Gujarat Weather: ગુજરાતમાં ફરી એકવાર વરસાદી માહોલ જામ્યો છે. રાજ્યના અનેક વિસ્તારોમાં મેઘમહેર વચ્ચે હવે નવરાત્રિને લઈને પણ વરસાદની આગાહી સામે આવી છે. હવામાન નિષ્ણાત અંબાલાલ પટેલે નવરાત્રિના અંતિમ દિવસોમાં વરસાદની શક્યતા વ્યક્ત કરતાં ગરબા પ્રેમીઓની ચિંતા વધી છે.

અંબાલાલ પટેલની આગાહી મુજબ નવરાત્રિ દરમિયાન રાજ્યના કેટલાક વિસ્તારોમાં વરસાદ પડી શકે છે. ખાસ કરીને સાતમથી દશેરા સુધી વરસાદી માહોલ સર્જાવાની શક્યતા વ્યક્ત કરવામાં આવી છે. જો આ આગાહી મુજબ વરસાદ પડે તો ખુલ્લા મેદાનોમાં યોજાતા ગરબા કાર્યક્રમોને અસર થઈ શકે છે.

અમદાવાદ સહિત મધ્ય ગુજરાતમાં વરસાદ

અમદાવાદ, ગાંધીનગર અને વડોદરા સહિત મધ્ય ગુજરાતના અનેક વિસ્તારોમાં વહેલી સવારથી વરસાદ નોંધાયો હતો. અમદાવાદમાં વરસાદને કારણે કેટલાક વિસ્તારોમાં પાણી ભરાઈ જતાં વાહનચાલકોને મુશ્કેલીનો સામનો કરવો પડ્યો હતો. અનેક માર્ગો પર ટ્રાફિક ધીમો પડતાં લોકોને હાલાકી થઈ હતી.

રાજ્યમાં વરસાદનો દોર હજુ સંપૂર્ણપણે અટક્યો નથી. દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારે વરસાદની શક્યતા વ્યક્ત કરવામાં આવી છે. પૂર્વ ગુજરાત અને ઉત્તર ગુજરાતના વિસ્તારોમાં પણ વરસાદ પડી શકે છે.

અરબી સમુદ્રની સિસ્ટમની અસર

અરબી સમુદ્રમાં સક્રિય થયેલી લો-પ્રેશર સિસ્ટમના કારણે ખાસ કરીને સૌરાષ્ટ્રમાં વરસાદી માહોલ રહેવાની શક્યતા છે. સિસ્ટમની અસર હેઠળ કેટલાક વિસ્તારોમાં હળવાથી મધ્યમ અને ક્યાંક વધુ વરસાદ થઈ શકે છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

વરસાદ ખેતી માટે કેટલાક વિસ્તારોમાં લાભદાયી બની શકે છે, પરંતુ નવરાત્રિના આયોજકો અને ગરબા રસિકોની નજર હવે આગામી દિવસોના હવામાન પર રહેશે.

ગુજરાતમાં નવરાત્રિ માત્ર ધાર્મિક પર્વ નહીં પરંતુ સૌથી મોટા ઉત્સવોમાંથી એક છે. ત્યારે સાતમથી દશેરા દરમિયાન વરસાદની શક્યતા સાચી પડે તો આ વર્ષે પણ ગરબાની મજા પર વરસાદ પાણી ફેરવી શકે છે.

આ પણ વાંચો: બંગાળની ખાડીમાં ડિપ્રેશન બનવાની શક્યતા, કોલકાતા સહિત દક્ષિણ બંગાળમાં ફરી વરસાદ