T20 World Cup 2026: શિવમ દુબે અને વરુણ ચક્રવર્તીનો તરખાટ, ભારતે નેધરલેન્ડને 17 રને હરાવ્યું; પરંતુ કેચ છોડવાની સમસ્યા યથાવત
નવી દિલ્હીઃ 19 ફેબ્રુઆરી, 2026: ટી20 વર્લ્ડ કપ 2026ની અંતિમ ગ્રુપ મેચમાં ભારતે નેધરલેન્ડને 17 રને હરાવીને સતત ચોથી જીત નોંધાવી છે. શિવમ દુબેના ઓલરાઉન્ડ પ્રદર્શન (31 બોલમાં 66 રન અને 2 વિકેટ) તેમજ સ્પિનર વરુણ ચક્રવર્તીની ઘાતક બોલિંગ (14 રનમાં 3 વિકેટ) ના દમ પર ભારતે જીત મેળવી હતી. ભારત 8 પોઈન્ટ સાથે ગ્રુપ-એમાં ટોચ પર રહ્યું છે.
જીત છતાં ચિંતા: ટીમ ઈન્ડિયા શરમજનક રેકોર્ડની નજીક
ભારતે ભલે મેચ જીતી લીધી હોય, પરંતુ ફિલ્ડિંગમાં નબળાઈ હજુ પણ યથાવત છે. અમદાવાદના નરેન્દ્ર મોદી સ્ટેડિયમમાં રમાયેલી આ મેચમાં ભારતે ફરી બે કેચ ટપકાવ્યા હતા. ભારત હવે આ ટૂર્નામેન્ટમાં સૌથી વધુ કેચ છોડનારી ટીમોની યાદીમાં બીજા ક્રમે છે:
- આયર્લેન્ડ: 10 કેચ (સૌથી વધુ)
- ભારત: 9 કેચ
- નામીબિયા: 6 કેચ
સુપર-8 રાઉન્ડ પહેલા કેચ છોડવાની આ આદત ભારત માટે મોટો ખતરો સાબિત થઈ શકે છે.
કોચની ચેતવણી: “સુપર-8 માં આ ભૂલ ભારે પડશે”
ટીમ ઈન્ડિયાના આસિસ્ટન્ટ કોચ રયાન ટેન ડોશેએ સ્વીકાર્યું છે કે કેચ છોડવા એ ચિંતાનો વિષય છે. તેમણે કહ્યું, “ટી20માં કેચ છોડવા મોટું અંતર ઉભું કરી શકે છે. ખેલાડીઓ મહેનત કરી રહ્યા છે, પરંતુ સુપર-8માં અમારો સામનો એવી ટીમો સાથે થશે જેમની ફિલ્ડિંગ ખૂબ જ શાનદાર છે.”
હવે દક્ષિણ આફ્રિકા સામે ટક્કર
ભારતની આગામી સફર સુપર-8 રાઉન્ડમાં શરૂ થશે. ભારતનો હવે પછીનો મુકાબલો 22 ફેબ્રુઆરીએ અમદાવાદના મેદાન પર દક્ષિણ આફ્રિકા સામે થશે. ત્યારબાદ ભારતનો સામનો ઝિમ્બાબ્વે અને વેસ્ટ ઈન્ડિઝ સાથે થશે.
