Israel PM Election Result 2026: ઇઝરાયેલમાં યોજાયેલી આંકડાકીય અને રાજકીય રીતે અત્યંત મહત્વપૂર્ણ સામાન્ય ચૂંટણીઓ બાદ હવે મતગણતરીનો દોર અંતિમ તબક્કામાં પહોંચ્યો છે. અત્યાર સુધીમાં 85.6% મતોની ગણતરી પૂર્ણ થઈ ચૂકી છે. પ્રારંભિક પરિણામો અને ઝોક અનુસાર, વડાપ્રધાન બેન્જામિન નેતન્યાહૂના ‘લિકુડ’ ગઠબંધનને 53 બેઠકો મળતી દેખાઈ રહી છે, જ્યારે ગાદી આઇઝનકોટના નેતૃત્વ હેઠળના મુખ્ય વિપક્ષી ગઠબંધનને 48 બેઠકો પર સરસાઈ મળી રહી છે. બંને મુખ્ય હરીફો વચ્ચે માત્ર 5 બેઠકોનું પાતળું અંતર હોવાથી સ્પર્ધા અત્યંત રોમાંચક તબક્કામાં પહોંચી ગઈ છે. ઇઝરાયેલની 120 બેઠકો ધરાવતી સંસદ ‘નેસેટ’ માં બહુમતી માટે 61 બેઠકોનો જાદુઈ આંકડો જરૂરી છે, પરંતુ હાલમાં બંને મુખ્ય દાવેદારો બહુમતીથી દૂર દેખાઈ રહ્યા છે.

રેકોર્ડ 19 બેઠકો સાથે આરબ પક્ષો કિંગમેકરની ભૂમિકામાં

આ ચૂંટણીમાં સૌથી ચોંકાવનારો અને નિર્ણાયક વળાંક આરબ પક્ષોનું પ્રદર્શન રહ્યું છે. મતગણતરીના વર્તમાન આંકડા મુજબ, આરબ પક્ષોનું સંયુક્ત ‘જોઇન્ટ લિસ્ટ’ ગઠબંધન 12 બેઠકો અને ‘રા’આમ’ પક્ષ 7 બેઠકો પર આગળ ચાલી રહ્યો છે, જે બંને મળીને કુલ 19 બેઠકો થાય છે. ઇઝરાયેલના ચૂંટણી ઇતિહાસમાં આરબ પક્ષો દ્વારા મેળવવામાં આવેલો આ અત્યાર સુધીનો સૌથી મોટો આંકડો છે. આ પહેલાં માર્ચ 2020 ની ચૂંટણીમાં આ પક્ષોએ સંયુક્ત રીતે 15 બેઠકો મેળવી હતી. નેતન્યાહૂ કે વિપક્ષ બંનેમાંથી કોઈને પણ સ્પષ્ટ બહુમતી ન મળતી હોવાથી નવી સરકારની રચનામાં આ 19 બેઠકો ધરાવતા આરબ પક્ષો કિંગમેકરની ભૂમિકા ભજવી શકે છે.

સત્તા સ્થાપવા માટે મળશે 42 દિવસનો સમય

ઇઝરાયેલી બંધારણીય પ્રક્રિયા મુજબ ચૂંટણીમાં સૌથી વધુ સફળતા મેળવનાર અથવા બહુમતી સાબિત કરવાની ક્ષમતા ધરાવતા નેતાને રાષ્ટ્રપતિ દ્વારા સરકાર બનાવવાનું નિમંત્રણ આપવામાં આવે છે. ચૂંટાયેલા નેતાને શરૂઆતમાં સરકાર રચવા માટે 28 દિવસનો સમય મળે છે. જો વધુ સમયની જરૂર પડે, તો રાષ્ટ્રપતિ તેમાં 14 દિવસનો વધારો કરી શકે છે, એટલે કે મંત્રીમંડળની રચના અને નીતિગત સમજૂતીઓ માટે કુલ 42 દિવસનો સમય મળી શકે છે. જો કોઈ નેતા 61 બેઠકોનું સીધું સમર્થન ન મેળવી શકે, તો તેઓ નાના પક્ષોના સહયોગથી અલ્પમત સરકાર અથવા બે મુખ્ય નેતાઓ વચ્ચે વારાફરતી વડાપ્રધાન બનવાના કરાર (રોટેશનલ પ્રાઇમ મિનિસ્ટરશિપ) જેવા વિકલ્પો પર વિચાર કરી શકે છે.

રાષ્ટ્રપતિ ઇસાક હરઝોગ સામે ધર્મસંકટ

ચૂંટણી પરિણામોના ત્રિશંકુ વલણો વચ્ચે ઇઝરાયેલના રાષ્ટ્રપતિ ઇસાક હરઝોગની ભૂમિકા અત્યંત મહત્વપૂર્ણ બની ગઈ છે. પ્રારંભિક એક્ઝિટ પૉલમાં કાંટાની ટક્કર દર્શાવાઈ હતી, પરંતુ લિકુડ પક્ષ સૌથી મોટા એકલ પક્ષ તરીકે ઊભરી રહ્યો હોવાથી નેતન્યાહૂ દાવો કરી રહ્યા છે કે સરકાર બનાવવાની પહેલી તક તેમને જ મળવી જોઈએ. જોકે, રાષ્ટ્રપતિ માટે માત્ર સૌથી મોટા પક્ષને જ તક આપવી ફરજિયાત નથી. વર્ષ 2009 માં તત્કાલીન રાષ્ટ્રપતિ શિમોન પેરેજે નેતન્યાહૂને જ સરકાર રચવા આમંત્રણ આપ્યું હતું, જ્યારે લિકુડ પાર્ટીને ‘કદીમા’ પક્ષ કરતાં ઓછી બેઠકો મળી હતી. રાષ્ટ્રપતિ હરઝોગે એ જોવું પડશે કે કયો નેતા અન્ય પક્ષોનું સમર્થન મેળવીને 61 નો આંકડો સ્પર્શવાની સૌથી વધુ ક્ષમતા ધરાવે છે.

