Ahmedabad Railway Overbridge: અમદાવાદના રાણીપ અને આસપાસના વિસ્તારોમાંથી નરેન્દ્ર મોદી સ્ટેડિયમ સુધીની મુસાફરી આગામી સમયમાં વધુ સરળ બની શકે છે. અમદાવાદ મ્યુનિસિપલ કોર્પોરેશન (AMC) દ્વારા રાણીપના રાધાસ્વામી રોડથી બકરા મંડી થઈ અચેર ડેપો સુધી અંદાજે 1.5 કિલોમીટર લાંબો રેલવે ઓવરબ્રિજ બનાવવાની યોજના તૈયાર કરવામાં આવી છે. આ પ્રોજેક્ટ અંતર્ગત હાલના રસ્તાને 36 મીટર પહોળો કરવામાં આવશે. કોમનવેલ્થ ગેમ્સ 2030ની તૈયારીઓ વચ્ચે શહેરની ટ્રાફિક વ્યવસ્થા સુધારવા માટે આ પ્રોજેક્ટને મહત્ત્વપૂર્ણ માનવામાં આવી રહ્યો છે. જોકે, બ્રિજના નિર્માણ માટે રેલવેની મંજૂરી હજુ બાકી છે.

રાધાસ્વામી રોડથી અચેર ડેપો સુધી 36 મીટર પહોળો માર્ગ

AMCએ રાણીપના રાધાસ્વામી રોડથી બકરા મંડી થઈ અચેર ડેપો સુધીના હાલના રસ્તાને પહોળો કરવાની કવાયત શરૂ કરી છે. હાલમાં આ માર્ગની પહોળાઈ જુદાં જુદાં સ્થળોએ અલગ છે, પરંતુ યોજનાના ભાગરૂપે તેને એકસમાન 36 મીટર પહોળો કરવામાં આવશે. આ રસ્તા પર રેલવે ઓવરબ્રિજ બનાવવાની દરખાસ્ત છે. બ્રિજની બંને બાજુએ 6.5 મીટર પહોળા સર્વિસ રોડ બનાવવાની પણ યોજના છે. બ્રિજની રચના વળાંકવાળી હશે, જેથી તેને હાલના માર્ગ સાથે જોડી શકાય.

રેલવેની મંજૂરી મળ્યા બાદ માટી પરીક્ષણ શરૂ થશે

અમદાવાદ મ્યુનિસિપલ કોર્પોરેશનના એન્જિનિયરિંગ વિભાગે આ રેલવે ઓવરબ્રિજ બનાવવા માટે રેલવે સત્તાવાળાઓ પાસે મંજૂરી માગી છે. મંજૂરી મળ્યા બાદ સ્થળ પર માટી પરીક્ષણ અને અન્ય તકનીકી કામગીરી હાથ ધરવામાં આવશે. AMCના વર્ષ 2026-27ના બજેટમાં શહેરના પાંચ સ્થળોએ નવા બ્રિજ બનાવવા માટે શક્યતાદર્શી અભ્યાસ હાથ ધરવાનો નિર્ણય લેવાયો હતો. તેમાં રાણીપના આ રેલવે ઓવરબ્રિજનો પણ સમાવેશ કરવામાં આવ્યો છે. અભ્યાસમાં હાલના માર્ગને 36 મીટર પહોળો કરવાની ભલામણ કરવામાં આવી છે.

રાણીપથી નરેન્દ્ર મોદી સ્ટેડિયમ સુધી સીધી કનેક્ટિવિટી

પ્રસ્તાવિત રેલવે ઓવરબ્રિજ રાણીપ તરફ રેલવે લાઇનથી આશરે 200થી 250 મીટર પહેલાં શરૂ થશે. ત્યારબાદ તે રેલવે ટ્રેક ઉપરથી પસાર થઈ અચેર ડેપો નજીકના મુખ્ય માર્ગ પર ઊતરશે. અચેર ડેપોનો રસ્તો BRTS કોરિડોર સાથે જોડાયેલો હોવાથી ત્યાંથી નરેન્દ્ર મોદી સ્ટેડિયમ તરફ જતા માર્ગ સુધી સરળ કનેક્ટિવિટી મળી શકશે. આ પ્રોજેક્ટ પૂર્ણ થયા બાદ રાણીપ, વાડજ અને આસપાસના વિસ્તારોના વાહનચાલકોને સ્ટેડિયમ તરફ જવા માટે વધારાનો માર્ગ ઉપલબ્ધ થશે. પરિણામે હાલના મુખ્ય રસ્તાઓ પર ટ્રાફિકનું દબાણ ઘટવાની શક્યતા છે.

