Hollywood Director Chuck Russell Dies: હોલીવુડના પ્રખ્યાત ફિલ્મ નિર્માતા અને દિગ્દર્શક ચાર્લ્સ “ચક” રેમન્ડ રસેલનું 74 વર્ષની વયે અચાનક નિધન થયું છે. 22 જુલાઈ, 2026 ના રોજ કેલિફોર્નિયાના સાન ડિએગો સ્થિત તેમના નિવાસસ્થાને તેમણે અંતિમ શ્વાસ લીધા હતા. તેમની પત્ની અનિયા જેન અને વકીલે આ દુઃખદ સમાચારની સત્તાવાર પુષ્ટિ કરી છે. જીમ કેરી, કેમેરોન ડિયાઝ અને ડ્વેન ‘ધ રોક’ જોહ્ન્સન જેવા કલાકારોની કારકિર્દીને નવી ઊંચાઈ આપનારા આ દિગ્દર્શકના અવસાનથી સમગ્ર વૈશ્વિક સિનેમા જગતમાં શોકની લહેર ફરી વળી છે.

ઈમરજન્સી સેવાઓનો વિફળ પ્રયાસ

મળતી માહિતી મુજબ, બુધવારે બપોરે સાન ડિએગો સ્થિત તેમના ઘરે એક વ્યક્તિ અચેતન અવસ્થામાં હોવાનો ઈમરજન્સી કોલ મળતાં જ તબીબી સેવાઓ અને ફાયર વિભાગની ટુકડી ઘટનાસ્થળે પહોંચી ગઈ હતી. તેમની પત્ની અનિયાએ જણાવ્યું કે ચકને ઘરની અંદર બેભાન જોઈને તરત જ 911 પર ફોન કરવામાં આવ્યો હતો. પેરામેડિક્સ દ્વારા તેમને પુનર્જીવિત કરવાના તમામ પ્રયાસો કરવામાં આવ્યા હોવા છતાં તેઓ સફળ રહ્યા નહોતા. તેમના મૃત્યુનું ચોક્કસ કારણ હજુ સુધી જાહેર કરવામાં આવ્યું નથી.

પત્ની અનિયાએ આપી શ્રદ્ધાંજલિ

પોતાના પતિના અચાનક નિધનથી આઘાતમાં સરેલી પત્ની અનિયા જેન પોતે પણ એક અભિનેત્રી છે. તેમણે અત્યંત ભાવુક બનીને કહ્યું, “ચક એક અદ્ભુત અને ઉમદા માણસ હતા. તેઓ મારા માટે બધું જ હતા.” ચક રસેલે 2007 માં અનિયા સાથે બીજા લગ્ન કર્યા હતા, જ્યારે તેમની પ્રથમ પત્ની પટ્ટી રાવ હતી. ચક રસેલના પરિવારમાં તેમની પત્ની અનિયા, પ્રથમ પત્નીથી થયેલા 3 બાળકો (લોગન, રાયલી અને કાર્લિન), પૂર્વ પત્ની પટ્ટી રાવ અને બહેન એન જેકબનો સમાવેશ થાય છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

કારકિર્દીની ધમાકેદાર શરૂઆત, હોરર ફિલ્મોમાં દબદબો

9 મે, 1952 ના રોજ ઇલિનોઇસના પાર્ક રિજમાં જન્મેલા ચક રસેલે ઇલિનોઇસ યુનિવર્સિટીમાંથી અભ્યાસ પૂર્ણ કર્યા બાદ નાટકો લખવાનું અને દિગ્દર્શન કરવાનું શરૂ કર્યું હતું. તેમણે હોલીવુડમાં પ્રોડક્શન આસિસ્ટન્ટ તરીકે કારકિર્દી શરૂ કરી હતી. 1987 માં તેમણે “અ નાઇટમેર ઓન એલ્મ સ્ટ્રીટ 3: ડ્રીમ વોરિયર્સ” થી દિગ્દર્શક તરીકે સફળ ડેબ્યૂ કર્યું હતું. ત્યારબાદ 1988 માં તેમણે પ્રખ્યાત કલ્ટ હોરર ફિલ્મ “ધ બ્લોબ” નું દિગ્દર્શન કરીને સિનેમા જગતમાં પોતાની આગવી ઓળખ ઊભી કરી હતી.

‘ધ માસ્ક’ દ્વારા વૈશ્વિક સફળતા મળી

ચક રસેલની કારકિર્દીનો સૌથી મોટો વળાંક 1994 માં આવેલી કૉમેડી ફિલ્મ “ધ માસ્ક” સાથે આવ્યો. આ ફિલ્મે જીમ કેરીને રાતોરાત વૈશ્વિક સુપરસ્ટાર બનાવ્યા અને કેમેરોન ડિયાઝની સફળ કારકિર્દીનો પ્રારંભ કરાવ્યો. આ ફિલ્મને ઓસ્કાર નોમિનેશન પણ મળ્યું હતું. જિમ કેરીએ શોક વ્યક્ત કરતાં કહ્યું, “ચક સાથે કામ કરવાનો મને લહાવો મળ્યો. તેમણે સેટ પર બાળકના જેવો ઉત્સાહપૂર્વકનો વાતાવરણ ઊભું કર્યું હતું. હું ‘ધ માસ્ક’ ને મારા જીવનના સૌથી કિંમતી રત્નોમાંથી એક માનું છું.”

મોટા કલાકારો સાથે કામ કર્યું

1996 માં તેમણે આર્નોલ્ડ શ્વાર્ઝેનેગર સાથે ‘ઇરેઝર’ અને 2002 માં ડ્વેન ‘ધ રોક’ જોહ્ન્સન સાથે ‘ધ સ્કોર્પિયમ કિંગ’ જેવી બ્લોકબસ્ટર ફિલ્મો આપી હતી. ચક રસેલે 2019 માં ભારતીય એક્શન સ્ટાર વિદ્યુત જામવાલ અભિનીત હિન્દી ફિલ્મ “જંગલી” નું પણ દિગ્દર્શન કર્યું હતું. તેમણે 2004 ની સુપરહિટ ક્રાઇમ થ્રિલર ‘કોલેટરલ’ માં પ્રોડ્યુસર તરીકે કામ કર્યું હતું, જ્યારે 2024 માં રિલીઝ થયેલી હોરર ફિલ્મ ‘વિચબોર્ડ’ તેમની છેલ્લી ફિલ્મ બની રહી.

આ પણ વાંચો: ધર્મેન્દ્ર પ્રધાનના રાજીનામા પર બોલિવૂડની પ્રતિક્રિયા: પ્રિયંકા ચોપડાથી પ્રકાશ રાજ સુધી અનેક સેલેબ્સે શું કહ્યું?