ગુજરાત વિધાનસભા ચોમાસુ સત્ર: ગોપાલ ઇટાલિયાનો પહેલો પ્રશ્ન, યોજનાઓની મંજૂરીમાં વિલંબના કારણો પર ચર્ચા
ગાંધીનગર, 8 સપ્ટેમ્બર 2025: ગુજરાત વિધાનસભાના ચોમાસુ સત્ર દરમિયાન વીસાવદરથી આમ આદમી પાર્ટી (AAP)ના નવનિયુક્ત ધારાસભ્ય ગોપાલ ઇટાલિયાએ ગૃહમાં પોતાનો પહેલો પ્રશ્ન ઉઠાવ્યો. તેમણે રાજ્યમાં યોજનાઓની મંજૂરી અને અમલીકરણમાં થતા વિલંબ, ખાસ કરીને ટાઉન પ્લાનિંગ (TP) સ્કીમની સમયમર્યાદા અને વાંધાઓ અંગે સવાલ કર્યો. ઇટાલિયાએ રાજ્ય સરકાર પાસે આ મુદ્દે સ્પષ્ટતા માંગી અને યોજનાઓના અમલમાં વિલંબના કારણો જણાવવા જણાવ્યું.
સરકાર તરફથી જવાબ આપતા ઋષિકેશ પટેલે જણાવ્યું કે, ટાઉન પ્લાનિંગ સ્કીમ અને અન્ય યોજનાઓની મંજૂરીમાં નક્કી કરેલી સમયમર્યાદા હોવા છતાં, કેટલીક વખત કોર્ટના આદેશો, કાનૂની અડચણો અને સ્થાનિક વાંધા-સૂચનોને કારણે વિલંબ થાય છે. આવા કેસોમાં, વાંધાઓનું નિરાકરણ ન આવે ત્યાં સુધી યોજનાઓની મંજૂરી અને અમલીકરણ રોકવું પડે છે. સરકારે એમ પણ જણાવ્યું કે, ડ્રાફ્ટ સ્કીમને મંજૂરી આપતી વખતે રૂટિન વ્યવસ્થા અને સ્થાનિક લોકોના હિતોનું ધ્યાન રાખવું પડે છે, જેથી કોઈને અન્યાય ન થાય. આ પ્રક્રિયામાં ઘણા કારણો જેવા કે જમીનની માલિકી, પર્યાવરણીય મંજૂરીઓ અને સ્થાનિક વિરોધને ધ્યાનમાં લેવાથી વિલંબ થતો હોય છે.
ગોપાલ ઇટાલિયાએ આ જવાબનો વિરોધ કરતાં કહ્યું કે, વારંવાર થતો વિલંબ ગ્રામીણ અને શહેરી વિસ્તારોના વિકાસને અવરોધે છે, અને આની સૌથી વધુ અસર ગરીબ અને મધ્યમ વર્ગ પર પડે છે. તેમણે સરકારને આ પ્રક્રિયાને ઝડપી બનાવવા અને પારદર્શક વ્યવસ્થા ઊભી કરવા માટે કડક પગલાં લેવાની માંગ કરી. ઇટાલિયાની આ પહેલે વિધાનસભામાં ગરમાગરમ ચર્ચા જગાવી, કારણ કે આ મુદ્દો રાજ્યના વિકાસની યોજનાઓ સાથે સીધો સંબંધ ધરાવે છે.
આ પણ વાંચો: વિધાનસભા સત્ર પહેલાં કોંગ્રેસના નેતાઓએ મનરેગા કૌભાંડ મુદ્દે કર્યા દેખાવો, મંત્રીના રાજીનામાની માંગ
