Court કોર્ટ-કચેરી-ન્યાયતંત્રટ્રેન્ડિંગનેશનલ
ગૃહ મંત્રાલયને અવમાનનાની નોટિસ, SC બે દિવસમાં માંગ્યો જવાબ
Supreme Court : દિલ્હીમાં 10 ઓક્ટોબરે જંતર-મંતર નજીક યોજાયેલા વિરોધ પ્રદર્શન સાથે જોડાયેલા કાનૂની મામલામાં સુપ્રીમ કોર્ટે રવિવારે વિશેષ સુનાવણી હાથ ધરી હતી. કોર્ટે 9 ઓક્ટોબરના પોતાના જ આદેશના કથિત ઉલ્લંઘન બદલ ગૃહ મંત્રાલયના સંબંધિત અધિકારીઓને કારણદર્શક નોટિસ (Show Cause Notice) પાઠવીને સોગંદનામું રજૂ કરવા આદેશ આપ્યો છે. સુનાવણી દરમિયાન પોલીસ કાર્યવાહી, લોકોની અટકાયત, મેટ્રો સેવાઓ પર પ્રતિબંધ, ઈન્ટરનેટ બેન અને બેરિકેડિંગ જેવા અનેક મહત્વપૂર્ણ મુદ્દાઓ ઉછળ્યા હતા. આ મામલે હવે આગામી સુનાવણી મંગળવારે યોજાશે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
સુપ્રીમ કોર્ટે રવિવારે હાથ ધરેલી વિશેષ સુનાવણીના 10 મુખ્ય મુદ્દાઓ નીચે મુજબ છે:
1. અદાલતી અવમાનનાની નોટિસ પર માંગ્યો જવાબ
સુપ્રીમ કોર્ટે પોતાના આદેશનું પાલન ન કરવાના આરોપો પર ગૃહ મંત્રાલયના સંબંધિત અધિકારીઓને નોટિસ જારી કરી પૂછ્યું કે તેમની સામે અદાલતી અવમાનના (Contempt of Court) ની કાર્યવાહી કેમ શરૂ ન કરવી? સોલિસિટર જનરલ તુષાર મહેતાની આપત્તિ છતાં જસ્ટિસ જોયમાલ્ય બાગચીની પીઠે સ્પષ્ટ કર્યું કે કારણદર્શક નોટિસ અને અવમાનના નોટિસ અલગ હોય છે. કોર્ટે અટકાયત કરાયેલા લોકોને લઈને ‘હેબિયસ કોર્પસ’ (Habeas Corpus) અરજીઓ પર પણ સ્પષ્ટતા માંગી છે.
2. મેટ્રો અને રેલ સેવાઓ સામાન્ય રાખવાનો આદેશ
સુપ્રીમ કોર્ટે નિર્દેશ આપ્યો છે કે દિલ્હીમાં મેટ્રો અને ટ્રેન સેવાઓ સામાન્ય રીતે ચાલુ રહેશે. સુરક્ષાના નામે પરિવહન સેવાઓને સંપૂર્ણપણે બંધ કરી શકાય નહીં. કોર્ટે 57 મેટ્રો સ્ટેશનો બંધ કરવાના નિર્ણય પર પુનર્વિચાર કરવા આદેશ આપ્યો હતો. સોલિસિટર જનરલે કોર્ટને જણાવ્યું કે શનિવારે રાત્રે 10 વાગ્યા સુધીમાં તમામ મેટ્રો સ્ટેશનો ખોલી દેવામાં આવ્યા હતા અને ટ્રેનો સામાન્ય રીતે ચાલી રહી છે.
3. 45 મેટ્રો સ્ટેશનો પર પ્રતિબંધ અંગે સવાલો
સુનાવણી દરમિયાન સોલિસિટર જનરલે જણાવ્યું કે દિલ્હી મેટ્રોના 303 સ્ટેશનોમાંથી 45 સ્ટેશનો પર પ્રવેશ અને નિકાસ મર્યાદિત કરવામાં આવ્યા હતા. જસ્ટિસ બાગચીએ દિલ્હી મેટ્રો રેલ કોર્પોરેશન (DMRC) પાસે એ સ્ટેશનોનો નકશો માંગ્યો છે જેથી મુસાફરોને પડેલી અગવડતાનો સાચો આંકડો સમજી શકાય.