નેતન્યાહૂની પાર્ટીનો આરબ પક્ષો પર ગંભીર આક્ષેપ

ચૂંટણીમાં આરબ પક્ષોના મજબૂત પ્રદર્શનથી અસ્વસ્થ થયેલી નેતન્યાહૂની લિકુડ પાર્ટીએ આરબ પક્ષો પર ચૂંટણીમાં મોટા પાયે ગેરરીતિ અને ગોટાળા કરવાનો સનસનાટીભર્યો આરોપ લગાવ્યો છે. લિકુડ પાર્ટીએ દેશની આંતરિક સુરક્ષા એજન્સી ‘શિન બેટ’ અને પોલીસ પાસે આ મામલે તાત્કાલિક તપાસ કરવાની માંગ કરી છે. પાર્ટીનો દાવો છે કે મતદાન દરમિયાન મતદારોને ધમકાવવામાં આવ્યા હતા, હિંસા આચરવામાં આવી હતી અને બોગસ મતદાન કરવામાં આવ્યું હતું. લિકુડ પાર્ટીએ આ અંગેના કેટલાક પુરાવા પણ તપાસ એજન્સીઓને સોંપ્યા હોવાનો દાવો કર્યો છે. જોકે, ઇઝરાયેલના કેન્દ્રીય ચૂંટણી પંચના વરિષ્ઠ અધિકારીઓએ આ તમામ આક્ષેપોને પાયાવિહોણા ગણાવીને ફગાવી દીધા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

જોઇન્ટ લિસ્ટ ગઠબંધનનો રાજકીય ઇતિહાસ

હાલની મતગણતરીમાં 12 બેઠકો મેળવીને દેશની ત્રીજી સૌથી મોટી રાજકીય તાકાત તરીકે ઊભરેલું ‘જોઇન્ટ લિસ્ટ’ ઇઝરાયેલની આરબ વસ્તીના સમાન અધિકારોની વકાલત કરતું ગઠબંધન છે. જેમાં ડાબેરી ‘હદાશ’ પક્ષ, અહમદ તિબીનો ‘તાલ’ પક્ષ અને ધર્મનિરપેક્ષ રાષ્ટ્રવાદી ‘બલદ’ પક્ષ સામેલ છે. વર્ષ 2015 માં પ્રથમ વખત આ ચાર મુખ્ય આરબ પક્ષોએ ભેગા મળીને 13 બેઠકો મેળવી હતી. ત્યારબાદ સપ્ટેમ્બર 2019 માં 13 અને માર્ચ 2020 માં 15 બેઠકો જીતીને શ્રેષ્ઠ પ્રદર્શન કર્યું હતું. માર્ચ 2021 માં રાઅમ પક્ષ અલગ થઈ ગયો હતો અને નવેમ્બર 2022 માં બલદ પક્ષ અલગ લડતાં સંસદમાં પહોંચી શક્યો નહોતો. પરંતુ વર્ષ 2026 ની આ ચૂંટણીમાં હદાશ, તાલ અને બલદ ફરી એક મંચ પર આવ્યા હતા અને તેમણે આ જંગી સફળતા મેળવી છે.

4.8 લાખ સૈનિકો અને રાજદ્વારીઓના મત બાકી

ઇઝરાયેલ ચૂંટણી પંચના જણાવ્યા અનુસાર, હજુ પણ આશરે 4.8 લાખ મતોની ગણતરી બાકી છે. આ વિશિષ્ટ મતોમાં સરહદ પર તૈનાત સૈનિકો, પોલીસકર્મીઓ, જેલમાં બંધ કેદીઓ અને વિદેશોમાં સ્થિત ઇઝરાયેલી એમ્બેસીના રાજદ્વારીઓના મતોનો સમાવેશ થાય છે. આ 4.8 લાખ મતો સંસદની આશરે 12 જેટલી બેઠકોનું ચિત્ર બદલી નાખવાની ક્ષમતા ધરાવે છે. તેથી અંતિમ આંકડાઓ આવ્યા બાદ ચિત્ર વધુ સ્પષ્ટ થશે. ચૂંટણી સમિતિને આશા છે કે સંપૂર્ણ ગણતરીના આંકડા ગુરુવાર બપોર સુધીમાં આવી જશે, જ્યારે ચૂંટણીના સત્તાવાર અંતિમ પરિણામો 4 નવેમ્બરના રોજ જાહેર કરવામાં આવશે.

આ પણ વાંચો: ‘રશિયાને અમેરિકા કરતાં વધુ સારી રીતે સમજીએ છીએ’, ઝેલેન્સ્કીના નિવેદનથી ચર્ચા