દિશા વાકાણીની વાપસીની રાહમાં દિલીપ જોષી, કહ્યું ચમત્કાર થાય તો સારું

Dilip Joshi awaits Disha Vakani: લોકપ્રિય ટીવી શો ‘તારક મહેતા કા ઉલ્ટા ચશ્મા’ને 18 વર્ષ પૂર્ણ થતાં સમગ્ર ટીમે પોતાની યાદો શેર કરી હતી. આ દરમિયાન જેઠાલાલનું પાત્ર ભજવનારા અભિનેતા દિલીપ જોષીએ દયાબેનની ભૂમિકા નિભાવનાર દિશા વાકાણીને યાદ કરતાં તેમની વાપસીની આશા વ્યક્ત કરી હતી.
દિલીપ જોષીએ કહ્યું કે દિશા સાથે વર્ષો સુધી કામ કરવાનો અનુભવ ખૂબ જ ખાસ રહ્યો છે અને આજે પણ તેમની સાથેના દ્રશ્યો અને બંને વચ્ચેની કેમિસ્ટ્રી યાદ આવે છે. તેમણે હળવી શૈલીમાં કહ્યું કે જો કોઈ ચમત્કાર થાય અને દિશા ફરી શોમાં પાછી આવે તો તે ખૂબ આનંદની વાત હશે.
દિશા સાથેની કેમિસ્ટ્રીને આજે પણ કરે છે મિસ
દિલીપ જોષીએ જણાવ્યું કે લગભગ દસ વર્ષ સુધી તેમણે દિશા વાકાણી સાથે અનેક યાદગાર દ્રશ્યો આપ્યા છે. દર્શકોએ પણ બંનેની જોડીને ખૂબ પસંદ કરી હતી. તેથી આજે પણ તેઓ દયાબેનના પાત્રની ખોટ અનુભવે છે.
નિર્માતા ફરી જૂનો જાદુ લાવવાનો કરી રહ્યા છે પ્રયાસ
દિલીપ જોષીના જણાવ્યા અનુસાર, શોના નિર્માતા અસિત મોદી પણ જેઠાલાલ અને દયાબેન વચ્ચેની જૂની મજેદાર ક્ષણોને ફરી સર્જવા ઇચ્છે છે. તેમની પાસે નવા વિચારો છે, પરંતુ હાલની સ્ટોરીલાઇનમાં તે રીતે પાત્રને સામેલ કરવું શક્ય બની રહ્યું નથી.
મુનમુન દત્તાએ મહિલા કલાકારો વિશે વ્યક્ત કર્યા વિચારો
શોમાં બબીતા જીનું પાત્ર ભજવનારી અભિનેત્રી મુનમુન દત્તાએ પણ પોતાના અનુભવો શેર કર્યા હતા. તેમણે જણાવ્યું કે તેમણે ક્યારેય અન્ય મહિલા કલાકારોને સ્પર્ધક તરીકે નથી જોયા. તેમના મતે સાથે મળીને આગળ વધવું વધુ મહત્વનું છે.
તેમણે ગોકુલધામ સોસાયટીની તમામ મહિલા કલાકારોની પ્રશંસા કરતાં જણાવ્યું કે દરેક અભિનેત્રી પ્રતિભાશાળી છે અને સૌ સાથે ખૂબ સારો સંબંધ છે.
મહિલા કલાકારોને યોગ્ય ઓળખ મળવી જરૂરી
મુનમુન દત્તાએ કહ્યું કે ઘણી વખત મહિલા કલાકારોને તેમની મહેનત પ્રમાણે ઓળખ મળતી નથી. જોકે તેમણે સ્પષ્ટ કર્યું કે તેમના શોમાં આવું નથી. તેમના મુજબ ‘તારક મહેતા કા ઉલ્ટા ચશ્મા’ની સફળતામાં મહિલા પાત્રોનું યોગદાન પણ પુરુષ પાત્રો જેટલું જ મહત્વપૂર્ણ છે.
આ પણ વાંચો : મુંબઈના ભિવંડીમાં 4 માળની બિલ્ડીંગ ધરાશાયી, 6 લોકોના મોત, અનેક લોકો હજુ ફસાયેલા