ગાંધી આશ્રમ રોડ બંધ થતાં રાણીપ અને RTO સર્કલ પર ટ્રાફિકજામ

ગાંધી આશ્રમ વિકાસ પ્રોજેક્ટના ભાગરૂપે ગાંધી આશ્રમ સામેનો રસ્તો બંધ કરવામાં આવ્યો હતો. તેના વિકલ્પ તરીકે કાર્ગો મોટર્સથી રાણીપ બસ સ્ટેન્ડ સુધીનો નવો રસ્તો શરૂ કરાયો હતો. જોકે ગાંધી આશ્રમ રોડ બંધ થયા બાદ રાણીપ બસ ટર્મિનલ જંક્શન અને RTO સર્કલ પાસે ટ્રાફિકની સમસ્યા વધુ ગંભીર બની છે. AMCએ કાર્ગો મોટર્સ રોડથી બત્રીસી ભવન સુધીના આશરે 500 મીટરના રસ્તાને કાયમી ધોરણે બંધ કરવા માટે વર્ષ 2024માં જાહેર નોટિસ પ્રસિદ્ધ કરી હતી. આ અંગે છ લેખિત વાંધા મળ્યા હતા, જેને ફગાવી દેવામાં આવ્યા હતા.

સુભાષ બ્રિજ બંધ થતાં વાહનચાલકોની મુશ્કેલી વધી

રાણીપ અને વાડજથી 132 ફૂટ રિંગ રોડ મારફતે ચાંદખેડા અને સાબરમતી તરફ જતા વાહનચાલકોને ભારે ટ્રાફિકનો સામનો કરવો પડી રહ્યો છે. હાલ ચીમનભાઈ પટેલ રેલવે ઓવરબ્રિજને પહોળો કરવાની કામગીરી ચાલી રહી છે. આ ઉપરાંત સુભાષ બ્રિજને કામચલાઉ ધોરણે બંધ કરવામાં આવતાં અન્ય રસ્તાઓ પર વાહનોનું દબાણ વધી ગયું છે. આ સંજોગોમાં રાણીપથી અચેર ડેપો સુધીનો નવો રેલવે ઓવરબ્રિજ ટ્રાફિકની સમસ્યા હળવી કરવામાં ઉપયોગી સાબિત થઈ શકે છે.

ચંદ્રભાગા નાળાનો પ્રોજેક્ટ એક દાયકાથી વિવાદમાં

રાણીપમાં ચંદ્રભાગા નાળા પર રસ્તો બનાવવાનો પ્રોજેક્ટ પણ લાંબા સમયથી અટવાયેલો છે. AMCએ પ્રબોધ રાવલ બ્રિજથી 132 ફૂટ રિંગ રોડ સુધી 24 મીટર પહોળો રસ્તો બનાવવાની યોજના મંજૂર કરી હતી. આ પ્રોજેક્ટનો હેતુ રાણીપથી ચાંદખેડા અને સાબરમતી તરફ સીધી અવરજવર ઉપલબ્ધ કરાવવાનો હતો. જોકે સાબરમતી સેન્ટ્રલ જેલના સત્તાવાળાઓએ જમીન સંપાદન સામે વાંધો ઉઠાવતાં કામ એક દાયકાથી વધુ સમય સુધી અટકેલું રહ્યું હતું. વર્ષ 2014માં ચંદ્રભાગા નાળાને પૂરીને રસ્તો બનાવવાની મંજૂરી આપવામાં આવી હતી. ત્યારબાદ AMCએ નાળાનો અમુક ભાગ પૂરીને 1,200 મીટર લાંબી ડક્ટલાઇન નાખવાની કામગીરી પૂર્ણ કરી છે. હવે વાડજના દાંડી બ્રિજથી રાણીપ થઈ સાબરમતીના જવાહરચોક સુધી નાળાના બાકી ભાગને પૂરી દેવાની યોજના છે. જોકે, નવી ડક્ટલાઇન ઉપર ખુલ્લો રસ્તો બનાવાશે કે કેમ તે અંગે હજુ અનિશ્ચિતતા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

કોમનવેલ્થ ગેમ્સ પહેલાં અમદાવાદના વિકાસને વેગ

અમદાવાદમાં કોમનવેલ્થ ગેમ્સ 2030ને ધ્યાનમાં રાખીને સ્ટેડિયમ સુધી પહોંચવાના માર્ગો, બ્રિજ અને અન્ય પરિવહન સુવિધાઓ સુધારવાનું આયોજન ચાલી રહ્યું છે. નરેન્દ્ર મોદી સ્ટેડિયમની આસપાસ રમતગમત અને પરિવહન સંબંધિત માળખાકીય સુવિધાઓ વિકસાવવાની યોજનાઓ સાથે રાણીપનો આ પ્રસ્તાવિત રેલવે ઓવરબ્રિજ પણ જોડાયેલો છે. જોકે પ્રોજેક્ટની શરૂઆત રેલવેની મંજૂરી, તકનીકી અભ્યાસ અને અન્ય જરૂરી પ્રક્રિયાઓ પૂર્ણ થયા બાદ જ થઈ શકશે.

આ પણ વાંચોઃ ડ્રગ્સની હેરાફેરી રોકવા પોલીસનું મોટું પગલું, હવે કુરિયર અને ડિલિવરી કંપનીઓ પર કડક નજર