બદ્રીનાથ ધામમાં હિમવર્ષાથી વાતાવરણ બદલાયું. કપાટ બંધ થતાં પહેલાં બરફની સફેદ ચાદર છવાઈ.

Badrinath Dham : ઉત્તરાખંડના ચમોલી જિલ્લામાં આવેલા પ્રસિદ્ધ બદ્રીનાથ ધામમાં શિયાળાની શરૂઆત સાથે હવામાનમાં મોટો ફેરફાર જોવા મળી રહ્યો છે. મંદિરના કપાટ શિયાળા માટે બંધ થવાના ગણતરીના કલાકો પહેલાં જ ધામમાં ભારે હિમવર્ષા શરૂ થઈ છે. સવારથી સતત પડી રહેલા બરફને કારણે સમગ્ર વિસ્તાર બરફની સફેદ ચાદરમાં ઢંકાઈ ગયો છે. કડકડતી ઠંડી વચ્ચે પણ ભગવાન બદ્રી વિશાલના દર્શન માટે શ્રદ્ધાળુઓનો ઉત્સાહ યથાવત્ છે.
સવારથી સતત થઈ રહી છે હિમવર્ષા
રવિવાર સવારથી બદ્રીનાથ ધામમાં બરફવર્ષા થઈ રહી છે. તેના કારણે મંદિર પરિસર સહિત આસપાસના વિસ્તારોમાં બરફના થર જામી ગયા છે. ઊંચા પર્વતોથી લઈને આસપાસની ઇમારતો સુધી દરેક સ્થળે બરફની સફેદ ચાદર પથરાયેલી જોવા મળી રહી છે. ધામમાં પહોંચેલા શ્રદ્ધાળુઓ એક તરફ ભગવાન બદ્રી વિશાલના દર્શન કરી રહ્યા છે, તો બીજી તરફ હિમવર્ષાના સુંદર નજારાનો પણ આનંદ માણી રહ્યા છે. હવામાનમાં આવેલા આ અચાનક ફેરફારથી સમગ્ર વિસ્તારમાં ઠંડીનું પ્રમાણ વધ્યું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
ક્યારે બંધ થશે બદ્રીનાથ ધામના કપાટ?
વિજયાદશમીના દિવસે બદ્રીનાથ ધામના કપાટ બંધ કરવાની તારીખ અને સમયની જાહેરાત કરવામાં આવી હતી. પંચ પૂજાની પરંપરા પૂર્ણ થયા બાદ નિર્ધારિત મુહૂર્તમાં મંદિરના મુખ્ય કપાટ શિયાળા માટે બંધ કરવામાં આવશે. જાહેર કરાયેલા કાર્યક્રમ મુજબ, 16 નવેમ્બરના રોજ રાત્રે 9:37 વાગ્યે બદ્રીનાથ મંદિરના કપાટ બંધ થશે. ત્યારબાદ શિયાળાની ઋતુ દરમિયાન ભક્તો માટે મંદિરના નિયમિત દર્શન બંધ રહેશે.
શું છે બદ્રીનાથ ધામનું ધાર્મિક મહત્ત્વ?
બદ્રીનાથ ધામ ઉત્તરાખંડના ચમોલી જિલ્લામાં અલકનંદા નદીના કિનારે નર અને નારાયણ પર્વતોની વચ્ચે લગભગ 3,133 મીટરની ઊંચાઈએ આવેલું છે. અહીં ભગવાન વિષ્ણુ પદ્માસન એટલે કે ધ્યાનમુદ્રામાં બિરાજમાન છે. બદ્રીનાથ ધામ હિંદુ ધર્મનાં ચારધામોમાંનું એક છે. ઉત્તરાખંડના નાના ચારધામમાં યમુનોત્રી, ગંગોત્રી, કેદારનાથ અને બદ્રીનાથનો સમાવેશ થાય છે. વૈષ્ણવ પરંપરામાં પણ આ મંદિરનું વિશેષ સ્થાન છે અને તેને 108 દિવ્ય દેશમમાં ગણવામાં આવે છે. ધાર્મિક માન્યતા અનુસાર, બદ્રીનાથ ધામની યાત્રા કરવાથી પાપોમાંથી મુક્તિ મળે છે અને આત્માની શુદ્ધિ થાય છે. આ જ કારણ છે કે દર વર્ષે મોટી સંખ્યામાં શ્રદ્ધાળુઓ ભગવાન બદ્રી વિશાલના દર્શન માટે અહીં પહોંચે છે.
આ પણ વાંચો : અફઘાનિસ્તાનમાં વહેલી સવારે ભૂકંપના આંચકા અનુભવાયા. રિક્ટર સ્કેલ પર 5.1ની તીવ્રતા નોંધાઈ












