ભારત-પાકિસ્તાન વચ્ચે ખિતાબી જંગ, ક્યારે અને ક્યાં રમાશે ફાઇનલ?

India vs Pakistan: ભારત અને પાકિસ્તાન વચ્ચે ક્રિકેટનો વધુ એક રોમાંચક મુકાબલો જોવા મળવાનો છે. ACC અંડર-19 એશિયા કપ 2026ની ફાઇનલમાં બંને કટ્ટર હરીફ ટીમો આમને-સામને ટકરાશે. ભારતીય ટીમે સેમિફાઇનલમાં અફઘાનિસ્તાનને 8 વિકેટે હરાવીને ફાઇનલમાં સ્થાન મેળવ્યું છે. હવે ટીમ ઈન્ડિયાની નજર ગ્રુપ સ્ટેજમાં પાકિસ્તાન સામે મળેલી હારનો બદલો લેવા અને એશિયા કપનો ખિતાબ જીતવા પર રહેશે.

ભારતીય ટીમ 2021 બાદથી અંડર-19 એશિયા કપનો ખિતાબ જીતી શકી નથી. છેલ્લી બે ફાઇનલમાં ભારતીય ટીમને હારનો સામનો કરવો પડ્યો હતો. આવી સ્થિતિમાં આ વખતે ટીમ ઈન્ડિયા ખિતાબનો દુકાળ ખતમ કરવાના ઇરાદા સાથે મેદાનમાં ઉતરશે.

લક્ષ્યની કેપ્ટનશિપમાં ભારત ફાઇનલમાં પહોંચ્યું

ભારતીય ટીમે અફઘાનિસ્તાન સામેની સેમિફાઇનલમાં એકતરફી જીત નોંધાવી હતી. પ્રથમ બેટિંગ કરતાં અફઘાનિસ્તાને 50 ઓવરમાં 8 વિકેટ ગુમાવીને 227 રન બનાવ્યા હતા. ભારત તરફથી ઈશાન સૂદે 43 રન આપીને 3 વિકેટ ઝડપી હતી. 228 રનના લક્ષ્યાંકનો પીછો કરવા ઉતરેલી ભારતીય ટીમને કેપ્ટન લક્ષ્ય રાયચંદાની અને આર્યવીર સેહવાગે શાનદાર શરૂઆત અપાવી હતી. બંને વચ્ચે પ્રથમ વિકેટ માટે 17 ઓવરમાં 117 રનની ભાગીદારી થઈ હતી. આર્યવીર સેહવાગે 51 રન બનાવ્યા હતા, જ્યારે લક્ષ્ય રાયચંદાનીએ 90 બોલમાં 93 રનની શાનદાર ઇનિંગ રમી હતી. તેની ઇનિંગમાં 13 ચોગ્ગા અને એક છગ્ગાનો સમાવેશ થાય છે.

ત્યારબાદ વીકે વિનીતે 57 રનની અણનમ ઇનિંગ રમીને ભારતને 36.5 ઓવરમાં જ જીત અપાવી હતી. ભારતે 2 વિકેટ ગુમાવીને 230 રન બનાવ્યા અને 8 વિકેટે મેચ જીતી લીધી હતી. બીજી તરફ પાકિસ્તાને પ્રથમ સેમિફાઇનલમાં બાંગ્લાદેશને 9 વિકેટે હરાવીને ફાઇનલમાં પ્રવેશ કર્યો છે. ખાસ વાત એ છે કે પાકિસ્તાન વર્તમાન ચેમ્પિયન પણ છે. આવી સ્થિતિમાં બંને ટીમો વચ્ચેનો આ મુકાબલો માત્ર ખિતાબ જ નહીં, પરંતુ પ્રતિષ્ઠાની લડાઈ પણ બની રહેશે.

આ પણ વાંચો:અફઘાનિસ્તાનને ધૂળ ચટાવી ભારત ફાઇનલમાં પહોંચ્યું, પાકિસ્તાન સામે મહામુકાબલો

ક્યારે અને ક્યાં રમાશે IND vs PAK ફાઇનલ?

ભારત અને પાકિસ્તાન વચ્ચે અંડર-19 એશિયા કપ 2026ની ફાઇનલ 14 નવેમ્બર 2026, શનિવારના રોજ રમાશે. આ મુકાબલો ઓમાનના અલ અમરાત ક્રિકેટ ગ્રાઉન્ડ (મિનિસ્ટ્રી ટર્ફ-2) ખાતે યોજાશે.

• તારીખ: 14 નવેમ્બર 2026

• દિવસ: શનિવાર

• સ્થળ: અલ અમરાત ક્રિકેટ ગ્રાઉન્ડ, ઓમાન

• ટોસનો સમય: સવારે 10:00 વાગ્યે

• મેચ શરૂ થવાનો સમય: સવારે 10:30 વાગ્યે (ભારતીય સમય)

ભારતમાં IND vs PAK ફાઇનલનું LIVE પ્રસારણ ક્યાં જોવું?

ભારત અને પાકિસ્તાન વચ્ચેની અંડર-19 એશિયા કપ 2026ની ફાઇનલનું ટીવી પર લાઇવ પ્રસારણ Sony Sports Network પર કરવામાં આવશે. જ્યારે મોબાઇલ અને લેપટોપ પર દર્શકો આ રોમાંચક મુકાબલાનું લાઇવ સ્ટ્રીમિંગ SonyLIV એપ અને વેબસાઇટ પર જોઈ શકશે.