ઓપરેશન હાર્ડબોલ: ભારતની ગુપ્ત યાદી બાદ બિશ્નોઈ-ગોલ્ડી નેટવર્ક સામે એક્શન મોડમાં FBI
Operation Hardball: ભારત અને અમેરિકાની તપાસ એજન્સીઓ વચ્ચે વધેલા સહયોગના પરિણામે આંતરરાષ્ટ્રીય સ્તરે ‘ઓપરેશન હાર્ડબોલ’ હેઠળ મોટી કાર્યવાહી હાથ ધરવામાં આવી છે. વિશ્વસનીય સૂત્રોના જણાવ્યા મુજબ, ભારતીય કેન્દ્રીય એજન્સીઓએ અમેરિકા, કેનેડા અને યુરોપમાંથી કાર્યરત ગેંગસ્ટરોની ચકાસેલી ગુપ્ત યાદી અમેરિકન અધિકારીઓને સોંપી હતી. આ યાદીમાં લોરેન્સ બિશ્નોઈ, ગોલ્ડી બરાડ, રોહિત ગોદારા અને જગ્ગૂ ભગવાનપુરિયા સહિત અનેક ગેંગસ્ટરોના નામ અને તેમના સંભવિત ઠેકાણાઓની માહિતી સામેલ હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
વિદેશ મંત્રાલય મારફતે પુરાવા શેર કરાયા
સૂત્રોના જણાવ્યા અનુસાર, ભારતીય એજન્સીઓએ વિદેશ મંત્રાલય મારફતે મજબૂત પુરાવાઓ સાથે ગેંગસ્ટરોની માહિતી અમેરિકન સત્તાવાળાઓ સુધી પહોંચાડી હતી. છેલ્લા દોઢ મહિનામાં બંને દેશોની તપાસ એજન્સીઓ વચ્ચે અનેક મહત્વપૂર્ણ બેઠકો યોજાઈ હતી, જેના આધારે આ આંતરરાષ્ટ્રીય કાર્યવાહી શક્ય બની હોવાનું માનવામાં આવે છે.
અનમોલ બિશ્નોઈના ડિપોર્ટેશન બાદ વધ્યો સહયોગ
ગયા વર્ષે અનમોલ બિશ્નોઈને અમેરિકાથી ભારત પરત મોકલવામાં આવ્યા બાદ ભારત અને અમેરિકાની કાયદા અમલવારી એજન્સીઓ વચ્ચેનો તાલમેલ વધુ મજબૂત બન્યો હોવાનું સૂત્રો કહે છે. ગયા વર્ષે અમેરિકન અધિકારીઓએ દિલ્હીમાં આવેલા NIA મુખ્યાલયની મુલાકાત લઈને ભારતીય મૂળના ગેંગસ્ટરો અને અમેરિકન ડ્રગ કાર્ટેલ વચ્ચેના સંબંધોને લઈને ચિંતા વ્યક્ત કરી હતી.
પાકિસ્તાની તસ્કરો સાથે જોડાણની આશંકા
તપાસ એજન્સીઓના જણાવ્યા મુજબ, વિદેશમાં રહેલા કેટલાક ગેંગસ્ટરો ભારત સુધી ડ્રગ્સ પહોંચાડવા માટે પાકિસ્તાની તસ્કરો સાથે સતત સંપર્કમાં છે. ડ્રોન અને દરિયાઈ માર્ગોનો ઉપયોગ કરીને નશીલા પદાર્થોની હેરાફેરી કરવામાં આવતી હોવાની માહિતી સામે આવી છે.
VPN અને એન્ક્રિપ્ટેડ એપ્સથી બચવાનો પ્રયાસ
તપાસથી બચવા માટે ગેંગસ્ટરો VPN અને એન્ક્રિપ્ટેડ મેસેજિંગ એપ્સનો ઉપયોગ કરે છે, જેના કારણે તેમની લોકેશન શોધવી અને તેમની વાતચીતને ટ્રેક કરવી તપાસ એજન્સીઓ માટે મુશ્કેલ બની જાય છે.
ગેંગસ્ટરોની હાલની સ્થિતિ
લોરેન્સ બિશ્નોઈ વર્ષ 2014થી જેલમાં છે અને હાલમાં ગુજરાતની જેલમાં બંધ છે. તેના પર બાબા સિદ્દીકી હત્યા કેસ, સિદ્ધૂ મૂસેવાલા હત્યા કેસ તેમજ અભિનેતા સલમાન ખાનને ધમકી આપવાના આરોપો સાથે જોડાણ હોવાના દાવા કરવામાં આવ્યા છે.
જગ્ગૂ ભગવાનપુરિયા પણ ધરપકડ બાદ ગયા વર્ષે 24 માર્ચથી આસામની જેલમાં બંધ છે. જ્યારે ગોલ્ડી બરાડ અને રોહિત ગોદારા હજુ પણ ફરાર હોવાનું માનવામાં આવે છે. તપાસ એજન્સીઓના મતે, ગોલ્ડી બરાડ અને રોહિત ગોદારા વિદેશમાંથી મળીને ગેંગનું સંચાલન કરી રહ્યા છે. ઉપરાંત, બિશ્નોઈ નેટવર્કના કેનેડા અને અમેરિકામાં પણ સક્રિય સંપર્કો હોવાનું તપાસમાં સામે આવ્યું છે.
ભારત અને અમેરિકાની સંયુક્ત કાર્યવાહીથી આંતરરાષ્ટ્રીય ગેંગસ્ટર નેટવર્ક સામે દબાણ વધ્યું છે. તપાસ એજન્સીઓનું માનવું છે કે આગામી સમયમાં પણ આવી સંયુક્ત કાર્યવાહી વધુ તેજ બની શકે છે.
