અમદાવાદ 9 જાન્યુઆરી 2025: શહેરના આનંદનગર વિસ્તારમાં બેંકિંગ સુરક્ષા વ્યવસ્થાને પડકાર ફેંકતી એક ચોંકાવનારી ઘટના સામે આવી છે. આનંદનગર રોડ પર આવેલી બેંક ઓફ ઈન્ડિયા (Bank of India) ના કેશ રિસાયકલર મશીન (CRM) માંથી તસ્કરોએ અત્યંત ચાલાકીપૂર્વક રૂપિયા 49,000ની ચોરી કરી પલાયન થઈ ગયા છે. આ સમગ્ર મામલે બેંકના બ્રાન્ચ મેનેજર દ્વારા ફરિયાદ નોંધાવવામાં આવતા આનંદનગર પોલીસે વધુ તપાસ હાથ ધરી છે.
શું હતી સમગ્ર ઘટના?
મળતી માહિતી મુજબ, આ ઘટનાનો ખુલાસો ત્યારે થયો જ્યારે એક ગ્રાહકે બેંકનો સંપર્ક કર્યો. ગ્રાહકે CRM મશીનમાં રોકડ જમા કરાવી હતી, પરંતુ લાંબા સમય સુધી આ રકમ તેમના બેંક ખાતામાં જમા થઈ ન હતી. ગ્રાહકની ફરિયાદને ગંભીરતાથી લઈને જ્યારે બેંક સત્તાધીશોએ મશીનની તપાસ કરી અને ટ્રાન્ઝેક્શન લોગ ચેક કર્યા, ત્યારે જાણવા મળ્યું કે મશીનમાં રકમ જમા થયા બાદ કોઈએ તેની સાથે છેડછાડ કરી છે.
ચોરીની અનોખી પદ્ધતિ: ટ્રે ઊંચી કરી રૂપિયા કાઢ્યા
પ્રાથમિક તપાસમાં બહાર આવ્યું છે કે તસ્કરોએ કોઈ હથિયાર કે મશીન તોડવાને બદલે ટેકનિકલ છેડછાડનો સહારો લીધો હતો. ગ્રાહકે જ્યારે નાણાં જમા કરાવવા માટે મશીનમાં મૂક્યા, ત્યારે મશીનની કેશ ટ્રે (Cash Tray) ઊંચી કરીને અથવા તેને અધવચ્ચે અટકાવીને અંદર રહેલા 49,000 રૂપિયા સેરવી લેવામાં આવ્યા હતા. આ પદ્ધતિ એવી હતી કે મશીનને બહારથી કોઈ મોટું નુકસાન દેખાયું ન હતું, પરંતુ અંદર રહેલી રોકડ રકમ ગાયબ થઈ ગઈ હતી.
પોલીસ કાર્યવાહી અને CCTV તપાસ
બેંકના બ્રાન્ચ મેનેજરની ફરિયાદના આધારે આનંદનગર પોલીસ સ્ટેશનમાં ગુનો નોંધવામાં આવ્યો છે. પોલીસે જણાવ્યું હતું કે, “અમે બેંકના CCTV ફૂટેજ મેળવ્યા છે અને શંકાસ્પદ વ્યક્તિઓની ઓળખ કરવાની પ્રક્રિયા ચાલુ છે. આ કોઈ પ્રોફેશનલ ગેંગનું કામ હોઈ શકે છે જે CRM મશીનની ટેકનિકલ ક્ષતિઓ વિશે જાણકારી ધરાવે છે.”
આ પણ વાંચો: “મારો પતિ પલંગ નીચે…”, મધ્યરાત્રિએ મહિલાના ફોન પર પોલીસે પતિને ઝડપી લીધો, જાણો સમગ્ર ઘટના
