ગુજરાતમાં ગરમીનો પ્રકોપ યથાવત, રાજકોટ 39.8 ડિગ્રી સાથે રાજ્યનું સૌથી ગરમ શહેર બન્યું

weather-forecast:   ગુજરાતમાં ઓક્ટોબર મહિનામાં પણ ગરમીનો પ્રકોપ યથાવત છે. હવામાન વિભાગની આગાહી મુજબ, રાજ્યમાં આગામી સાત દિવસ દરમિયાન મહત્તમ અને લઘુત્તમ તાપમાનમાં મોટા ફેરફારની શક્યતા નથી. બપોરના સમયે ગરમીનો અહેસાસ ચાલુ રહેશે, જ્યારે રાત્રે અને વહેલી સવારે કેટલીક જગ્યાએ હળવી ઠંડક અનુભવાશે. છેલ્લા 24 કલાક દરમિયાન સૌરાષ્ટ્ર અને દક્ષિણ ગુજરાતમાં મહત્તમ તાપમાન સામાન્ય કરતાં ઊંચું નોંધાયું હતું. બીજી તરફ, સૌરાષ્ટ્ર-કચ્છના દરિયાકાંઠાના વિસ્તારોમાં લઘુત્તમ તાપમાન સામાન્ય કરતાં નીચું રહ્યું હતું. પરિણામે, દરિયાકાંઠાના કેટલાક વિસ્તારોમાં રાત્રિના સમયે પ્રમાણમાં ઠંડક અનુભવાઈ રહી છે.

રાજકોટ 39.8 ડિગ્રી સાથે સૌથી ગરમ

13 ઓક્ટોબર, 2026ના રોજ નોંધાયેલા મહત્તમ તાપમાનમાં રાજકોટ 39.8 ડિગ્રી સાથે રાજ્યનું સૌથી ગરમ શહેર રહ્યું હતું. અન્ય શહેરોના તાપમાન પર નજર કરીએ તો ડીસામાં 38.8, પોરબંદરમાં 38.6, ભુજ અને વેરાવળમાં 38.2, સુરેન્દ્રનગરમાં 37.8 અને કેશોદમાં 37.5 ડિગ્રી તાપમાન નોંધાયું હતું. અમદાવાદમાં મહત્તમ તાપમાન 36.8 ડિગ્રી, જ્યારે વડોદરા, સુરત અને મહુવામાં 36.6 ડિગ્રી નોંધાયું હતું. ભાવનગરમાં 36, વલ્લભ વિદ્યાનગરમાં 35.9, ગાંધીનગરમાં 35.8, કંડલા પોર્ટમાં 35.5 અને નલિયામાં 34.6 ડિગ્રી તાપમાન રહ્યું હતું. દરિયાકાંઠાના વિસ્તારોમાં તાપમાન પ્રમાણમાં ઓછું નોંધાયું હતું. દ્વારકામાં મહત્તમ તાપમાન 31.4 અને ઓખામાં 31.3 ડિગ્રી રહ્યું હતું.

પોરબંદરમાં લઘુત્તમ તાપમાન 21 ડિગ્રી

રાજ્યમાં લઘુત્તમ તાપમાનની વાત કરીએ તો પોરબંદર 21 ડિગ્રી સાથે સૌથી ઠંડું શહેર રહ્યું હતું. કેશોદમાં 21.3, નલિયામાં 21.5, અમરેલીમાં 21.6 અને ગાંધીનગરમાં 22 ડિગ્રી લઘુત્તમ તાપમાન નોંધાયું હતું. મહુવામાં 22.3, ભુજમાં 22.8 અને રાજકોટમાં 23 ડિગ્રી તાપમાન રહ્યું હતું. વડોદરામાં 23.2, અમદાવાદ અને સુરતમાં 23.4, વલ્લભ વિદ્યાનગરમાં 23.8 તથા ભાવનગરમાં 24 ડિગ્રી લઘુત્તમ તાપમાન નોંધાયું હતું. ઓખામાં 24, દ્વારકામાં 24.2, વેરાવળ અને કંડલા પોર્ટમાં 24.6, જ્યારે સુરેન્દ્રનગરમાં 25 ડિગ્રી લઘુત્તમ તાપમાન નોંધાયું હતું.

અમદાવાદમાં આજે 37 ડિગ્રી સુધી ગરમીની શક્યતા

અમદાવાદમાં આજે આકાશ મુખ્યત્વે સ્વચ્છ રહેવાની શક્યતા છે. શહેરમાં મહત્તમ તાપમાન 37 ડિગ્રી અને લઘુત્તમ તાપમાન 24 ડિગ્રીની આસપાસ રહી શકે છે. બપોરના સમયે ગરમીથી ખાસ રાહત મળવાની શક્યતા ઓછી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

રાજકોટમાં મહત્તમ તાપમાન 38 ડિગ્રી રહેવાની આગાહી

રાજકોટમાં આજે આકાશ સામાન્ય રીતે સ્વચ્છ રહેશે. હવામાનની આગાહી મુજબ, શહેરમાં મહત્તમ તાપમાન 38 ડિગ્રી અને લઘુત્તમ તાપમાન 24 ડિગ્રીની આસપાસ રહી શકે છે.

સુરત અને વડોદરામાં પણ ગરમી યથાવત

સુરતમાં આજે આકાશ મુખ્યત્વે સ્વચ્છ રહેવાની શક્યતા છે. અહીં મહત્તમ તાપમાન 37 ડિગ્રી અને લઘુત્તમ તાપમાન 24 ડિગ્રીની આસપાસ રહેવાનું અનુમાન છે. વડોદરામાં પણ સામાન્ય રીતે આકાશ સ્વચ્છ રહેશે. શહેરમાં મહત્તમ તાપમાન 37 ડિગ્રી અને લઘુત્તમ તાપમાન 23 ડિગ્રીની આસપાસ રહી શકે છે. હવામાન વિભાગની આગાહી મુજબ, આગામી સાત દિવસ દરમિયાન તાપમાનમાં મોટા ફેરફારની શક્યતા ન હોવાથી રાજ્યના લોકોને બપોરની ગરમીનો સામનો કરવો પડી શકે છે. તેથી બપોરના સમયે બહાર નીકળતી વખતે ગરમીથી બચવા જરૂરી સાવચેતી રાખવી હિતાવહ છે.

આ પણ વાંચો : અમદાવાદમાં જીગરદાનના ગરબામાં તોડફોડ, વડોદરામાં કૈરવી બુચનો જાદુ, રાજકોટમાં તલવાર રાસ