એર ઇન્ડિયાનો મોટો નિર્ણય! 14 નવેમ્બર સુધી સાઉદી અરબની તમામ ફ્લાઈટ રદ કરી

નવી દિલ્હી: સાઉદી અરેબિયામાં પ્રવર્તી રહેલા તણાવપૂર્ણ માહોલ અને સુરક્ષાની ચિંતાઓને ધ્યાનમાં રાખીને એર ઇન્ડિયા અને એર ઇન્ડિયા એક્સપ્રેસે મોટો નિર્ણય લીધો છે. બંને એરલાઇન્સે જેદ્દાહ, રિયાધ અને દમ્મામ માટેની પોતાની તમામ ફ્લાઇટ્સ 14 નવેમ્બર 2026 સુધી અસ્થાયી ધોરણે સ્થગિત કરી દીધી છે. આ નિર્ણયને કારણે સાઉદી અરેબિયા જવા અને ત્યાંથી ભારત આવવા માટે ટિકિટ બુક કરાવનારા મુસાફરોની મુસાફરી યોજનાઓ પર અસર પડી શકે છે. જોકે, એરલાઇન્સે અસરગ્રસ્ત મુસાફરોને રાહત આપતાં મફત રિબુકિંગ અથવા સંપૂર્ણ રિફંડનો વિકલ્પ આપ્યો છે.

ત્રણ શહેરોની ફ્લાઇટ્સ 14 નવેમ્બર સુધી બંધ

એર ઇન્ડિયા અને એર ઇન્ડિયા એક્સપ્રેસે સાઉદી અરેબિયાના ત્રણ મુખ્ય શહેરો જેદ્દાહ, રિયાધ અને દમ્મામથી આવતી-જતી ફ્લાઇટ્સ અસ્થાયી રૂપે બંધ કરવાનો નિર્ણય લીધો છે.

કંપનીઓના જણાવ્યા અનુસાર, મધ્ય પૂર્વમાં ચાલી રહેલી તણાવપૂર્ણ પરિસ્થિતિ અને સુરક્ષાને ધ્યાનમાં રાખીને આ નિર્ણય લેવામાં આવ્યો છે.

એરલાઇન્સે મુસાફરોને સલાહ આપી છે કે એરપોર્ટ જતાં પહેલાં પોતાની ફ્લાઇટની સ્થિતિ સત્તાવાર વેબસાઇટ અથવા કસ્ટમર કેર દ્વારા ચોક્કસપણે ચકાસી લેવી.

મુસાફરોને મળશે ફ્રી રિબુકિંગ અને સંપૂર્ણ રિફંડ

ફ્લાઇટ્સ રદ થવાથી મુસાફરોને મુશ્કેલી ન પડે તે માટે બંને એરલાઇન્સે ખાસ રાહતની જાહેરાત કરી છે.

જે મુસાફરોએ 30 ઓક્ટોબર 2026 અથવા તે પહેલાં ટિકિટ બુક કરાવી છે અને જેમની મુસાફરી 14 નવેમ્બર 2026 સુધી નિર્ધારિત હતી, તેઓ નીચેના વિકલ્પોનો લાભ લઈ શકશે.

• મફત રિબુકિંગ: મુસાફરો એક વખત કોઈ વધારાના ચાર્જ વગર મુસાફરીની તારીખ બદલી શકશે.
• સંપૂર્ણ રિફંડ: ટિકિટ રદ કરાવનાર મુસાફરોને સંપૂર્ણ રિફંડ મળશે.
• નવી મુસાફરીની તારીખ: ઉપલબ્ધ સીટોના આધારે 29 નવેમ્બર 2026 સુધીની મુસાફરી માટે બુકિંગ બદલી શકાશે.

એર ઇન્ડિયા અને એર ઇન્ડિયા એક્સપ્રેસના મુસાફરો માટે અલગ સુવિધા

એર ઇન્ડિયાએ પોતાના મુસાફરોને સાઉદી અરેબિયામાં એર ઇન્ડિયાના કોઈપણ કાર્યરત સ્ટેશન પરથી આવવા-જવા માટે રિબુકિંગની સુવિધા આપી છે.

બીજી તરફ, એર ઇન્ડિયા એક્સપ્રેસના મુસાફરો સાઉદી અરેબિયા અથવા બહેરીનમાં તેના કોઈપણ કાર્યરત સ્ટેશન માટે પોતાની ટિકિટ રિબુક કરાવી શકશે.

આ સુવિધા સીટની ઉપલબ્ધતાને આધીન રહેશે.

રિફંડ અને રિબુકિંગ માટે ક્યાં સંપર્ક કરવો?

જે મુસાફરોની ફ્લાઇટ પ્રભાવિત થઈ છે તેઓ મદદ માટે નીચેના માધ્યમોનો ઉપયોગ કરી શકે છે.

1. એર ઇન્ડિયા અથવા એર ઇન્ડિયા એક્સપ્રેસની કસ્ટમર સર્વિસ ટીમનો સંપર્ક કરી શકે છે.
2. સંબંધિત શહેરોમાં આવેલી એરલાઇન્સની ટિકિટ બુકિંગ ઓફિસની મુલાકાત લઈ શકે છે.
3. બંને એરલાઇન્સની સત્તાવાર વેબસાઇટ પર આપેલા કોલ સેન્ટર નંબર દ્વારા માહિતી મેળવી શકે છે.

મુસાફરોએ પોતાની ટિકિટ અને બુકિંગની વિગતો સાથે રાખવી જરૂરી છે.

સાઉદી અરેબિયામાં હુમલાઓ વચ્ચે લેવાયો નિર્ણય

સાઉદી અરેબિયામાં છેલ્લા કેટલાક દિવસોથી સુરક્ષાની સ્થિતિને લઈને ચિંતા વધી છે. અહેવાલો અનુસાર, ત્યાંના એરપોર્ટ અને અન્ય નાગરિક વિસ્તારોને નિશાન બનાવીને હુમલાઓ કરવામાં આવ્યા છે.

રિયાધ અને દમ્મામના એરપોર્ટ પણ હુમલાના નિશાન બન્યા હોવાના અહેવાલો છે. દમ્મામ એરપોર્ટ પર થયેલા હુમલામાં એક ભારતીય નાગરિકનું મોત થયું હતું, જ્યારે અન્ય બે ભારતીયો ઘાયલ થયા હતા.

આ ઉપરાંત શાયબાહ ઓઇલ ફિલ્ડ પર થયેલા હુમલામાં પણ એક ભારતીય નાગરિક ઘાયલ થયો હોવાની માહિતી સામે આવી છે.

મુસાફરોએ શું ધ્યાન રાખવું?

સાઉદી અરેબિયા જવા અથવા ત્યાંથી ભારત આવવાની યોજના ધરાવતા મુસાફરોએ હાલ પોતાની ફ્લાઇટનું સ્ટેટસ તપાસ્યા વગર એરપોર્ટ તરફ જવું નહીં. ખાસ કરીને જેદ્દાહ, રિયાધ અને દમ્મામની ટિકિટ ધરાવતા મુસાફરોએ એરલાઇન્સનો સંપર્ક કરીને રિબુકિંગ અથવા રિફંડની પ્રક્રિયા અંગે માહિતી મેળવી લેવી જોઈએ.

આ પણ વાંચો: પાકિસ્તાનના કરાચી બંદરે 7 મહિનાથી ફસાયું ભારતીય જહાજ! 6 ભારતીય નાવિકોની હાલત દયનીય