3 ધામના કપાટ બંધ, 16 નવેમ્બરે બદ્રીનાથ સાથે સમાપ્ત થશે ચારધામ યાત્રા
Char Dham Yatra 2026 Badrinath Temple Doors Closing Date: ઉત્તરાખંડની વિશ્વ પ્રસિદ્ધ ચારધામ યાત્રા 2026 હવે તેના અંતિમ પડાવ પર પહોંચી ગઈ છે. ગંગોત્રી, યમુનોત્રી અને કેદારનાથ ધામના કપાટ શિયાળા માટે બંધ થઈ ગયા બાદ હવે ભૂ-વૈકુંઠ બદરીનાથ ધામના કપાટ બંધ કરવાની પ્રક્રિયા શરૂ થઈ ગઈ છે. ધામમાં પરંપરાગત ‘પંચ પૂજા’ના શુભારંભ સાથે જ કપાટબંધીની ઉલટી ગણતરી શરૂ થઈ ચૂકી છે. આગામી સોમવાર, 16 નવેમ્બરના રોજ રાત્રે 9 વાગીને 37 મિનિટે શુભ મુહૂર્તમાં ભગવાન બદરી વિશાલના કપાટ શીતકાળ માટે બંધ કરી દેવામાં આવશે, જેની સાથે જ વર્ષ 2026ની ચારધામ યાત્રાનું વિધિવત સમાપન થશે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
22.70 લાખથી વધુ શ્રદ્ધાળુઓએ દર્શન કરી બનાવ્યો નવો રેકોર્ડ
વર્ષ 2026ની ચારધામ યાત્રા શ્રદ્ધાળુઓની સંખ્યાની દ્રષ્ટિએ ઐતિહાસિક સાબિત થઈ છે. આ વર્ષે એકલા બદરીનાથ ધામમાં 22 લાખ 70 હજારથી વધુ શ્રદ્ધાળુઓએ બાબાના દર્શન કરીને એક નવો રેકોર્ડ સ્થાપિત કર્યો છે. કડકડતી ઠંડી અને હિમવર્ષા હોવા છતાં ભક્તોનો ઉત્સાહ ઓછો થયો નહોતો અને દર્શનાર્થીઓનો પ્રવાહ સતત ચાલુ રહ્યો હતો.
કપાટ બંધ થયા બાદ આગામી છ મહિના સુધી ધામમાં દેવતાઓની પૂજા-અર્ચનાની પરંપરા નિભાવવામાં આવશે. આ સમયગાળા દરમિયાન ભક્તો ભગવાનના પ્રતિનિધિ ઉદ્ધવજી અને કુબેરજીના દર્શન શીતકાલીન પ્રવાસ પાંડુકેશ્વર ખાતે તેમજ આદિ ગુરુ શંકરાચાર્યજીની ગાદીના દર્શન જ્યોતિર્મઠ સ્થિત નૃસિંહ મંદિરમાં કરી શકશે.
આ પણ વાંચોઃ ઈ-કોમર્સ ક્ષેત્રે ગ્રાહકો સાથે છેતરપિંડીમાં ચિંતાજનક વધારો, ગુજરાતમાં ફરિયાદો 33% વધી
બદરીનાથ ધામમાં પંચ પૂજાનો ધાર્મિક કાર્યક્રમ
વૈદિક પરંપરાઓ અને પૌરાણિક માન્યતાઓ અનુસાર બદરીનાથ ધામમાં રાવલ અંબરનાથ નંબૂદરી, ધર્માધિકારી સ્વયંબર સેમવાલ અને વેદપાઠીઓની ઉપસ્થિતિમાં પાંચ દિવસ સુધી પંચ પૂજાનું વિધાન સંપન્ન કરવામાં આવી રહ્યું છે. પંચ પૂજાના પ્રથમ દિવસે ગુરુવારે ભગવાન ગણેશની પૂજા-અર્ચના બાદ મોડી સાંજે ગણેશ મંદિરના કપાટ બંધ કરવામાં આવ્યા હતા.
બીજા દિવસે શુક્રવારે આદિ કેદારેશ્વર અને આદિ ગુરુ શંકરાચાર્ય મંદિરના કપાટ બંધ થશે. ત્રીજા દિવસે શનિવાર 14 નવેમ્બરે વેદ-પુરાણો અને ખડ્ગ-પુસ્તકના વાચનની પ્રક્રિયા પૂર્ણ કરવામાં આવશે. ચોથા દિવસે રવિવાર 15 નવેમ્બરે માતા લક્ષ્મીને વિશેષ કઢાઈ ભોગ અર્પણ કરી ગર્ભગૃહમાં બિરાજમાન થવાનું આમંત્રણ અપાશે.
અંતિમ દિવસે સોમવાર 16 નવેમ્બરે માતા લક્ષ્મીને ગર્ભગૃહમાં બિરાજમાન કરાવ્યા બાદ રાત્રે 9:37 વાગ્યે બદરીનાથ ધામના કપાટ બંધ થશે અને 17 નવેમ્બરે દેવ ડોલીઓ શીતકાલીન પ્રવાસ માટે રવાના થશે.
આ પણ વાંચોઃ કરીના કપૂરે દિવાળી પર પહેરેલા પેન્ડન્ટ પર વિવાદ, કોંગ્રેસ નેતાએ મોકલ્યો લીગલ નોટિસ
DISCLAIMER : ધર્મને લગતો આ આર્ટિકલ માત્ર અલગ-અલગ મળતી માહિતીને આધારિત છે. ધર્મ દરેકની આસ્થાનો વિષય છે. અહીં આપવામાં આવેલી જાણકારીને અનુસરતા પહેલા ધર્મ કે શાસ્ત્ર આધારિત જ્ઞાન ધરાવનારા વિદ્ધાનોની સલાહ લેવી અતિ આવશ્યક રહેશે. નહીં તો કોઇ મુશ્કેલી સર્જાય તો જવાબદારી humdekhenge.in રહેશે નહીં. આ આર્ટિકલ ફક્ત ન્યૂઝના હેતુસર પબ્લિશ કરવામાં આવ્યો છે.
