કૂતરા કરડવા બદલ સરકારને ભરવો પડશે ભારે દંડ, સુપ્રીમ કોર્ટેની કેન્દ્ર અને રાજ્ય સરકારોને કડક ચેતવણી

સુપ્રીમ કોર્ટે મંગળવારે આવારા કૂતરાઓ સંબંધિત કેસની સુનાવણી દરમિયાન કેન્દ્ર અને રાજ્ય સરકારોને કડક ચેતવણી આપી છે. કોર્ટે કહ્યું કે કૂતરાના કરડવાથી થયેલી ઈજા અથવા મોતના દરેક કેસમાં ભારે વળતર નક્કી કરવામાં આવી શકે છે. કોર્ટે વધુમાં જણાવ્યું કે આવારા કૂતરાઓને ખોરાક આપનારા લોકો (ડોગ ફીડર્સ)ને પણ કૂતરાના હુમલાઓ માટે જવાબદાર ઠેરવી શકાય, કારણ કે કૂતરાના કરડવાની અસર જીવનભર રહે છે.

જસ્ટિસ વિક્રમ નાથ, જસ્ટિસ સંદીપ મહેતા અને જસ્ટિસ એન.વી. અંજારિયાની પીઠે આ મામલે સુનાવણી કરી હતી. કોર્ટે જણાવ્યું, “કૂતરાના કરડવા અને દરેક મૃત્યુના કેસમાં, અમે તે રાજ્ય માટે ભારે વળતર નક્કી કરીશું જેમણે જરૂરી વ્યવસ્થા ન કરી. સાથે જ, કૂતરાને ખોરાક આપનારા લોકોની જવાબદારી પણ નક્કી કરવામાં આવશે. તેમને ઘરે લઈ જાઓ, ત્યાં જ રાખો. તેમને ફરવા, કરડવા અને પીછો કરવા માટે મંજૂરી કેમ આપવી જોઈએ? કૂતરાના કરડવાની અસરો જીવનભર રહે છે.”

કોર્ટે કહ્યું કે કૂતરાઓને ખવડાવનારાઓની લાગણીઓ ફક્ત કૂતરાઓ પ્રત્યે છે, માણસો પ્રત્યે નહીં. કોર્ટે પૂછ્યું કે જો 9 વર્ષની બાળકી રખડતા કૂતરાઓ દ્વારા મરી જાય તો કોને જવાબદાર ઠેરવવા? શું ખુલ્લામાં કૂતરાઓને ખવડાવવાની હિમાયત કરતા લોકોને જવાબદાર ન ગણવા જોઈએ?

સુપ્રીમ કોર્ટે તમામ રાજ્ય સરકારોને ઠપકો આપ્યો અને કહ્યું કે તેઓ ‘એબીસી નિયમો’ લાગુ કરવામાં સંપૂર્ણપણે નિષ્ફળ ગયા છે.

બેન્ચે વધુમાં કહ્યું, “અમે કેન્દ્ર અને રાજ્ય સરકારોને જવાબદાર ઠેરવીશું. આ મુદ્દો હંમેશાથી ચાલી રહ્યો છે. તમે પોતે ઉલ્લેખ કર્યો છે કે સંસદ 1950 ના દાયકાથી તેના પર વિચાર કરી રહી છે. કેન્દ્ર અને રાજ્ય સરકારોની શિથિલતાને કારણે આ સમસ્યા 1000 ગણી વધી ગઈ છે. આ સરકારોની સંપૂર્ણ નિષ્ફળતા છે. કૂતરા કરડવાથી મૃત્યુ પામેલા દરેક પુરુષ, સ્ત્રી અને બાળક માટે, અમે જવાબદાર સરકાર પર ભારે દંડ અને વળતર લાદીશું.”

આ પણ વાંચો: ઓપરેશન સિંદૂર પુરૂં થયું નથી, 8 આતંકી કેમ્પ પર નજરઃ આર્મી ચીફે આપી સખત ચેતવણી