Gujarat weather: ગુજરાતમાં ચોમાસાની વિદાયના ટાણે હવે ભાદરવા મહિનાની આકરી ગરમી અને અસહ્ય ઉકળાટનો પ્રારંભ થયો છે. રાજ્યના અનેક વિસ્તારોમાં લોકો પરસેવે રેબઝેબ થઈ રહ્યા છે. બીજી તરફ બફારાભર્યા વાતાવરણ વચ્ચે છેલ્લા 24 કલાક દરમિયાન રાજ્યના 47 તાલુકાઓમાં વરસાદી ઝાપટાં નોંધાયા છે. હવામાનની વર્તમાન સ્થિતિ પ્રમાણે આગામી 24 કલાક દરમિયાન પણ રાજ્યના કેટલાક વિસ્તારોમાં છૂટાછવાયા વરસાદી ઝાપટાં પડવાની સંભાવના છે.

ભુજમાં ગરમીનો પારો 39.5 ડિગ્રીએ પહોંચ્યો

રાજ્યભરમાં ભાદરવી તાપનો પ્રકોપ વધ્યો છે. બુધવારે, 23 સપ્ટેમ્બરે ભુજમાં મહત્તમ તાપમાન 39.5 ડિગ્રી સેલ્સિયસ નોંધાયું હતું. જેના કારણે ભુજવાસીઓ દિવસભર આકરી ગરમીથી પરેશાન રહ્યા હતા.

અન્ય મુખ્ય શહેરોમાં પણ તાપમાન ઊંચું નોંધાયું હતું. રાજકોટમાં 37.5 ડિગ્રી, ભાવનગરમાં 36.8 ડિગ્રી, કંડલામાં 36.5 ડિગ્રી, વડોદરામાં 36.4 ડિગ્રી, અમદાવાદમાં 36.2 ડિગ્રી, ગાંધીનગરમાં 36 ડિગ્રી અને સુરતમાં 34.3 ડિગ્રી સેલ્સિયસ મહત્તમ તાપમાન નોંધાયું હતું.

47 તાલુકામાં વરસાદ, ઊનામાં સૌથી વધુ

ગરમી અને ઉકળાટ વચ્ચે રાજ્યના અનેક વિસ્તારોમાં વરસાદી ઝાપટાં પણ પડ્યા હતા. છેલ્લા 24 કલાકમાં કુલ 47 તાલુકાઓમાં વરસાદ નોંધાયો હતો.

ગીર સોમનાથ જિલ્લાના ઊના તાલુકામાં સૌથી વધુ 2.72 ઈંચ વરસાદ વરસ્યો હતો. અમરેલીના રાજુલામાં 2.60 ઈંચ, પોરબંદરના રાણાવાવમાં 2.36 ઈંચ, નવસારીમાં 2.24 ઈંચ અને વલસાડ જિલ્લાના ધરમપુરમાં 1.18 ઈંચ વરસાદ નોંધાયો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ગુજરાતમાં અત્યાર સુધી સરેરાશ 89 ટકા વરસાદ

ચાલુ ચોમાસાની સિઝનમાં ગુજરાતમાં અત્યાર સુધી સરેરાશ 810 મિ.મી. વરસાદ નોંધાયો છે. જે રાજ્યના વાર્ષિક સરેરાશ વરસાદના આશરે 89 ટકા જેટલો છે.

પ્રદેશવાર વરસાદની સ્થિતિમાં મોટો તફાવત જોવા મળી રહ્યો છે. દક્ષિણ ગુજરાતમાં સરેરાશના 114 ટકા વરસાદ સાથે સૌથી સારી સ્થિતિ છે. પૂર્વ-મધ્ય ગુજરાતમાં 89 ટકા, સૌરાષ્ટ્રમાં 71.25 ટકા અને ઉત્તર ગુજરાતમાં 71 ટકા વરસાદ નોંધાયો છે.

રાજ્યમાં સૌથી ઓછો વરસાદ કચ્છ ઝોનમાં નોંધાયો છે. કચ્છમાં અત્યાર સુધી વાર્ષિક સરેરાશના માત્ર 57.60 ટકા જેટલો વરસાદ પડ્યો છે.

ચોમાસું હવે ધીમે ધીમે વિદાય તરફ આગળ વધી રહ્યું છે, ત્યારે એક તરફ ભાદરવી ગરમી અને બફારો લોકોની મુશ્કેલી વધારી રહ્યા છે, તો બીજી તરફ છૂટાછવાયા વરસાદી ઝાપટાંને કારણે રાજ્યમાં ગરમી અને વરસાદનું મિશ્ર વાતાવરણ જોવા મળી રહ્યું છે.

આ પણ વાંચો: રાજકોટમાં ગણેશ વિસર્જન બન્યું માતમમાં, એક જ પરિવારના 3 સભ્યોના ડૂબવાથી મોત