ધર્મેન્દ્ર પ્રધાનના રાજીનામા પર બોલિવૂડની પ્રતિક્રિયા: પ્રિયંકા ચોપડાથી પ્રકાશ રાજ સુધી અનેક સેલેબ્સે શું કહ્યું?
નવી દિલ્હી: કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા બાદ માત્ર રાજકીય વર્તુળોમાં જ નહીં, પરંતુ બોલિવૂડમાં પણ તેની ચર્ચા જોરશોરથી થઈ રહી છે. સોશિયલ મીડિયા પર અનેક ફિલ્મી હસ્તીઓએ પોતાની પ્રતિક્રિયા વ્યક્ત કરી છે. કેટલાક કલાકારોએ વિદ્યાર્થીઓના લાંબા સમયથી ચાલતા આંદોલનને અભિનંદન પાઠવ્યા, તો કેટલાકે આ ઘટનાને યુવા શક્તિ અને લોકશાહીની જીત ગણાવી.
પ્રકાશ રાજ: તમે સરકારને ઝૂકાવી બતાવી
અભિનેતા પ્રકાશ રાજે સોશિયલ મીડિયા પ્લેટફોર્મ X પર પોસ્ટ શેર કરીને વિદ્યાર્થીઓ અને આંદોલનકારીઓની પ્રશંસા કરી. તેમણે લખ્યું કે, “અભિનંદન મારા પ્રિય કોકરોચ મિત્રો, સોનમ વાંગચુક અને યુવાનો સાથે ઊભા રહેનારા તમામ લોકોને. તમે સાબિત કરી દીધું કે એકજૂટ જનશક્તિ સામે કોઈપણ સરકારને ઝૂકવું પડી શકે છે.”
પ્રિયંકા ચોપડાનો પ્રતિસાદ
અભિનેત્રી પ્રિયંકા ચોપડાએ પોતાના સોશિયલ મીડિયા પર લખ્યું કે ધર્મેન્દ્ર પ્રધાનના રાજીનામા પાછળ દેશભરના વિદ્યાર્થીઓના લગભગ 30 દિવસના વિરોધ પ્રદર્શન અને સોનમ વાંગચુકના 26 દિવસના અનશનનો મોટો ફાળો રહ્યો છે. તેમણે આ ઘટનાને સંઘર્ષની સફળતા ગણાવી.
અરમાન મલિક: ‘યુવા શક્તિની તાકાત’
ગાયક અરમાન મલિકે ટૂંકા પરંતુ અસરકારક શબ્દોમાં લખ્યું, “Power of the Youth”, એટલે કે યુવાનોની શક્તિએ પોતાનો પ્રભાવ બતાવ્યો છે.
સંભાવના સેઠ: આંસુ, સંઘર્ષ અને હિંમતની જીત
અભિનેત્રી સંભાવના સેઠે ઇન્સ્ટાગ્રામ પર લખ્યું કે છેલ્લા કેટલાક દિવસોમાં લોકોના આંસુ, સંઘર્ષ, હિંમત અને બલિદાન જોવા મળ્યા હતા. અનેક અવરોધો છતાં યુવાનો અડગ રહ્યા અને આજે તેમની મહેનત સફળ થઈ છે. તેમણે અંતમાં લખ્યું, “Gen Z ઝિંદાબાદ.”
અદિતિ રાવ હૈદરી: ‘સાચી લડતની જીત’
અદિતિ રાવ હૈદરીએ પોતાના સંદેશમાં લખ્યું કે સાચી લડત લડીને જીતવું સૌથી મોટી વાત છે. તેમણે આશા વ્યક્ત કરી કે ઈમાનદારી, અહિંસા, જવાબદારી અને અભિવ્યક્તિની સ્વતંત્રતા જેવી મૂલ્યો વધુ મજબૂત બનશે અને નફરત તથા ભય પર હંમેશા ભારે પડશે.
દીયા મિર્ઝા: ‘યુવાનોની મોટી જીત’
અભિનેત્રી દીયા મિર્ઝાએ પોતાની ઇન્સ્ટાગ્રામ સ્ટોરીમાં લખ્યું કે ધર્મેન્દ્ર પ્રધાનનું રાજીનામું દેશના યુવાનોની મોટી જીત છે અને આ સંઘર્ષે યુવા અવાજની તાકાત સાબિત કરી છે.
વાણી કપૂર: ‘આ ક્ષણ દરેક વિદ્યાર્થી માટે’
વાણી કપૂરે લખ્યું કે સતત પ્રશ્નો પૂછનારા, હિંમત ન હારનારા અને આશા જીવંત રાખનારા દરેક વિદ્યાર્થી માટે આ ગૌરવની ક્ષણ છે.
સમય રૈના: ‘વિદ્યાર્થીઓને વધુ અધિકાર મળે’
કોમેડિયન સમય રૈનાએ પણ પ્રતિક્રિયા આપતાં લખ્યું કે હવે વિદ્યાર્થીઓને વધુ અધિકારો અને વધુ મજબૂત અવાજ મળવો જોઈએ.
વિજય વર્માનો વ્યંગ
અભિનેતા વિજય વર્માએ ધર્મેન્દ્ર પ્રધાનના રાજીનામા પર વ્યંગાત્મક અંદાજમાં લોકપ્રિય ગીતની પંક્તિ લખી, “અચ્છા ચલતા હૂં… દુઆઓં મેં યાદ રાખના.” તેમની આ પોસ્ટ સોશિયલ મીડિયા પર ઝડપથી વાયરલ થઈ રહી છે.
સોશિયલ મીડિયા પર ચર્ચાનો માહોલ
ધર્મેન્દ્ર પ્રધાનના રાજીનામા બાદ સોશિયલ મીડિયા પર #GenZ, #StudentPower અને #Democracy જેવા હેશટેગ ટ્રેન્ડ થઈ રહ્યા છે. અનેક કલાકારો અને સામાન્ય નાગરિકો આ ઘટનાને લોકશાહી, યુવા શક્તિ અને શાંતિપૂર્ણ આંદોલનની અસરકારકતા સાથે જોડીને જોઈ રહ્યા છે.