4. ઈન્ટરનેટ બંધ ન કરવા અને અવરજવર બહાલ રાખવા નિર્દેશ
સર્વોચ્ચ અદાલતે દિલ્હીમાં ઈન્ટરનેટ સેવાઓ ખોરવાય નહીં તે સુનિશ્ચિત કરવા આદેશ આપ્યો છે. કોર્ટે કહ્યું કે કાયદા અનુસાર અનિવાર્ય ન હોય ત્યાં સુધી ઈન્ટરનેટ પર પ્રતિબંધ મૂકી શકાય નહીં. આ ઉપરાંત, શહેરમાં બેરિકેડિંગની તાત્કાલિક સમીક્ષા કરવા અને બિનજરૂરી બેરિકેડ્સ હટાવી વાહનવ્યવહાર બહાલ કરવા સૂચના આપી છે.
5. સુપ્રીમ કોર્ટ બહારથી કલમ 163 ના બોર્ડ હટાવવાનો આદેશ
સુનાવણી દરમિયાન વકીલોએ ફરિયાદ કરી હતી કે સુપ્રીમ કોર્ટ સંકુલ બહાર ભારતીય નાગરિક સુરક્ષા સંહિતા (BNSS) ની કલમ 163 લાગુ હોવાના બોર્ડ લગાવવામાં આવ્યા છે, જેના કારણે વકીલો અને અસીલોને કોર્ટમાં આવતા રોકવામાં આવી રહ્યા છે. સોલિસિટર જનરલની હાજરીમાં કોર્ટે આ બોર્ડ તાત્કાલિક હટાવવાનો આદેશ આપ્યો હતો.
આ પણ વાંચોઃ બિટકોઇન કૌભાંડમાં ED ની મોટી કાર્યવાહી: કરોડો રૂપિયાના સ્કેમના મુખ્ય આરોપી દિવ્યેશ દરજીની ધરપકડ
6. ગેરકાયદે અટકાયત અને પોલીસ બળપ્રયોગ પર સ્પષ્ટતા
સુપ્રીમ કોર્ટે સ્પષ્ટ કર્યું કે પોલીસ કાર્યવાહી કાયદાનુસાર જ હોવી જોઈએ. વકીલો સાથે કથિત મારપીટ, પત્રકારો અને જુનિયર વકીલોની બળજબરીથી કરાયેલી અટકાયત તથા નેતાઓ-પ્રદર્શનકારીઓના મોબાઈલ ફોન જપ્ત કરવાના મામલે કોર્ટે પોલીસ પાસેથી જવાબ માંગ્યો છે.
7. આશરે 7,000 લોકોની અટકાયત કરવાનો દાવો
વરિષ્ઠ વકીલ મેનકા ગુરુસ્વામીએ કોર્ટ સમક્ષ દાવો કર્યો હતો કે પ્રદર્શન દરમિયાન દિલ્હી અને એનસીઆર વિસ્તારમાંથી આશરે 7,000 થી વધુ લોકોની અટકાયત કરવામાં આવી છે. તેમણે અટકાયત કરાયેલા લોકોનો સત્તાવાર આંકડો જાહેર કરવાની માંગ કરી છે.
8. શાંતિપૂર્ણ પ્રદર્શનના અધિકાર પર બહસ
વરિષ્ઠ એડવોકેટ કપિલ સિબ્બલે બંધારણની કલમ 19(1)(a) નો હવાલો આપીને નાગરિકોના શાંતિપૂર્ણ વિરોધ પ્રદર્શન કરવાના અધિકારની રજૂઆત કરી હતી. પીઠે નોંધ્યું કે શાંતિપૂર્ણ પ્રદર્શનનો અધિકાર છે પરંતુ તે કાયદાની મર્યાદામાં હોવો જોઈએ.
9. કોર્ટરૂમમાં હંગામો અને સ્થળ બદલાયું
સુનાવણી દરમિયાન કોર્ટરૂમ નંબર 18 માં વકીલો અને પોલીસ અધિકારીઓ વચ્ચે તીખી બહસ થઈ હતી. વીડિયો કોન્ફરન્સિંગ લિંક કામ ન કરતી હોવાના કારણે અને હંગામાને પગલે 15 મિનિટ માટે કામગીરી સ્થગિત કરી સુનાવણી કોર્ટરૂમ નંબર 5 માં શિફ્ટ કરવામાં આવી હતી.
10. મંગળવારે ફરી હાથ ધરાશે સુનાવણી
સર્વોચ્ચ અદાલતે તમામ પક્ષકારોને પોતપોતાના જવાબો અને સોગંદનામા રજૂ કરવા માટે મંગળવાર સુધીનો સમય આપ્યો છે. બંધારણની કલમ 32 હેઠળ નાગરિકોના મૂળભૂત અધિકારોનું રક્ષણ કરવા માટે કોર્ટ બંધાયેલી છે તેવું પુનરોચ્ચાર કરીને બેંચે વધુ સુનાવણી મંગળવારે મુલતવી રાખી છે.
