક્રિયા શરૂ થઈ ગઈ છે, પરંતુ આગામી બે દિવસ દરમિયાન રાજ્યના કેટલાક વિસ્તારોમાં ફરી વરસાદી માહોલ જોવા મળી શકે છે. હવામાન વિભાગે 29 સપ્ટેમ્બર અને 30 સપ્ટેમ્બરના રોજ રાજ્યના વિવિધ વિસ્તારોમાં હળવાથી મધ્યમ વરસાદની શક્યતા વ્યક્ત કરી છે. ખાસ કરીને 30 સપ્ટેમ્બરે વરસાદની તીવ્રતા વધવાની સંભાવના છે.

હવામાન વિભાગના જણાવ્યા પ્રમાણે, હાલમાં ગુજરાતમાં દક્ષિણ-પશ્ચિમથી પશ્ચિમ દિશાના પવનો ફૂંકાઈ રહ્યા છે. ચોમાસાની વિદાયની રેખા ગુરદાસપુર, ચંદીગઢ, મુઝફ્ફરનગર, અલીગઢ, ધોલપુર, ઉદયપુર, ડીસા અને નલિયા પરથી પસાર થઈ રહી છે. જેના કારણે રાજ્યમાંથી ચોમાસાની વિદાયની પ્રક્રિયા આગળ વધી રહી છે, છતાં કેટલાક વિસ્તારોમાં વરસાદની સ્થિતિ બની શકે છે.

29 સપ્ટેમ્બરે દક્ષિણ ગુજરાતના કેટલાક વિસ્તારોમાં ગાજવીજ સાથે વરસાદ પડવાની શક્યતા છે. આ દરમિયાન છૂટાછવાયા વિસ્તારોમાં હળવાથી મધ્યમ વરસાદની સ્થિતિ જોવા મળી શકે છે.

30 સપ્ટેમ્બરે વરસાદનું જોર વધવાની શક્યતા

હવામાન વિભાગની આગાહી પ્રમાણે 30 સપ્ટેમ્બરે રાજ્યના અનેક વિસ્તારોમાં વરસાદની પ્રવૃત્તિ વધી શકે છે. કચ્છ, વાવ-થરાદ, બનાસકાંઠા, પાટણ, જામનગર, દ્વારકા, પોરબંદર, જૂનાગઢ, રાજકોટ, અમરેલી, ભાવનગર અને ગીર સોમનાથ સહિતના વિસ્તારોમાં છૂટાછવાયા સ્થળોએ હળવાથી મધ્યમ વરસાદની શક્યતા છે. દક્ષિણ ગુજરાતના કેટલાક વિસ્તારોમાં પણ વરસાદ પડી શકે છે.

1 ઓક્ટોબરે પણ કેટલાક વિસ્તારોમાં વરસાદ

1 ઓક્ટોબરે કચ્છ, વાવ-થરાદ, બનાસકાંઠા અને પાટણ ઉપરાંત પોરબંદર, જૂનાગઢ, ગીર સોમનાથ, અમરેલી અને ભાવનગરમાં કેટલાક સ્થળોએ વરસાદની શક્યતા વ્યક્ત કરવામાં આવી છે. દક્ષિણ ગુજરાતના કેટલાક વિસ્તારોમાં પણ હળવાથી મધ્યમ વરસાદ પડી શકે છે.

મ્યાનમાર તરફ હવામાન સિસ્ટમ સક્રિય

હવામાન વિભાગના અહેવાલ મુજબ ઉત્તર આંદામાન સમુદ્ર અને મ્યાનમારના દરિયાકાંઠા નજીક બનેલું ડીપ ડિપ્રેશન 28 સપ્ટેમ્બરે મ્યાનમારના દરિયાકાંઠાને પાર કરી ચૂક્યું છે. તે સમયે સિસ્ટમ સાથે મહત્તમ સતત પવનની ઝડપ 50થી 60 કિલોમીટર પ્રતિ કલાક હતી, જ્યારે ઝાપટાની ઝડપ 70 કિલોમીટર પ્રતિ કલાક સુધી પહોંચી હતી. આ સિસ્ટમ ઉત્તર-ઉત્તરપશ્ચિમ દિશામાં આગળ વધવાની શક્યતા છે.

2થી 4 ઓક્ટોબર સુધી વાતાવરણ શુષ્ક

હવામાન વિભાગના અનુમાન પ્રમાણે 2થી 4 ઓક્ટોબર દરમિયાન ગુજરાતમાં વરસાદની કોઈ આગાહી નથી. આ સમયગાળા દરમિયાન સમગ્ર રાજ્યમાં હવામાન મુખ્યત્વે શુષ્ક રહેવાની શક્યતા છે. એટલે કે સપ્ટેમ્બરના અંતમાં વરસાદી પ્રવૃત્તિ વધ્યા બાદ ઓક્ટોબરની શરૂઆતમાં રાજ્યમાં ફરી વરસાદનું જોર ઘટી શકે છે.

આ પણ વાંચો : ટાટા ગ્રુપમાં મોટા મર્જરની તૈયારી, ટાટા સન્સને લિસ્ટિંગથી બચાવશે ટ્રસ્ટ્સનો પ્લાન