સલમાન ખાન ફાર્મ હાઉસ વિવાદ: બોમ્બે HC પાડોશીને લગાવી ફટકાર, કહ્યું- ‘કોઈને બદનામ કરવાનો હક નથી’
Salman Khan Panvel Farmhouse Dispute: બોલિવૂડ સુપરસ્ટાર સલમાન ખાન (Salman Khan) અને તેમના પનવેલ સ્થિત ફાર્મ હાઉસના પાડોશી કેતન કક્કડ વચ્ચે ચાલી રહેલા જમીન વિવાદમાં બોમ્બે હાઈકોર્ટે (Bombay High Court) એક અત્યંત મહત્વપૂર્ણ ટિપ્પણી કરી છે. હાઈકોર્ટે સ્પષ્ટ શબ્દોમાં જણાવ્યું છે કે, સોશિયલ મીડિયાનો એક્સેસ હોવાનો અર્થ એ નથી કે કોઈ પણ વ્યક્તિ સામાન્ય નાગરિક કે સેલિબ્રિટી વિરૂદ્ધ બદનક્ષીભરી (માનહાનિકારક) પોસ્ટ કે વીડિયો શેર કરતું રહે.
સુનાવણી દરમિયાન બોમ્બે હાઈકોર્ટના જસ્ટિસ શર્મિલા દેશમુખની બેન્ચે સલમાનના પાડોશી કેતન કક્કડને પૂછ્યું કે, “જ્યારે આ મામલો પહેલેથી જ અદાલતમાં વિચારાધીન છે, તો પછી સોશિયલ મીડિયાનો સહારો કેમ લેવામાં આવી રહ્યો છે?” કોર્ટે કેતન કક્કડને અભિનેતા વિરૂદ્ધ સોશિયલ મીડિયા પર મૂકવામાં આવેલી આપત્તિજનક પોસ્ટ અને વીડિયો હટાવવા અંગે ગંભીરતાથી વિચાર કરવા પણ જણાવ્યું છે.
શું છે સમગ્ર મામલો અને વિવાદની પૃષ્ઠભૂમિ?
કેતન કક્કડ અમેરિકામાં રહી ચૂકેલા એક રિટાયર્ડ એનઆરઆઈ (NRI) છે. તેમની જમીન મહારાષ્ટ્રના રાયગઢ જિલ્લાના પનવેલ વિસ્તારમાં આવેલી છે, જે સલમાન ખાનના પ્રખ્યાત ફાર્મહાઉસ ‘અર્પિતા ફાર્મ્સ’ (Arpita Farms) ની બરોબર નજીક છે.
1990ના દાયકામાં જ્યારે કક્કડે નિવૃત્તિ પછી રહેવા માટે આ જમીન ખરીદી હતી, ત્યારે જમીન વેચનાર કંપનીએ તેમની મુલાકાત સલમાનના પિતા અને પ્રખ્યાત લેખક સલીમ ખાન સાથે કરાવી હતી. વર્ષો સુધી બંને પરિવારો વચ્ચે ખૂબ જ મધુર સંબંધો રહ્યા હતા. જ્યારે પણ કક્કડ પરિવાર પોતાની પ્રોપર્ટી પર આવતો, ત્યારે સલમાનના પરિવાર તરફથી તેમનું ઉષ્માભર્યું સ્વાગત કરવામાં આવતું હતું. પરંતુ વર્ષ 2019માં બંને પક્ષોના સંબંધોમાં અચાનક કડવાશ આવી ગઈ જ્યારે કક્કડે આરોપ લગાવ્યો કે તેમને પોતાની જ જમીન પર આવતા-જતા રોકી દેવામાં આવ્યા છે.
2.5 એકર પહાડી જમીન અને ગંભીર આક્ષેપો
આ સમગ્ર વિવાદ પનવેલની ૨.૫ એકર પહાડી જમીનને લઈને છે. કેતન કક્કડનો દાવો છે કે આ જમીન કાયદેસર રીતે તેમની છે, પરંતુ મહારાષ્ટ્ર વન વિભાગે સલમાન ખાનના દબાણ અને પ્રભાવ હેઠળ આવીને તેમની જમીનની ફાળવણી રદ કરી દીધી છે.
