fighter-jet-decision:   ભારતને અમેરિકાનું આધુનિક ફાઈટર જેટ F-35 (F-35 Fighter Jet) વેચવા અંગે હજુ સુધી કોઈ સત્તાવાર દરખાસ્ત મળી નથી. બીજી તરફ, રશિયાના પાંચમી પેઢીના ફાઈટર જેટ Su-57 (Su-57 Fighter Jet)ને ખરીદવા અથવા તેની ક્ષમતાઓનું મૂલ્યાંકન કરવા અંગે પણ ભારતે અંતિમ નિર્ણય લીધો નથી. ભારતીય વાયુસેનાના વડા એર ચીફ માર્શલ એપી સિંહે શનિવારે આ સ્પષ્ટતા કરી હતી. જોધપુરમાં યોજાયેલી બહુરાષ્ટ્રીય હવાઈ કવાયત ‘તરંગ શક્તિ-2026’ (Tarang Shakti 2026)ના સમાપન પ્રસંગે પત્રકારો સાથે વાતચીત દરમિયાન તેમણે આ મુદ્દે ભારતનું વલણ રજૂ કર્યું હતું.

F-35ની ખરીદી અંગે સત્તાવાર દરખાસ્ત મળી નથી

અમેરિકાના F-35 વિમાનની સંભવિત ખરીદી અંગે પૂછવામાં આવેલા પ્રશ્નના જવાબમાં એપી સિંહે રમૂજી અંદાજમાં કહ્યું હતું કે, “તમારા લોકો તો અમને વિમાનની નજીક પણ જવા દેતા નથી અને તમે અમને તે વેચવાની વાત કરો છો.” તેમની આ ટિપ્પણી અમેરિકાના પાંચમી પેઢીના સ્ટેલ્થ લડાકુ વિમાનની ખરીદીને લઈને ચાલી રહેલી ચર્ચાઓ વચ્ચે આવી છે. જોકે, વાયુસેનાના વડાના નિવેદન મુજબ, આ વિમાન વેચવા અંગે અમેરિકા તરફથી ભારતને કોઈ સત્તાવાર પ્રસ્તાવ મળ્યો નથી. પત્રકાર પરિષદમાં અમેરિકન વાયુસેનાની પેસિફિક એર ફોર્સિસ (PACAF)ના કમાન્ડર પણ હાજર હતા.

Su-57 માટે સરકારના નિર્ણયની રાહ

રશિયાના Su-57 લડાકુ વિમાન અંગે એપી સિંહે જણાવ્યું હતું કે, આ વિમાન માટે રશિયા તરફથી પ્રસ્તાવ આપવામાં આવ્યો હોવાની તેમને જાણકારી છે. જોકે, ભારતીય વાયુસેના તેનું મૂલ્યાંકન કરશે કે નહીં તે હજુ નક્કી થયું નથી. તેમણે સ્પષ્ટ કર્યું હતું કે સરકાર તરફથી નિર્ણય મળ્યા બાદ જ વાયુસેના તપાસશે કે Su-57 ભારતની સંરક્ષણ અને કામગીરી સંબંધિત જરૂરિયાતોને કેટલી હદે પૂર્ણ કરી શકે છે. આથી સ્પષ્ટ થાય છે કે Su-57ની સંભવિત ખરીદી અંગે હાલ કોઈ અંતિમ નિર્ણય જાહેર કરવામાં આવ્યો નથી. પહેલાં સરકારી સ્તરે નિર્ણય લેવામાં આવશે અને ત્યારબાદ જ વિમાનની ક્ષમતાઓનું મૂલ્યાંકન આગળ વધી શકશે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

સ્વદેશી ફાઇટર જેટના વિકાસ પર ભારતનું ધ્યાન

ભારત પોતાની ભવિષ્યની સંરક્ષણ જરૂરિયાતોને પહોંચી વળવા પાંચમી પેઢીના સ્વદેશી લડાકુ વિમાન (Indigenous Fifth Generation Fighter Aircraft)ના વિકાસ પર પણ કામ કરી રહ્યું છે. સંરક્ષણ ક્ષેત્રે આત્મનિર્ભરતા વધારવાની વ્યૂહરચનામાં આ પ્રોજેક્ટ મહત્ત્વનો ભાગ છે. દરમિયાન, જોધપુરમાં આયોજિત ‘તરંગ શક્તિ-2026’ હવાઈ કવાયતમાં ભારત સહિત આઠ દેશોની વાયુસેનાઓએ ભાગ લીધો હતો. આ અભ્યાસ દ્વારા ભાગ લેનારા દેશોને સંયુક્ત કામગીરી, પરસ્પર સંકલન અને વ્યાવસાયિક અનુભવના આદાનપ્રદાનની તક મળી હતી.

આ પણ વાંચો : ગુજરાત હાઈકોર્ટે મહિલા ન્યાયિક અધિકારીની બરતરફીનો હુકમ યથાવત રાખ્યો, ગેરવર્તણૂકને ગણાવી ગંભીર મામલો