Unseasonal Rain Forecast :   ગુજરાતમાં ઓક્ટોબર મહિનો પૂરો થવા આવ્યો હોવા છતાં હજી ઠંડીનો ખાસ અહેસાસ થઈ રહ્યો નથી. દરમિયાન, રાજ્યમાં કમોસમી વરસાદ (Unseasonal Rain) પડવાની શક્યતાને લઈને ચર્ચા શરૂ થઈ છે. હવામાન નિષ્ણાત અંબાલાલ પટેલે ઓક્ટોબરના અંતિમ દિવસો અને નવેમ્બરની શરૂઆતમાં વાતાવરણમાં પલટો આવવાની શક્યતા વ્યક્ત કરી છે. જોકે, હવામાન વિભાગની આગાહી મુજબ, 30 ઓક્ટોબર સુધી ગુજરાતમાં વરસાદ અંગે કોઈ ચેતવણી આપવામાં આવી નથી.

બંગાળની ખાડીમાં હવામાન પ્રણાલી સક્રિય

હવામાન વિભાગના જણાવ્યા અનુસાર, બંગાળની ખાડીમાં સક્રિય થનારી હવામાન પ્રણાલીને કારણે દક્ષિણ ભારતના દરિયાકાંઠાના વિસ્તારોમાં વરસાદ અને તેજ પવન ફૂંકાવાની શક્યતા છે. 25 ઓક્ટોબરે ખાડીના મધ્ય અને દક્ષિણ-પૂર્વીય ભાગોમાં પવનની ઝડપ 50થી 60 કિલોમીટર પ્રતિ કલાક રહેવાની શક્યતા છે, જ્યારે પવનના ઝાપટા 70 કિલોમીટર પ્રતિ કલાક સુધી પહોંચી શકે છે.

આ હવામાન પ્રણાલી વધુ મજબૂત બનીને ચક્રવાતી તોફાનનું સ્વરૂપ ધારણ કરી શકે છે. ત્યારબાદ તે ઉત્તર-પશ્ચિમ દિશામાં આગળ વધીને ઉત્તર આંધ્રપ્રદેશ અને દક્ષિણ ઓડિશાના દરિયાકાંઠા તરફ આગળ વધી શકે છે.

હવામાન વિભાગે ગુજરાત માટે શું કહ્યું?

હવામાન વિભાગની આગાહી પ્રમાણે, 30 ઓક્ટોબર સુધી ગુજરાતમાં કોઈ વિસ્તારમાં વરસાદની ચેતવણી આપવામાં આવી નથી. રાજ્યના તાપમાનમાં પણ મોટા ફેરફારની શક્યતા દર્શાવવામાં આવી નથી. એટલે હાલની આગાહી મુજબ ગુજરાતમાં તાત્કાલિક વરસાદનું સત્તાવાર એલર્ટ નથી. જોકે, આગામી દિવસોમાં હવામાન પ્રણાલીઓની ગતિવિધિ અને તેની સંભવિત અસર પર નજર રાખવામાં આવશે. ખાસ કરીને ખેડૂતો માટે કમોસમી વરસાદની શક્યતા મહત્ત્વની બની શકે છે, કારણ કે વરસાદથી ખેતરમાં ઊભા પાકને નુકસાન થવાની ચિંતા રહે છે.

અંબાલાલ પટેલે માવઠા અંગે શું આગાહી કરી?

હવામાન નિષ્ણાત અંબાલાલ પટેલના જણાવ્યા અનુસાર, બંગાળની ખાડી અને અરબી સમુદ્રમાં સક્રિય થનારી હવામાન પ્રણાલીઓની સાથે વેસ્ટર્ન ડિસ્ટર્બન્સ (Western Disturbance)ની અસરથી ગુજરાતના વાતાવરણમાં પલટો આવી શકે છે. તેમના અનુમાન મુજબ, ઓક્ટોબરના અંતિમ દિવસો અને નવેમ્બરની શરૂઆતમાં કેટલાક વિસ્તારોમાં કમોસમી વરસાદ માટે અનુકૂળ પરિસ્થિતિ સર્જાઈ શકે છે.

તેમણે બંગાળની ખાડીમાં સક્રિય થનારી સિસ્ટમ અંદમાન-નિકોબાર તરફથી આગળ વધીને 26થી 27 ઓક્ટોબર દરમિયાન આંધ્રપ્રદેશ અને ઓડિશાના દરિયાકાંઠા તરફ પહોંચવાની શક્યતા પણ વ્યક્ત કરી છે. આ સિસ્ટમની અસરથી દક્ષિણ-પૂર્વ ભારતના દરિયાકાંઠાના વિસ્તારોમાં વરસાદ અને તેજ પવન ફૂંકાઈ શકે છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

28 ઓક્ટોબર પછી વાતાવરણમાં પલટો આવશે?

અંબાલાલ પટેલના અનુમાન પ્રમાણે, 28 ઓક્ટોબરની આસપાસ નવું વેસ્ટર્ન ડિસ્ટર્બન્સ સક્રિય થઈ શકે છે. જો બંગાળની ખાડી અને અરબી સમુદ્ર તરફથી ભેજનો પ્રવાહ વધે અને વેસ્ટર્ન ડિસ્ટર્બન્સની અસર એકસાથે જોવા મળે, તો ગુજરાતમાં વાદળછાયું વાતાવરણ સર્જાઈ શકે છે. આવી સ્થિતિમાં રાજ્યના કેટલાક વિસ્તારોમાં માવઠાની શક્યતા ઊભી થઈ શકે છે.

જોકે, ગુજરાતમાં વરસાદ પડશે કે નહીં અને કયા વિસ્તારોમાં તેની અસર જોવા મળશે તે અંગે હવામાન વિભાગની આગામી આગાહીઓ મહત્ત્વની રહેશે. હાલ ખેડૂતો અને નાગરિકોએ સત્તાવાર હવામાન અપડેટ પર નજર રાખવી જરૂરી છે.

આ પણ વાંચો : અમદાવાદમાં 9 મહિનામાં કૂતરા કરડવાના 65 હજાર કેસ, રસીકરણ પાછળ 7 વર્ષમાં 18 કરોડ ખર્ચાયા