મુસાફરી દરમિયાન ફ્રી WiFiની લાલચ મોંઘી પડશે, ખાલી થઈ શકે છે બેન્ક એકાઉન્ટ
- જાહેર જગ્યાઓ પર Free WiFi સુવિધા તો આપે છે, પરંતુ થોડી બેદરકારી તમારી વ્યક્તિગત માહિતીને જોખમમાં મૂકી શકે છે
Travel News: જ્યારે આપણે મુસાફરી દરમિયાન ઘરથી દૂર હોઈએ છીએ, ત્યારે એરપોર્ટ, રેલ્વે સ્ટેશન અથવા કાફે પર ઉપલબ્ધ Free WiFi ગિફ્ટ જેવું લાગે છે. ભલે તે આપણા પરિવારને આપણું લોકેશન મોકલવા માટે હોય કે આપણા ફ્રી સમયમાં વિડિઓઝ જોવા માટે હોય, મફત ઈન્ટરનેટની લાલચ આપણને તાત્કાલિક કનેક્ટ થવા માટે મજબૂર કરે છે, પરંતુ શું તમે જાણો છો કે તમે જે ફ્રી ઇન્ટરનેટનો આનંદ માણી રહ્યા છો તેની પાછળ હેકર્સની જાળ પણ હોઈ શકે છે? WiFi while traveling
જાહેર જગ્યાઓ પર WiFi સુવિધા તો આપે છે, પરંતુ થોડી બેદરકારી તમારી વ્યક્તિગત માહિતીને જોખમમાં મૂકી શકે છે. સુરક્ષિત રહેવા માટે તમારે નિષ્ણાત બનવાની જરૂર નથી. ફક્ત થોડી સરળ બાબતો ધ્યાનમાં રાખવી પૂરતી છે. સાયબર ગુનેગારો ઘણીવાર ખૂબ જ ચાલાક હોય છે. તેઓ એરપોર્ટ અથવા હોટલ પર અસલી વાઈફાઈ નેટવર્ક જેવા નામોનો ઉપયોગ કરે છે, જેથી તમે વિચાર્યા વિના તેની સાથે કનેક્ટ થઈ શકો. આને ટાળવાનો શ્રેષ્ઠ રસ્તો એ છે કે ફક્ત નામ જ નહીં, પણ નેટવર્કની કાર્યક્ષમતા પણ જુઓ. જો કોઈ Wi-Fi નેટવર્ક વધુ પડતી પરવાનગીઓ માંગી રહ્યું છે, તમને વિચિત્ર પેજ પર મોકલી રહ્યું છે અથવા ખૂબ ધીમેથી ચાલી રહ્યું છે, તો દાળમાં કંઈક કાળું છે.
ઓટો-કનેક્ટ સેટિંગને કહો અલવિદા
આપણા ફોન અને લેપટોપને આદત હોય છે કે તે એ નેટવર્ક્સ સાથે આપમેળે કનેક્ટ થઈ જાય છે જે આપણે પહેલા ક્યારેક ઉપયોગમાં લીધું હોય. હેકર્સ આનો ફાયદો ઉઠાવે છે. તેઓ તમારા જૂના નેટવર્ક જેવું જ નામ બનાવીને તમારા ડિવાઈઝને કનેક્ટ કરી શકે છે. તેથી તમારા ફોનના સેટિંગ્સમાં જાઓ અને ઓટો-જોઇન સુવિધા બંધ કરો. આ તમારા ઉપકરણને તમારી સંમતિ વિના કોઈપણ નેટવર્ક સાથે કનેક્ટ થવાથી અટકાવશે.
બેકગ્રાઉન્ડમાં ચાલતી એપ્સ પર નજર રાખો
આપણા ફોન પરની ઘણી એપ્સ ઇન્ટરનેટનો ઉપયોગ કરવાનું ચાલુ રાખે છે અને ઉપયોગમાં ન હોય ત્યારે પણ ચૂપચાપ ડેટા મોકલે છે. જાહેર Wi-Fi પર આ ખતરનાક બની શકે છે. બેકગ્રાઉન્ડ ડેટાને રોકી શકે તેવી એપ્સનો ઉપયોગ કરવાનો પ્રયાસ કરો. આ ફક્ત તમે ખોલેલી એપ્સને જ ઇન્ટરનેટ ઍક્સેસ કરવાની મંજૂરી આપશે, જે તમારી માહિતી લીક થવાનું જોખમ નોંધપાત્ર રીતે ઘટાડશે.
તમારા બ્રાઉઝિંગને સંપૂર્ણપણે ખાનગી રાખો
તમે જાહેર નેટવર્ક પર મુલાકાત લો છો તે કોઈપણ વેબસાઇટ અન્ય લોકો જોઈ શકે છે. આને ટાળવા માટે તમારા બ્રાઉઝર સેટિંગ્સમાં જઈને DNS-over-HTTPS ચાલુ કરો. આ તમારા બ્રાઉઝિંગ માટે સુરક્ષા સ્તર પૂરું પાડે છે. તેનાથી હેકર્સ તમને નકલી વેબસાઇટ્સ પર નહીં મોકલી શકે અને તમારી લોગિન વિગતોને પણ સુરક્ષિત રાખશે.
તમારા લેપટોપ માટે એક અલગ ટ્રાવેલ એકાઉન્ટ બનાવો
જો તમે લેપટોપ સાથે લઈને મુસાફરી કરી રહ્યા છો, તો તમારા મુખ્ય એકાઉન્ટને બદલે એક નવું ટ્રાવેલર એકાઉન્ટ બનાવો. આ પ્રોફાઇલની માહિતી ઓછામાં ઓછી રાખો. જો કોઈ તમારા ડિવાઇસનું એક્સેસ મેળવે તો પણ, તેઓ તમારી મહત્ત્વપૂર્ણ ફાઇલો અને વ્યક્તિગત ડેટાને એક્સેસ કરી શકશે નહીં. આ પદ્ધતિ તમારા સંવેદનશીલ દસ્તાવેજોને સુરક્ષિત રાખવામાં ઘણી મદદ કરી શકે છે.
આ પણ વાંચોઃ કેરળની જેમ દિલ્હીનું પણ નામ બદલાશે? કોણે કરી માંગણી અને શું કરી દલીલો?
