અમેરિકાની હવાઈ સેવાઓ ખોરવાતાં તમામ ફ્લાઇટ્સ રદ, એર ઇન્ડિયાએ પણ જાહેર કરી ટ્રાવેલ એડવાઇઝરી

ન્યૂયોર્ક: અમેરિકામાં એર ટ્રાફિક કંટ્રોલ સાથે જોડાયેલી ટેલિકમ્યુનિકેશન સેવાઓમાં ટેકનિકલ ખામી સર્જાતાં હવાઈ સેવાઓ પર ગંભીર અસર પડી છે. અમેરિકાના ફેડરલ એવિએશન એડમિનિસ્ટ્રેશન (FAA) દ્વારા દેશવ્યાપી ગ્રાઉન્ડ સ્ટોપ લાગુ કરવામાં આવતાં વિમાનોની ઉડાન પર અસ્થાયી રોક લગાવવામાં આવી છે. આ પરિસ્થિતિ વચ્ચે એર કેનેડાએ અમેરિકાથી આવતી અને અમેરિકામાં જતી પોતાની તમામ ફ્લાઇટ્સ રદ કરવાની જાહેરાત કરી છે. બીજી તરફ, એર ઇન્ડિયાએ પણ મુસાફરો માટે ટ્રાવેલ એડવાઇઝરી જાહેર કરીને સાવચેતી રાખવાની અપીલ કરી છે.

એર કેનેડાએ અમેરિકાની તમામ ફ્લાઇટ્સ રદ કરી

અમેરિકામાં સર્જાયેલી ટેકનિકલ સમસ્યાને પગલે એર કેનેડાએ મોટો નિર્ણય લીધો છે. એરલાઇન દ્વારા જણાવવામાં આવ્યું છે કે FAAના ગ્રાઉન્ડ સ્ટોપના આદેશને કારણે સાંજના બાકીના સમય માટે અમેરિકાથી આવતી અને અમેરિકામાં જતી તમામ ફ્લાઇટ્સ રદ કરવામાં આવી છે.

જોકે, એર કેનેડાએ આ નિર્ણયને કારણે કુલ કેટલી ફ્લાઇટ્સ પ્રભાવિત થઈ છે તેની ચોક્કસ સંખ્યા જાહેર કરી નથી. આ નિર્ણયથી અમેરિકા અને કેનેડા વચ્ચે મુસાફરી કરતા હજારો મુસાફરોની મુસાફરી યોજનાઓ ખોરવાઈ શકે છે.

એર ઇન્ડિયાની ફ્લાઇટ્સ પર પણ અસર થવાની શક્યતા

અમેરિકામાં સર્જાયેલી આ પરિસ્થિતિની અસર ભારત અને અમેરિકા વચ્ચેની હવાઈ સેવાઓ પર પણ પડી શકે છે. એર ઇન્ડિયાએ સોશિયલ મીડિયા પ્લેટફોર્મ X પર ટ્રાવેલ એડવાઇઝરી જાહેર કરીને જણાવ્યું છે કે અમેરિકામાં કમ્યુનિકેશન સેવાઓમાં વિક્ષેપને કારણે દેશભરના એરપોર્ટ પરથી ફ્લાઇટ્સનું સંચાલન પ્રભાવિત થઈ રહ્યું છે.

એર ઇન્ડિયાએ સ્પષ્ટ કર્યું છે કે આ પરિસ્થિતિની અસર ભારત અને અમેરિકા વચ્ચે સંચાલિત થતી તેની ફ્લાઇટ્સ પર પણ પડી શકે છે. આથી મુસાફરોએ એરપોર્ટ જવા માટે નીકળતા પહેલાં પોતાની ફ્લાઇટનું લેટેસ્ટ સ્ટેટસ તપાસી લેવું જોઈએ.

મુસાફરોને ફ્લાઇટ સ્ટેટસ ચેક કરવાની અપીલ

એર ઇન્ડિયાએ મુસાફરોને અપીલ કરી છે કે તેઓ એરપોર્ટ માટે રવાના થતાં પહેલાં ફ્લાઇટની સ્થિતિની ચકાસણી કરે અને તે મુજબ પોતાની મુસાફરીનું આયોજન કરે. એરલાઇનની ટીમો સમગ્ર પરિસ્થિતિ પર સતત નજર રાખી રહી છે. નવી માહિતી ઉપલબ્ધ થતાં જ મુસાફરોને જરૂરી અપડેટ આપવામાં આવશે.

હવાઈ સેવાઓ ક્યારે રાબેતા મુજબ શરૂ થશે?

હાલમાં સૌથી મોટો સવાલ એ છે કે અમેરિકામાં ખોરવાયેલી કમ્યુનિકેશન વ્યવસ્થા ક્યારે સામાન્ય થશે અને ફ્લાઇટ્સનું નિયમિત સંચાલન ક્યારે શરૂ થશે. ટેકનિકલ ખામી દૂર કરવા માટે સંબંધિત ટીમો કામગીરી કરી રહી છે, પરંતુ હવાઈ સેવાઓ સંપૂર્ણપણે ક્યારે પુનઃસ્થાપિત થશે તે અંગે હજુ સુધી સ્પષ્ટતા કરવામાં આવી નથી. ત્યાં સુધી અમેરિકા જવા અથવા ત્યાંથી ભારત આવવાનું આયોજન કરતા મુસાફરોએ એરલાઇન્સ દ્વારા આપવામાં આવતા અપડેટ્સ પર નજર રાખવી જરૂરી છે.

આ પણ વાંચો: અમેરિકાના આકાશમાં લોકડાઉન: તમામ ફ્લાઈટ પર અચાનક બ્રેક લગાવી, હજારો મુસાફરો ફસાયા