મોટા સમાચાર: અફઘાનિસ્તાનમાં ભયાનક ભૂકંપ આવ્યો, 250 લોકોના મૃત્યુ, 500થી વધુ ઘાયલ થયા

જલાલાબાદ, 1 સપ્ટેમ્બર 2025: યુએસ જીઓલોજિકલ સર્વે અનુસાર, રવિવારે મોડી રાત્રે પાકિસ્તાન સરહદ નજીક પૂર્વી અફઘાનિસ્તાનમાં 6.0 ની તીવ્રતાનો ભૂકંપ આવ્યો હતો. યુએસજીએસ અનુસાર, ભૂકંપનું કેન્દ્ર નંગરહાર પ્રાંતના જલાલાબાદ નજીક હતું અને તેની ઊંડાઈ 8 કિલોમીટર હતી. પ્રાંતના આરોગ્ય વિભાગના પ્રવક્તા અજમલ દરવેશના જણાવ્યા અનુસાર, પૂર્વી પ્રાંત નંગરહારમાં 250 લોકો મૃત્યુ પામ્યા છે અને 500 થી વધુ લોકો ઘાયલ થયા છે. ઘણા વિસ્તારોમાં ભારે નુકસાન પણ થયું છે.

ભૂકંપ એટલો જોરદાર હતો કે તેના આંચકા ભારતના ઘણા ભાગોમાં, ખાસ કરીને દિલ્હી-એનસીઆરમાં અનુભવાયા હતા. આ ઉપરાંત, પાકિસ્તાનમાં પણ ભૂકંપના આંચકા અનુભવાયા હતા. લગભગ 20 મિનિટ પછી, તે જ પ્રાંતમાં બીજો ભૂકંપ આવ્યો, જેની તીવ્રતા 4.5 અને ઊંડાઈ 10 કિલોમીટર હતી. તે રવિવારે સ્થાનિક સમય મુજબ રાત્રે 11:47 વાગ્યે આવ્યો હતો.

અફઘાનિસ્તાનમાં 6.3 ની તીવ્રતાનો ભૂકંપ

7 ઓક્ટોબર, 2023 ના રોજ, અફઘાનિસ્તાનમાં 6.3 ની તીવ્રતાનો ભૂકંપ આવ્યો હતો, ત્યારબાદ જોરદાર ભૂકંપ આવ્યા હતા. તાલિબાન સરકારનો અંદાજ છે કે ઓછામાં ઓછા 4,000 લોકો માર્યા ગયા હતા. સંયુક્ત રાષ્ટ્રએ મૃત્યુઆંક ઘણો ઓછો, લગભગ 1,500 રાખ્યો હતો. તાજેતરના સમયમાં અફઘાનિસ્તાનમાં આ સૌથી ઘાતક કુદરતી આપત્તિ હતી.

એક મહિનામાં 5મી વખત ભૂકંપ

અહીં ઉલ્લેખનિય છે કે છેલ્લા એક મહિનામાં 5મી વખત અફઘાનિસ્તાનમાં ભૂકંપ આવ્યો છે. આ દેશ ભૂકંપ પ્રત્યે સંવેદનશીલ વિસ્તાર છે. આવી સ્થિતિમાં, અહીં વારંવાર ભૂકંપ આવતા રહે છે. અગાઉ, 27 ઓગસ્ટે 5.4 ની તીવ્રતાનો ભૂકંપ, 17 ઓગસ્ટે 4.9 ની તીવ્રતાનો ભૂકંપ, 13 ઓગસ્ટે 10 કિમીની ઊંડાઈએ 4.2 ની તીવ્રતાનો ભૂકંપ આવ્યો હતો. અગાઉ 8 ઓગસ્ટે 10 કિમીની ઊંડાઈએ 4.3 ની તીવ્રતાનો ભૂકંપ આવ્યો હતો.

આ પણ વાંચો: આતંકવાદ વિરુદ્ધ ચીનનો ટેકો મળ્યો, ઝિનપિંગના સૂચનો પર ભારત રાજી થયું, વિદેશ મંત્રાલયે સમગ્ર વિગત જણાવી