ઉમરેઠમાં કેસરિયો લહેરાયો, હર્ષદ પરમારે પિતાના રાજકીય વારસાને આગળ ધપાવી બેઠક જાળવી

Umreth by-election: આણંદ જિલ્લાની ઉમરેઠ વિધાનસભા બેઠકની પેટાચૂંટણીમાં ભારતીય જનતા પાર્ટીના ઉમેદવાર હર્ષદભાઈ ગોવિંદભાઈ પરમારે મોટી હાંસલ કરી છે. મતગણતરીના 21મા રાઉન્ડ સુધી તેઓ કોંગ્રેસના ઉમેદવાર ભૃગુરાજસિંહ ચૌહાણ કરતાં 29,503 મતના મજબૂત અંતરથી આગળ રહ્યા હતા, જેના કારણે તેમની જીત લગભગ નિશ્ચિત બની ગઈ હતી. આ જીત સાથે ભાજપે સ્વ. ગોવિંદભાઈ રાઈજીભાઈ પરમારની રાજકીય વિરાસતને આગળ વધારીને ઉમરેઠ બેઠક પર પોતાની પકડ જાળવી રાખી છે.

પેટાચૂંટણીનું કારણ

ઉમરેઠ વિધાનસભા બેઠક પૂર્વ ધારાસભ્ય ગોવિંદભાઈ પરમારના અવસાનને કારણે ખાલી પડી હતી. તેમના અવસાન બાદ ચૂંટણી પંચે 23 એપ્રિલ 2026ના રોજ અહીં પેટાચૂંટણી જાહેર કરી હતી. ભાજપે સ્વ. ધારાસભ્યના પુત્ર અને ચીખોદરા ગામના સરપંચ હર્ષદ પરમારને મેદાનમાં ઉતાર્યા હતા. તેઓ સ્થાનિક સ્તરે સક્રિય નેતા તરીકે ઓળખાય છે. જ્યારે કોંગ્રેસ તરફથી 62 વર્ષીય ભૃગુરાજસિંહ ચૌહાણને ઉમેદવાર બનાવાયા હતા, જેઓ પાર્ટીના સંગઠન સ્તરે કો-ઓર્ડિનેટર તરીકે કાર્યરત છે.

આ ઉપરાંત ચૂંટણીમાં કેટલાક અપક્ષ અને અન્ય ઉમેદવારો પણ હતા, જેમાં જીતેશકુમાર સેવક, નિરુપાબેન મધુ, મહેન્દ્રભાઈ પરમાર અને મૌલિક વિનુભાઈ શાહનો સમાવેશ થાય છે.

મતદાન અને મતદાર સંખ્યા

ઉમરેઠ બેઠકમાં કુલ 2,45,623 નોંધાયેલા મતદારો હતા. 306 મતદાન મથકો પર મતદાન યોજાયું હતું અને અંતિમ વોટર ટર્નઆઉટ 59.04 ટકા નોંધાયો હતો. મુખ્ય સ્પર્ધા ભાજપ અને કોંગ્રેસ વચ્ચે જ રહી હતી.

પરિણામ

વલ્લભ વિદ્યાનગર ખાતે યોજાયેલી મતગણતરીમાં શરૂઆતથી જ હર્ષદ પરમાર આગળ રહ્યા હતા. દરેક રાઉન્ડ સાથે તેમની લીડ વધતી ગઈ અને અંતે ભારે અંતરથી જીત સુનિશ્ચિત થઈ ગઈ.

આ જીત ભાજપ માટે મહત્વપૂર્ણ માનવામાં આવી રહી છે, કારણ કે તે ગુજરાતમાં પાર્ટીની સ્થિતિને વધુ મજબૂત બનાવે છે. હર્ષદ પરમારે પોતાના પ્રચાર દરમિયાન વિકાસ કાર્યો અને જનસેવાને મુખ્ય મુદ્દા તરીકે રજૂ કર્યા હતા. જ્યારે કોંગ્રેસે આ ચૂંટણીને પરિવારવાદના મુદ્દા સાથે જોડવાનો પ્રયાસ કર્યો હતો, પરંતુ અંતે મતદારોએ સ્થાનિક નેતૃત્વ અને વિકાસના મુદ્દાને વધુ મહત્વ આપ્યું હોવાનું માનવામાં આવે છે.

આમ, ઉમરેઠ પેટાચૂંટણીમાં હર્ષદ પરમારની જીત સાથે ભાજપે બેઠક જાળવી રાખી છે અને રાજ્ય રાજકારણમાં પોતાની સ્થિતિ વધુ મજબૂત કરી છે.

આ પણ વાંચો: અમદાવાદ પોલીસનું ફિટનેસ તરફ મોટું પગલું, કમિશનર ઓફિસમાં હાઈટેક જિમનું ઉદ્ઘાટન