કેતન કક્કડે સલમાન ખાન પર નીચે મુજબના ગંભીર આરોપો લગાવ્યા હતા:
એક મોટો ગેટ બનાવીને તેમની જમીન સુધી પહોંચવાનો મુખ્ય રસ્તો જ બંધ કરી દેવામાં આવ્યો છે.
રસ્તાઓ રોકવાની સાથે-સાથે તેમની પ્રોપર્ટીનું વીજ જોડાણ પણ કાપી નાખવામાં આવ્યું છે.
તેમની જમીન પર બનેલું ઈકો-ફ્રેન્ડલી ઘર અને ગણપતિ મંદિર પણ તોડી પાડવામાં આવ્યું છે.
સરકારી દસ્તાવેજોમાં હેરાફેરી કરીને તેમની ખાનગી જમીનને વન ક્ષેત્ર (Forest Area) જાહેર કરી દેવાઈ છે.
બીજી તરફ, સલમાન ખાનના વકીલોએ આ તમામ આરોપોને સખત શબ્દોમાં ફગાવી દીધા છે. વકીલોનું કહેવું છે કે કક્કડ જે જમીન ખરીદવા માંગતા હતા તેનો સોદો કાયદેસર રીતે ગેરકાયદેસર ઠર્યો હતો અને તેથી જ વન વિભાગે તેને રદ કર્યો છે. આ વાતની અદાવત રાખીને તેઓ અભિનેતા સલમાન ખાનને ટાર્ગેટ કરી રહ્યા છે.
સોશિયલ મીડિયા પર બાબાર-ઔરંગઝેબ સાથે સરખામણી અને ધાર્મિક રંગ
સ્થાનિક સ્તરે વિવાદ ન ઉકેલાતા કેતન કક્કડે સોશિયલ મીડિયાનો સહારો લીધો હતો. તેમણે યુટ્યુબ અને અન્ય પ્લેટફોર્મ્સ પર કેટલાય વીડિયો શેર કરીને સલમાનના 100 એકરના ફાર્મ હાઉસમાં ગેરકાયદેસર પ્રવૃત્તિઓ થતી હોવાના ગંભીર આક્ષેપો કર્યા હતા.
એટલું જ નહીં, એક વીડિયોમાં તેમણે સલમાન ખાનની સરખામણી મુઘલ શાસક ‘બાબર’ અને ‘ઔરંગઝેબ’ સાથે કરી નાખી હતી. તેમજ ગણપતિ મંદિર અને અયોધ્યા મંદિરનો ઉલ્લેખ કરીને આ આખી લડાઈને ધાર્મિક અને કોમી રંગ આપવાનો પ્રયાસ પણ કર્યો હતો. આ વીડિયો લાખો લોકોએ જોયા બાદ સોશિયલ મીડિયા પર સલમાન વિરૂદ્ધ નકારાત્મક ટિપ્પણીઓનો પૂર આવ્યો હતો.
સલમાન ખાને કર્યો માનહાનિનો કેસ
પોતાની વૈશ્વિક છબી ખરાબ થતી જોઈને સલમાન ખાને કેતન કક્કડ વિરૂદ્ધ સિવિલ ડિફેમેશન (માનહાનિ) નો મુકદ્દમો દાખલ કર્યો હતો. આ કેસમાં તેમણે ગૂગલ, યુટ્યુબ, ફેસબુક, એક્સ (ટ્વિટર) અને કેટલાક કન્ટેન્ટ ક્રિએટર્સને પણ પક્ષકાર બનાવ્યા છે જેથી વાંધાજનક કન્ટેન્ટ હટાવી શકાય.
નીચલી અદાલતમાંથી તાત્કાલિક રાહત ન મળતા સલમાન ખાને આ નિર્ણયને બોમ્બે હાઈકોર્ટમાં પડકાર્યો હતો. હવે હાઈકોર્ટે પાડોશીના વલણ સામે સખત નારાજગી વ્યક્ત કરી છે, જો કે હજુ કોઈ અંતિમ આદેશ પસાર કરવામાં આવ્યો નથી અને આગામી તારીખે આ મામલે વધુ સુનાવણી હાથ ધરાશે.
આ પણ વાંચોઃ અમદાવાદ રેલવેને મળશે ‘સુરક્ષા કવચ’: 1300 કિમીના ટ્રેક પર લાગશે સ્વદેશી Kavach 4.0 સિસ્ટમ
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
